Ruma 7 - Hanunuu

Udyi sa Sirung Kasuguan

¹ Manga patar-ari, nakaalam yi waydi kamu tungkul sa batas, nakan ngani naintindihan niyu ti tawu nasakup batas hanggan sa udwaya mamatay siya.

² Halimbawa angay sa batas ti babayi sakup sa kay asawa hanggan sa udwaya mamatay ti lalaki. Dapat ay tunda pag lalaki nu namatay yi, udyi sakup ti babayi sa pagsabihun batas tungkul sa manga may asawa.

³ Kay ibug sabihun, nanguragin ti babayi nu magpaminsan sa iba lalaki madi buhi waya kay asawa. Dapat nu namatay yi kay asawa, ribri ti babayi sa pagsabihun batas. Nu mangasawa siya sa iba lalaki, bukun yi masabi siya nanguragin.

⁴ Katunda diman manga patar-ari, nu para sa Kasuguan ni Muysis kamu namatay yi dahil kamu nakapaminsan yi sa kay bilug ni Kiristu hampay kamu ribri yi sa Kasuguan ag makapaminsan waydi sa kan Kiristu sa kay pagkabuhi uman hampay magamit kita Diyus kay yi manga suruguun.

⁵ Kaybi kanta mag-ugali waya angay sa kanta daan pagkatawu. Pinulaw Kasuguan kanta makasalanan pag kagustuhan imaw ti nag-udyuk sa kanta hampay magamit kita kamatayan kay yi suruguun sa pagbuwat kadautan.

⁶ Dapat ay taynguna udyi sakup kita sa Kasuguan, dahil nu para sa Kasuguan imaw ti nakasakup sa kanta, kita tigbak yi napausa yi sa kan Kiristu kamatayan. Nakan kita magsirbi sa Diyus balaw angay sa un-an nisurat pag manga bilin dapat angay ngap sa bag-u buhi sa sirung kapangyarihan Ispiritu.

Ti Kasuguan ag ti Kasalanan

⁷ Kay ibug aw lugud sabihun kasalanan ti Kasuguan ni Muysis? Bukun duy katida. Dapat ay unman niku naintindihan waya nu hintay ti kasalanan nu unman ginan ngap sa Kasuguan. Nu abi ti Kasuguan unman may bilin magkun, “Danga kawu maghirak,” unman mana niku naintindihan nu hintay ti hirak.

⁸ Dapat dahil sa bilin, pinulaw kasalanan kang naisipan sa tanan kalasi hirak. Dahil nu unman may Kasuguan ga tigbak lang ti kasalanan.

⁹ Nu kabag-u di waya, nabuhi aku bukud sa Kasuguan. Dapat pagka naalaman niku ti bilin, nabuhi ngap ti kasalanan,

¹⁰ ag aku ngap ti namatay. Inda diman pag bilin ti magpakaun mana buhi dapat imaw ti nagpakaun ngap kamatayan sa kangku.

¹¹ Dahil ginamit kasalanan ti bilin agud aku dayaun ag sa katunda kay yi ngap minatay aku.

¹² Ti Kasuguan banal ag ti kada bilin banal, matadlung ag mayad.

¹³ Kay gustu aw sabihun ti Kasuguan madi mayad imaw aw ngap ti nagpakaun kamatayan sa kangku? Bukun duy katida. Ti kasalanan ngap ti nagmatay sa kangku sa panab-anan mayad pag Kasuguan hampay siti ginan pag ipakilala ti kasalanan kay kadaka pag kadautan.

May Maglalabanan sa Basad Naisipan

¹⁴ Alam yi nita, ti Kasuguan kay turunu tawu tagipusuun dapat ay aku nu sa kang lang sadili pagkatawu malumuy ag panawuhun kasalanan.

¹⁵ Unman magkaintindihan niku kang sadili buwat. Dahil ti gustu mana niku, unman ngap pagbuwatun niku. Bagkus ngap ti kang gid pagdayuun imaw ngap ti pagbuwatun niku.

¹⁶ Dapat ay nu pagbuwatun niku ti bukun gustu niku, pagpaangayan niku kuntay mayad ti Kasuguan.

¹⁷ Nakan bukun yi aku ti may buwat tunda, dapat kasalanan ti nangulian sa kangku imaw ti may buwat.

¹⁸ Alam diman niku unman may mayad nangulian sa kangku, kang ibug sabihun sa kang makasadili pag naisipan. Kaya niku mataw-an maggayak mayad, dayu lang mabwat niku kang gayak mayad.

¹⁹ Dahil unman pagbuwatun niku ti mayad pag ginayak niku. Dapat ti daut kang mana dinayu imaw ngap ti kang pagbuwatun.

²⁰ Nu pagbuwatun niku ti bukun kang gustu, balaw yi aku ti may buwat tunda nu unman ti kasalanan nangulian sa kangku imaw ngap ti may buwat.

²¹ Inda kang pagtandaan ti magpangyari, nu gustu niku magbuwat mayad, arani ngap sa kangku ti daut.

²² Sa basadan niku tagipusuun pagbayaun gid niku kay manga bilin Diyus.

²³ Dapat naungdan niku may tuhay pag magpangyari sa manga gamit niku bilug laban sa mayad pag kagustuhan niku naisipan. Nakan aku sinakup kapangyarihan kasalanan nangulian sa manga gamit niku bilug.

²⁴ Kaawaawa ungud kang kahamtangan. Si unu ti pumaribri sa kangku ginan sa kang bilug inda kay patabgan kamatayan?

²⁵ Diyus ngani ti pumaribri sa panab-anan nita Panginuun Hisu-Kiristu. Salamat gid ungud sa kanya. Nakan kainda kang kahamtangan. Nu sa kang naisipan magsirbi aku sa kay manga bilin Diyus, dapat nu sa kang sadili pagkatawu may kalumuyan, magsirbi aku sa kasalanan.