Ruma 5 - Hanunuu

Tinanggap Kita Diyus kay yi Pagmahalun

¹ Nakilala yi ngani kita Diyus kuntay manga matadlung dahil sa kanta sarig sa kanta Panginuun Hisu-Kiristu. Nakan ginan diman sa kanta pagsarig sa kan Kiristu pinaunyun kita atag sa Diyus.

² Ginan diman sa kan Kiristu pag nakarubtan yi nita kay pangaawa Diyus kanta yi napunduhan. Lubus kita masulung sa kanta mag-asa miusa di kita aban sa Diyus sa kay kadayawan.

³ Bukun lang tunda. Magbaya yi ngap kita sa kanta manga pag-agwantahun, dahil magkaalaman diman nita nu kita may pag-agwantahun amat-amat kita magmatiniisun.

⁴ Ti matiniisun kay burak maan karig-unan. Ti karig-unun kay burak maan pag-asa.

⁵ Dayu kita mibuyu sa kanta pag-asa, dahil kay pagmahal Diyus ilinubus yi sa kanta manga tagipusuun sa panab-anan Ispiritu Banal, imaw ti ipinakaun Diyus sa kanta.

⁶ Dahil sa kay taning pag kaudasan, pagka unman kakayakaya waya kita, si Kiristu namatay hampay mabawi niya ti manga makasalanan.

⁷ Bihira gid may tawu pumakaun kay buhi hampay mabawi niya ti usa ka tawu matadlung. Dapat barang mangyari may tawu magpanghas magpakaun kay buhi hampay mabawi niya ti usa ka mayad pag tawu.

⁸ Dapat nagbuwat ti Diyus usa ka puruyba tungkul sa kay pagmahal sa kanta, pagka si Kiristu namatay para sa kanta, katpung kita makasalanan waya.

⁹ Taynguna kita kinilala Diyus kuntay manga matadlung ginan sa kan Kiristu dugu. Lalu waya pihu kita miribri ginan sa kay pangagalit Diyus sa panab-anan buhi ni Kiristu.

¹⁰ Kaybi di waya kita manga kalaban Diyus. Dapat ay taynguna kita pinaunyun niya atag sa kay sadili sa panab-anan pagkamatay niya Anak. Nakan ngani lalu gid kita iribri dahil buhi di si Kiristu.

¹¹ Bukun lang tunda. Magbaya kita dahil sa kanta pakiusa sa Diyus sa panab-anan nita Panginuun Hisu-Kiristu. Dahil ginan sa kanya pinaunyun kita Diyus atag sa kay sadili.

Si Adam ag si Kiristu

¹² Usa ka tawu ti pinun-an kasalanan sa kalibutan bag-u ti kasalanan pinun-an maan kamatayan. Siyun ginan ti kamatayan magkalakawan tanan pag manga tawu dahil nagkasala ti tanan tawu.

¹³ Dahil udwaya ipinakaun ti Kasuguan daan di sa kalibutan ti kasalanan. Dapat ay lang nu unman may Kasuguan unman may saragtun ti tawu tungkul sa kay kasalanan.

¹⁴ Madi katida, hinmari diman waydi ti kamatayan sa tanan manga tawu ginan sa kan Adam pag kaudasan hanggan tugka sa kan Muysis pag kaudasan, madi kanda kasalanan balaw parihu sa kan Adam naglabag sa kasuguan Diyus. Si Adam kay pinagkaaninu sa kay pagras-ug ni Kiristu.

¹⁵ Dapat ay balaw pararihu inda pag duwa, dahil kay mayad pag pakaun Diyus subra gid daka kay pinakamayad, balaw di ga kay kasalanan ni Adam. Madi kay kasalanan ni Adam dinmamay sa mayamu tawu tag sa kamatayan, subra man daka kay pangaawa Diyus hanggan kay ipinakaun pag kaayadan rinmas-ug sa kayamuan tawu sa panab-anan usa ka tawu, sa panab-anan ni Hisu-Kiristu ngani.

¹⁶ Ti pakaun Diyus pag kaayadan subra higit balaw parihu sa kay nangyari ginan sa kay kasalanan ni Adam. Kay kasalanan dinmamay sa kayamuan tawu atag sa sintinsiya. Dapat ay pagka duru ti kasalanan sa Diyus, rinmas-ug ti pakaun kaayadan imaw ngap ti pinun-an kapatawadan.

¹⁷ Ginan sa usa ka tawu, sa kan Adam, hinmari ti kamatayan dahil sa kay kasalanan. Dapat ay ginan diman sa usa ka tawu, sa kan Hisu-Kiristu, lalu gid subra ti nakarubtan manga tawu lubus kinaawaan Diyus, dahil nakilala yi sida Diyus kuntay manga matadlung. Humari sida ag may buhi sida sa panab-anan ni Kiristu Hisus. Inda pag papalad ginan sa kan Kiristu balaw parihu sa nangyari ginan sa tunda pag kasalanan.

¹⁸ Nakan ngani nu kabitay ti kasalanan usa ka tawu dinmamay sa tanan tawu tag sa kaparusahan, katunda diman kay buwat katadlungan usa ka tawu pinun-an kapatawadan hanggan buhi sa tanan tawu.

¹⁹ Dahil sa kay naglapastangan usa ka tawu, mayamu tawu ti binmaliw makasalanan. Katunda waydi mayamu tawu ti kinilala Diyus kuntay manga matadlung sa panab-anan masurundun ni Kiristu sa kagustuhan niya Ama.

²⁰ Ipinakaun ti Kasuguan hampay yumamu ti maglabag. Dapat nu nagyamu ti kasalanan, lalu man daka kay pangaawa Diyus.

²¹ Nakan nu hinmari ngani ti kasalanan sa panab-anan kamatayan, katunda diman humari ti pangaawa Diyus nu pagkilalan-un niya ti manga tawu kuntay manga matadlung, hampay karubtan nida ti buhi unman may katapusan sa panab-anan nita Panginuun Hisu-Kiristu.