Ruma 6 - Hanunuu

Una Namatay sa Kasalanan dapat Nabuhi di maan sa kan Kiristu

¹ Taynguna hintay nguna kanta sabihun? Pumarargu aw nguna kita sa kasalanan hampay padakaun waydi Diyus kay pangaawa sa kanta?

² Unman duy. Kita tigbak yi gid sa kasalanan, nakan ngani udyi kailangan kita mag-ugali magkasala.

³ Unman aw lugud niyu naintindihan kuntay kita tanan ti itinulbaw sa kan Kiristu Hisus, ay nipausa sa kan Kiristu kamatayan?

⁴ Kay ibug sabihun, pagka kita itinulbaw, kita namatay, ilinbung kaibahan ni Kiristu hampay kita diman waydi mabuhi sa usa ka bag-u pag buhi, parihu sa kan Kiristu pagka binuhi siya uman sa panab-anan daka pag kapangyarihan Ama.

⁵ Dahil nu napausa yi kita sa kan Kiristu sa kamatayan parihu ga sa kay kamatayan niya, pihu mipausa kita sa kanya sa pagkabuhi uman parihu ga sa kay pagkabuhi uman niya.

⁶ Alam nita ti daan nita pagkatawu ipinaku sa kurus kaibahan ni Kiristu, hampay udyi may kapangyarihan kanta pagkatawu makasalanan ag sa udyi kita baliwun panawuhun kasalanan.

⁷ Dahil nu namatay ti tawu, pinaribri yi siya sa kapangyarihan kasalanan.

⁸ Magpaniwala kita kuntay pihu mabuhi kita kaibahan ni Kiristu nu kita namatay waydi kaibahan niya.

⁹ Alam gid nita si Kiristu binuhi uman ginan sa kamatayan ag udyi makaulit mamatay. Udyi ngani may kapangyarihan sa kanya ti kamatayan.

¹⁰ Pagka siya namatay kas-a lang, nanalu siya sa kapangyarihan kasalanan hanggan waya aban. Taynguna bay kay buhi niya para sa Diyus.

¹¹ Katunda diman kailangan kilalan-un niyu kanyu sadili tigbak yi sa kasalanan, dapat buhi ngap para sa Diyus dahil sa kanyu pakiusa sa kan Kiristu Hisus.

¹² Danga yi maghari ti kasalanan sa kanyu manga bilug may kamatayan hampay udyi kamu pilitun sumunud sa manga daut kagustuhan niyu naisipan.

¹³ Danga niyu ipasakup sa kapangyarihan kasalanan una naan pag bahagi bilug niyu para gamit sa kadautan. Bagkus ngap pasakup kamu sa Diyus. Kamu pag manga namatay yi ag binuhi uman, ipakaun niyu sa Diyus kanyu buu pagkatawu hampay gamit yi sa katadlungan.

¹⁴ Dahil udyi kailangan maghari sa kanyu ti kasalanan, kabay udyi kamu sakup sa Kasuguan, kamu sakup ngap sa kay pangaawa Diyus.

Manga Panawuhun Katadlungan

¹⁵ Taynguna bumuwat aw waya kita kasalanan dahil udyi kita sakup sa Kasuguan ag sakup yi kita sa kay pangaawa Diyus? Bukun duy katida.

¹⁶ Alam diman niyu nu kamu napasakup una sa kantapu bilang ga panawuhun, panawuhun yi ngap kamu niyu pinagkaamu, nu ngatay manga panawuhun yi kasalanan siyun ginan ti patabgan kamatayan. Aw ngatay panawuhun yi Diyus bag-u ti patabgan katadlungan ngani.

¹⁷ Dapat ay salamat sa Diyus, dahil kaybi kamu manga panawuhun kasalanan, taynguna bay masurundun yi kanyu tagipusuun sa iinadal pag katutuuhanan kanyu yi tinanggap.

¹⁸ Kamu pinaribri ginan sa kasalanan, taynguna panawuhun yi kamu katadlungan.

¹⁹ Maghampang aku angay lang sa ugali tawu hampay balaw makuri maintindihan niyu. Kaybi ipinasakup ngani niyu kanyu sadili sa kayagtingan ag sa kadautan hanggan di mag-amat. Taynguna kailangan ipasakup ngap niyu lubus kanyu sadili sa katadlungan hampay gamitun kamu Diyus.

²⁰ Pagka kamu panawuhun waya kasalanan, balaw kamu sakup sa katadlungan.

²¹ Hintay nguna pag masulung kanyu nakitan ati katpung? Tunda lang pag manga buwat kanyu pag-ikay-a taynguna, dahil kay patabgan ngani kamatayan.

²² Dapat taynguna kamu pinaribri yi ginan sa kasalanan, kamu manga panawuhun yi Diyus bag-u gamitun kamu Diyus sa kay turunu tungkul sa buhi unman may katapusan.

²³ Dahil kamatayan ngani ti isuhul sa kasalanan. Dapat kay pakaun Diyus imaw ti tutuu pag buhi unman may katapusan sa manga tawu napakiusa sa kanta Panginuun Kiristu Hisus.