Rut 4 - Hanunuu

Nangasawa si Buus sa kan Rut

¹ Nag-atag si Buus sa puwirtahan banwa tinmukaw ati. Pagka linmawuy ti pagsabihun niya pag pinakaarani pag katawuhan ni Ilimilik, magkun si Buus sa kanya, “Ampud, abala pagtukaw dap kawu.” Nagpakarani waydi ti lalaki ag tinmukaw.

² Pinatipun ni Buus ti manga manugdumara sampulu ka banwa ag pinatukaw diman ati. Pagka matukawan yi sida,

³ magkun si Buus sa kay katawuhan niya, “Binmalik yi si Nuymi ginan sa Muab, gustu niya ipabili ti daga nita katawuhan ni Ilimilik.

⁴ Inisip niku ipaalam inda sa kanmu. Nakan nu gustu nimu, lukata nimu inda sa atubangan manga manugpamahala niku manga kasimanwa ag iba waya matukawan atay. Dapat nu dayu kawu, sabiha nimu hampay maalaman niku. Nu isipun gid, kawu ti may katungkulan lumukat inda, ag pangadwa lang aku.” Sinmagut ti lalaki, “Hu, lukatun niku.”

⁵ Dapat magkun si Buus, “Sa sirang lukatun nimu ti daga sa kan Nuymi, kailangan asawan-un nimu si Rut, ti Muabita buranday, hampay nu magkaanak kamu pirmaminti ti daga sa magtal-anakan katawuhan nita namatay.”

⁶ Pagka nadnugan inda lalaki, magkun siya, “Nu katida, unman yi ngap niku lukatun ti daga dahil barang magkaimaw waya aku kakurian sa sadili niku daga, dahil una hanggan anak nimi ni Rut may bahagi yi sa kang daga. Kawu yi lang ti pag lukat, dahil unman ngap niku mabuwat tunda.”

⁷ Ati katpung pag panahun sa Israil, agud masiguru ti paglukat sa daga ngatay pagsalyu karampatan sa paglukat daga, paglubadun usa ka tawu kay lapak bag-u iayaw sa usa. Katunda ngani ti pagbuwatun kaybi sa Israil bilang patutuu sa kanda kasunduan.

⁸ Nakan pagka sinabi lalaki sa kan Buus, “Kawu yi lang ti paglukat daga,” linubad niya rargu kay lapak ag ipinakaun sa kan Buus.

⁹ Magkun si Buus sa banwa hanggan sa tanan tawu ati, “Manga kastigus kamu taynguna pag sirang lukatun yi niku sa kan Nuymi ti tanan daga ni Ilimilik, kay namana nida ni Kilyun ni Mahalun.

¹⁰ Ag bukud waya siyun, asawan-un niku si Rut taga Muab, kay buranday ni Mahalun, hampay nu magkaimaw anak kami, pirmaminti ti daga ni Mahalun sa kay magtal-anakan, ag hampay balaw madura ti lahi niya sa kay manga kasimanwa.” Bag-u sinabi waya gid ni Buus sa manga tawu, “Kastigus kamu taynguna pag sirang!”

¹¹ Sinmagut ti manga manugdumara banwa hanggan ti tanan tawu ati sa sabian, “Hu, manga kastigus kami. Ipahintulut mana Panginuun kanmu maasawa parihu sa kanda ni Rakil ag ni Liya, imaw ti gimpuunan Israil. Mana yumaman kawu sa Iprata ag bumaliw bantug sa Bitlihim.

¹² Mana ti ipakaun Panginuun pag manga anak sa kanmu sa panab-anan tunda pag babayi imaw ti pumabantug sa kanmu magtal-anakan parihu sa magtal-anakan ni Paris, kay anak ni Huda sa kan Tamar.”

Ti manga Ginurang ni Dabid

¹³ Nakan nangasawa si Buus sa kan Rut, ag ipinahintulut Panginuun mamuduy si Rut ag nanganak usa ka lalaki.

¹⁴ Magkun ti manga kababayihan sa kan Nuymi, “Dayawun ti Panginuun! Pinakan-an kawu niya taynguna idu imaw ti mangalaga sa kanmu. Mana bumaliw bantug siya sa Israil!

¹⁵ Pabisugun ag alagaan niya kawu nu gurangun yi, dahil anak siya nimu umagad magmahal sa kanmu balaw di ga sa pagmahal pitu ka anak lalaki.”

¹⁶ Pirmi pagbul-un ni Nuymi ti anak ag pagsalilihun. Siya ti manug-alaga sa anak.

¹⁷ Magkun kay manga kamalay babayi ni Nuymi, “May idu yi lalaki si Nuymi!” Iningarnan nida ti anak Ubid. Pagka daka yi si Ubid, nagkaimaw siya anak, si Isai kay ngaran. Ag si Isai kay ama ni Dabid.

¹⁸ Inda kay lahi ni Paris tugka sa kan Dabid: Si Paris kay ama ni Hisrun,

¹⁹ si Hisrun kay ama ni Ram, si Ram kay ama ni Aminadab,

²⁰ si Aminadab kay ama ni Nashun, si Nashun kay ama ni Salmun,

²¹ si Salmun kay ama ni Buus, si Buus kay ama ni Ubid,

²² si Ubid kay ama ni Isai, ag si Isai kay ama ni Dabid.