Ruma 3 - Hanunuu

¹ Hintay ti mahalaga sa ngaran Hudiyu may sa balaw Hudiyu? Hintay kay pakinabang nu tinuri ti tawu?

² Daka gid duy. Un-an gid sa tanan, ti manga Hudiyu ti pinaintirgahan manga katutuuhanan bagaw Diyus.

³ Kabitay nu ti iba manga Hudiyu balaw yi matinupadun? Ibug aw lugud sabihun kanda balaw matinupadun ti nagrangga sa kay pagtupad Diyus?

⁴ Bukun ay sa katida. Ti Diyus sa katutuuhanan, una ti kada tawu pudilun, angay sa isinurat sa Kasuratan magkun tag sa Diyus, “Hampay kawu kilalan-un kuntay matadlung sa kanmu manga sinabi ag manalu kawu nu pihuun nida kawu sa daut sa mayad.”

⁵ Dapat nu kanta kadautan tigpakilala ngap sa kay katadlungan Diyus, unman aw lugud masabi nita ti Diyus salan kay sintinsiya nu kita pagparusahan niya? Katunda ngani ti tawu kay pamagawan.

⁶ Dapat bukun ay sa katida. Nu abi ti Diyus balaw matadlung, kabitay pag mapihu niya ti manga tawu taga kalibutan nu mayad nu daut?

⁷ Dapat nu abi ginan sa kang kapudilan lalu lumutaw ti katutuuhanan Diyus, dahil pag-ipakakit kay katupadan, matadlung aw nguna siya nu parusahan niya aku bilang ga usa ka makasalanan?

⁸ Hayga unman nita masabi magkun, “Pagbuwat yi lang kita daut hampay lalu miburayhaw ti kaayadan?” Magkun ti manga magpuya sa kangku, katunda kunu kang pag-itudlu. Parusahan sida aban Diyus, tunda yi ngani ti kailangan sa kanda.

Ud may Tawu Matadlung

⁹ Kabitay nguna tunda? Kita manga Hudiyu mayad man aw lugud kanta kahamtangan sa manga balaw Hudiyu? Bukun ay duy. Dahil kanmi pinatutuuhanan yi kuntay sinakup kapangyarihan kasalanan ti tanan manga tawu una Hudiyu una balaw Hudiyu.

¹⁰ Angay sa nisurat sa Kasuratan magkun, “Ud gid may matadlung, una di usa ka tawu.

¹¹ Unman may nakaintindi, ud may maghanap sa Diyus.

¹² Ti tanan nagsimray sa dalan, nagpakadaut yi. Unman may magbuwat mayad, una di usa.

¹³ Kanda tululnan parihu ga lulubngan nabukasan, dahil kanda manga bibig paggamitun sa magdaya. Kanda dila may dalit ga ulay udtu adlaw.

¹⁴ Kanda bibig marasuy-aw, masakit kanda pinamagawan.

¹⁵ Madali gid sida nu kanda turunu manlibun tawu.

¹⁶ Lunsay kadautan ag karukuan sa kanda uryan.

¹⁷ Unman nida alam ti dalan kahusayan.

¹⁸ Unman nida pagpakan-an rugar sa kanda tagipusuun ti magkadala sa Diyus.”

¹⁹ Alam yi nita una hintay ti pagsabihun sa Kasuguan, sinabi yi ngani sa manga napasakup sa Kasuguan, hampay una si unu pag tawu balaw yi may isingyanan ag ti tanan-tanan tawu may kapanagutan nu sa kaudasan sintinsiya Diyus.

²⁰ Nakan unman gid may tawu pagkilalan-un Diyus kuntay siya matadlung nu dahil lang sa kay pagtupad sa Kasuguan. Kabay ginan ngap sa Kasuguan pag makilala ti kasalanan.

Pagkilalan-un Diyus ti Tawu kuntay Siya Matadlung

²¹ Taynguna bay niburayhaw yi nu kabitay pagkilalan-un Diyus ti manga tawu kuntay sida manga matadlung bukud sa Kasuguan, ag balaw sa pagtupad nida sa Kasuguan ni Muysis. Pinatutuuhanan diman gid tunda sa manga ribru Kasuguan hanggan manga Purupita.

²² Una si unu pag tawu nu sumarig siya sa kan Hisu-Kiristu, pagkilalan-un siya Diyus kuntay matadlung, dahil lang sa kay magsarig sa kan Hisus, una manga Hudiyu una manga balaw Hudiyu.

²³ Nagkasala ti tanan tawu. Nakan unman gid karapat-dapat sa magbantay Diyus.

²⁴ Dahil sa pangaawa Diyus kinilala niya sida matadlung. Si Kiristu Hisus ti nagribri sa kanda.

²⁵ Si Hisus ngani ti ihinanda Diyus hampay ipakaun niya kay buhi ag hampay sa pagkabuhus niya dugu may kapatawadan ti manga tawu sa kanda manga kasalanan, nu sida magsarig sa kanya. Kay binwat Diyus tunda hampay ipakilala kay katadlungan. Dahil nu sa kaybi, pinakan-an niya rugar ti manga tawu, pinasinsiya niya kanda manga kasalanan.

²⁶ Dapat kainda, ihinandug yi Diyus kay buhi ni Kiristu hampay ipakakit siya matadlung. Dahil sa inda pag binwat Diyus, napatutuuhanan matadlung ngani siya una pag-itadlung niya ti manga magsarig kan Hisus.

²⁷ Hintay nangus kanta ipadayaw-dayaw? Unman duy may ipadayaw-dayaw kita. Hayga unman? Dahil lang aw nguna sa kanta nagtupad sa Kasuguan? Bukun ay, nu unman dahil sa kanta pagsarig sa kan Kiristu.

²⁸ Dahil naintindihan yi nita isip, ti tawu kinilala Diyus kuntay siya matadlung dahil sa kay sarig sa kan Kiristu, bukun dahil sa kay nagtupad sa Kasuguan.

²⁹ Ti Diyus lugud Diyus lang aw manga Hudiyu? Unman aw lugud siya Diyus diman manga balaw Hudiyu? Balaw unman, Diyus diman ngap siya manga balaw Hudiyu.

³⁰ Kabay usa-usa ti Diyus. Una ti manga Hudiyu una ti manga balaw Hudiyu, nu sida sumarig sa kan Kiristu, pagkilalan-un yi sida Diyus kuntay sida manga matadlung.

³¹ Nu katida ibug aw sabihun udyi pagpahalgaan nimi ti Kasuguan? Bukun sa katida. Kanmi di ngap pagpahalgaan.