Rut 2 - Hanunuu

Nakilala ni Rut si Buus

^1-3 Usa ka sirang, magkun si Rut sa kan Nuymi, “Pasnui duy aku atabug sa tanman hampay mansagraw manga uhay sa tanman tawu mamahintulut sa kangku.” Sinmagut si Nuymi, “Hu, anak.” Nakan naglakaw ngani si Rut namunpun manga uhay natayak manga manug-ani. Nitpung ati siya pag namunpun sa tanman ni Buus, kay katawuhan ni Ilimilik. Si Buus mayaman ag kilala pag tawu.

⁴ Pagka ati di waya si Rut rinmas-ug si Buus ginan sa Bitlihim ag kay kinamusta ti manga manug-ani, “Pagsa kanyu ti Panginuun!” Sinmagut ti manga manug-ani, “Papaladan kawu Panginuun!”

⁵ Pinaingana ni Buus kay piniyaran magpangasiwa sa kay manga manug-ani, “Si unu tunda pag daraga?”

⁶ Sinmagut kay piniyaran, “Usa duy siya ka Muabita kinmuyug sa kan Nuymi sa kay pagbalik ginan sa Muab.

⁷ Nagpakihampang siya sa kangku kuntay pahintuluti niku siya mamunpun manga uhay naragdag manga manug-ani. Ginan kis-ab surip parargu kay tarabahu tugka taynguna. Nagpahari lang siya ngalay sa payag.”

⁸ Magkun si Buus sa kan Rut, “Danga kawu mag-atag sa tuhay pag tanman hampay mamunpun manga uhay naragdag. Sitay yi lang kawu pagpunpun kaibahan sa manga suruguun niku babayi.

⁹ Bantayi nimu nu naan pag mag-ani kang manga tawuhan ag pagdasun kawu sa manga suruguun babayi. Sinabihan yi niku kang manga tawuhan kuntay danga kawu paglabuta. Nu kawu magkauwaw, pag-inum lang sa manga tapayan tinaasan niku manga tawuhan.”

¹⁰ Napayuk-ub si Rut sa kay atubangan ni Buus bilang paggalang magkun, “Hayga duy mabuut gid kawu sa kangku madi usa lang aku ka day-uhan?”

¹¹ Sinmagut si Buus, “May nagtultul sa kangku tungkul sa tanan nimu binwat sa kanmu manugang babayi ginan di waya kaybi sa pagkamatay nimu asawa. Tinayakan kunu nimu kanmu ama ag ina hanggan ti banwa nimu linusadan hampay mangulian kaibahan ti manga tawu unman nimu nakilala.

¹² Nakan papaladan mana kawu Panginuun dahil sa kanmu binwat. Mana laun pag pirimyu kanmu matanggap ginan sa Panginuun, ti Diyus Israil, kanmu darangpan.”

¹³ Magkun si Rut, “Mabuut duy kawu sa kangku. Pinabisug nimu kang naisipan. Binagawan aku nimu mayad una balaw aku usa sa kanmu suruguun.”

¹⁴ Pagka udas yi mangaun, magkun si Buus sa kan Rut, “Abala, pagbuul kawu karan-unun bag-u isugmaw nimu sa langgaw.” Nakan tinmukaw si Rut kaibahan ti manga manug-ani, tinunghulan siya ni Buus sinanglay pag butir. Nangaun siya tugka sa nabsug, ag may nasawad waya siya.

¹⁵ Pagka tinmindug yi si Rut hampay mamunpun maan manga naragdag, magbilin si Buus sa kay manga tawuhan, “Danga pagpakay-aha si Rut una mamunpun waya siya ginan sa may arani manga binugkus uhay.

¹⁶ Pagbuul kamu uhay sa manga binugkus bag-u tayaki sa kanya, danga siya pagsungyawa.”

¹⁷ Nakan namunpun si Rut manga naragdag uhay tugka sa maghugut marukirum. Pagka nagiuk yi niya kay natipun sibada, manga tunga yi gid saku inda.

¹⁸ Dinara niya inda pauli sa banwa ag ipinakakit sa kay manugang sa kan Nuymi. Bag-u binulwat niya kay sawad niya karan-unun ag ipinakaun sa kan Nuymi.

¹⁹ Namaingana si Nuymi sa kanya, “Naan kawu pag namunpun manga naragdag uhay kis-ab? Kantapu pag tanman? Papaladan mana tunda pag tawu mayad kay nalub-anan sa kanmu!” Itinultul ni Rut sa kan Nuymi kuntay ati siya pag namunpun sa tanman ni Buus.

²⁰ Magkun si Nuymi sa kan Rut, “Papaladan mana Panginuun si Buus. Ipinakakit niya kay kaayadan sa manga tawu buhi waya hanggan sa manga namatay yi.” Magkun waya siya, “Si Buus kanmu pagsabihun arani nita pag katawuhan; usa siya sa may katungkulan man-ngalaga sa kanta.”

²¹ Magkun si Rut sa kan Nuymi, “Magkun waya si Buus sa kangku sa kay manga tawuhan lang niya aku pagkuyug hampay mamunpun tugka sa matapus ti tanan aranyun niya.”

²² Magkun waydi si Nuymi sa kan Rut, “Anak, mayad ngani sa kay manga suruguun babayi kawu pag nanguyug, dahil barang unu waya ti mangyari sa kanmu nu sa iba tanman.”

²³ Nakan kinmuyug si Rut sa manga suruguun babayi ni Buus sa magpunpun manga naragdag uhay tugka sa matapus ti aranyun sibada hanggan tirigu. Ag parargu siya nangulian kaibahan kay manugang niya.