Ruma 4 - Hanunuu

Binwat Halimbawa si Abraham

¹ Hintay nguna ti masabi nita tungkul sa kanta ginurang sa kan Abraham? Hintay nangus kay nalakawan niya?

² Nu abi siya kinilala Diyus kuntay matadlung dahil sa kay manga binwat, may ipadayaw-dayaw mana siya. Dapat balaw siya may ipadayaw-dayaw sa kay magbantay Diyus.

³ Dahil ngani pagsabihun sa Banal Kasuratan magkun, “Nagsarig sa Diyus si Abraham, nakan siya kinilala Diyus kuntay matadlung.”

⁴ Ti ipagpakaun sa manugtarabahu bukun magkasabi pakaun nu unman suhul yi ngap.

⁵ Dapat pagkilalan-un kita Diyus matadlung, una makasalanan kita balaw dahil sa kanta binwat mayad, nu unman dahil sa kanta pagsarig sa kanya.

⁶ Inda imaw yi ngani pagka sinabi ni Dabid kuntay papaladan Diyus ti tawu nu kinilala siya Diyus matadlung balaw dahil sa kay manga binwat mayad.

⁷ “Pinapaladan Diyus ti tawu nu kay paglaban ipinatawad yi niya, ag nu kay manga kasalanan natakluban yi.

⁸ Mapalad ti tawu nu kay manga kasalanan udyi pag-alalahanun Diyus.”

⁹ Inda pag manga papalad para lang aw sa manga tinuri pag manga Hudiyu? Bukun lang duy, inda hanggan diman para sa manga balaw tinuri, manga balaw Hudiyu. Pagsabihun kabay nita angay sa Banal Kasuratan magkun, “Pagkilalan-un Diyus si Abraham kuntay siya matadlung dahil sa kay pagsarig.”

¹⁰ Kapira inda pag nangyari? Kay aw udwaya tinuri aw ngatay tinuri dapu siya? Kay udwaya kabay tinuri, daan yi siya kinilala Diyus kuntay matadlung.

¹¹ Tinuri siya bilang pinagkatanda sa kay pagkilala Diyus sa kanya kuntay matadlung siya dahil sa kay pagsarig una udwaya siya tinuri. Nakan siya yi ti pinagkagurang tanan tawu magsarig sa Diyus. Siyun ginan sida kinilala waydi Diyus kuntay manga matadlung una manga balaw tinuri.

¹² Katunda diman si Abraham ti pinagkagurang manga tinuri bukun lang dahil sida tinuri nu unman dahil sida magsarig parihu sa kanta ginurang sa kan Abraham nagsarig una udwaya tinuri.

Ti Itinaratu Diyus Manahun Tawu nu Siya may Pagsarig

¹³ Itinaratu Diyus sa kan Abraham hanggan sa kay manga linahi manahun nida ti kalibutan, bukun dahil si Abraham nagtupad sa Kasuguan nu unman dahil sa kay pagsarig sa Diyus nakan siya kinilala Diyus kuntay matadlung.

¹⁴ Nu abi ti manga magtupad lang sa Kasuguan ti mumana sa kay itinaratu Diyus, unman may kabuluhan ti pagsarig tawu una hanggan ti taratu Diyus.

¹⁵ Ti Kasuguan imaw yi ti dahilan sa kay pagkagalit Diyus. Nu unman may Kasuguan, unman diman may malabag.

¹⁶ Nakan ngani ti taratu sigun sa pagsarig hampay ti pangaawa Diyus pihu kay itinaratu ipakaun sa kay linahi ni Abraham, balaw lang sa manga magtupad sa Kasuguan nu unman sa tanan manga magsarig sa Diyus parihu sa kan Abraham. Siya kabay kanta pinagkagurang nu angay sa pagsarig.

¹⁷ Kainda ti isinurat sa Banal Kasuratan magkun, “Binwat niku kawu ti pinagkagurang mayamu nasyun.” Sa atubangan Diyus si Abraham kanta ama, dahil sinarigan ni Abraham ti Diyus imaw tigpakaun buhi sa manga namatay, imaw diman ti naglalang sa tanan bagay.

¹⁸ Madi udyi may pag-asa si Abraham kuntay manganak waya dapat siya nagsarig di gid, siya di gid aban ti pinagkagurang mayamu nasyun angay sa kay sinabi Diyus sa kanya magkun, “Parihu sa pamgasan kay kayamu kanmu manga linahi aban.”

¹⁹ Ati katpung arani yi usa ka gatus timpu kay idad ni Abraham ag kay magbantay, tigbak yi kay bilug. Kay asawa si Sara unman paman mag-anak pag tawu. Madi katida unman naglumuy kay pagsarig ni Abraham.

²⁰ Unman siya nagtalinduwa sa kay taratu Diyus. Lalu ngap nagrig-un kay pagsarig ag dinayaw niya ti Diyus.

²¹ Lubus siya nagsarig tupadun di gid Diyus kay taratu.

²² Nakan ngani kinilala Diyus si Abraham kuntay siya matadlung dahil sa kay sarig.

²³ Dapat ay ti pagkumnun “pagkilalan-un Diyus kuntay matadlung” balaw para lang sa kan Abraham,

²⁴ nu unman para diman sa kanta. Kita diman kinilala Diyus kuntay manga matadlung dahil sa kanta magsarig sa kanya, sa binmuhi maan sa kanta Panginuun Hisus.

²⁵ Namatay si Hisus dahil sa kanta manga kasalanan, binuhi maan uman hampay kita mahimu kilalan-un Diyus kuntay manga matadlung.