Rut 3 - Hanunuu

Ti Pagpamuhunun ni Rut sa kan Buus

¹ Usa ka sirang, magkun si Nuymi sa kan Rut, “Anak, gustu niku makaasawa yi kawu hampay sa kanmu ikaayad.

² Si Buus duy kanta katawuhan, kabay kay manga suruguun babayi nakaibahan nimu sa magtarabahu? Sab yabi manahup siya sibada.

³ Nakan pagparigus kawu, pagpamanglu, ag sulungan kanmu marinu pag rutay. Pag-atag kawu sa giriukan, dapat danga kawu magpakakit sa kanya tugka sa makakaun ag makainum siya.

⁴ Nu maturug yi siya, bantayi nimu nu naan siya pag paigya. Ag nu turug yi siya, atiha nimu ag kabyawa kay kumut sa kay aluludan niya, ag ati kawu pagpaigya sa kay tab-anan lulud. Ag sabihun niya sa kanmu nu unu kanmu dapat buwatun.”

⁵ Sinmagut si Rut, “Buwatun niku ti tanan nimu sinabi.”

⁶ Nakan nag-ati siya sa giriukan hampay buwatun ti tanan sinabi sa kanya niya manugang.

⁷ Pagka nakatapus kaun ag inum si Buus, nagmayad kay magdungug niya. Napaigya siya sa saruy tumpuk sibada hampay maturug. Amat-amat waydi nagpakarani si Rut ag kinabyaw kay kumut sa aluludan niya ag napaigya ati.

⁸ Pagka magkakaraw-an yi yabi, nimata si Buus, pagka nanligun-at siya, nadiklahan siya may babayi maigyaan sa kay aluludan niya.

⁹ Namaingana si Buus, “Si unu kawu?” Sinmagut siya, “Aku duy si Rut. Usa duy aku sa arani pag katawuhan niyu, kailangan niyu alagaan. Tabuni duy aku nimu rutay hampay ipakakit kuntay asawan-un ag alagaan nimu aku.”

¹⁰ Magkun si Buus, “Anak, papaladan mana kawu Panginuun. Ti pagkamatinupadun kanmu ipinakakit taynguna sa kanmu magtal-anakan balaw di ga sa ipinakakit nimu kaybi. Dahil balaw kawu naghingbut sa kan-akan, mayaman ngatay pugri.

¹¹ Nakan danga kawu magkaarimputu, anak. Buwatun niku ti tanan nimu pagpamuhunun, dahil alam tanan niku manga kasimanwa mayad kawu pag babayi.

¹² Tutuu arani kawu niku pag katawuhan, may katungkulan aku alagaan kawu, dapat may imaw waya kawu arani gid pag katawuhan kaysa kangku.

¹³ Sitay dapu kawu tugka surip, ag aldaw pag surip maalaman nita nu tupadun niya kay katungkulan sa kanmu. Nu pumayag siya, mayad, dapat nu unman, pag-isumpa niku sa Panginuun buhi, tupadun niku kang katungkulan sa kanmu. Pagsitay lang dapu kawu pagkaturug tugka surip.”

¹⁴ Nakan naturug si Rut sa aluludan ni Buus tugka surip, dapat madulum-dulum waya binmangun yi si Rut hampay balaw siya makilala, dahil dayu si Buus may makaalam kuntay nag-atag si Rut sa kay giriukan.

¹⁵ Magkun si Buus sa kan Rut, “Daran-a sitay tag kanmu sulung kulimpay bag-u lapada.” Linapad ngani inda ni Rut, ag pinaulian ni Buus manga unum yi ka kilu sibada ag ipinasungguy sa kan Rut. Ag nagbalik si Rut sa banwa.

¹⁶ Pagras-ug ni Rut sa kay manugang, pinaingana siya, “Kamusta kawu, anak?” Itinultul maan ni Rut ti tanan binwat ni Buus.

¹⁷ Magkun waya si Rut, “Balaw duy magpasnu si Buus muli aku sa kanmu nu unman may dara, nakan pinakan-an aku manga unum ka kilu sibada.”

¹⁸ Magkun si Nuymi, “Pag-alagad lang kawu, anak, tugka sa maalaman nimu nu hintay ti mangyari, dahil balaw umapas si Buus tugka sa unman mahusay niya inda taynguna pag sirang ti kanmu pagpamuhunun sa kanya.”