Ruma 2 - Hanunuu

Kay Sintinsiya Diyus

¹ Nakan ngani una si unu kawu ti parapihu sa kasalanan manga iba, udyi ngap kawu may idahilan. Dahil sa kanmu magpihu sa manga iba, pagpihuun diman waydi nimu kanmu sadili kasalanan. Kawu magpihu sa kasalanan manga iba, dapat kumun diman waydi kanmu pagbuwatun.

² Alam diman nita kay sintinsiya Diyus balaw magsalan laban sa manga tawu magbuwat katida.

³ Kanmu aw isip makaiwas kawu sa sintinsiya Diyus nu pihuun nimu ti daut buruwatun manga iba, kanmu diman waydi pagbuwatun?

⁴ Aw ngatay barang udyi pagpahalgaan nimu ti Diyus dahil siya mayad gid ag maagwantahun ag matiniisun. Unman aw lugud alam nimu kay pagmahal Diyus sa kanmu tigpakaun rugar hampay umampu kawu sa kanmu kasalanan?

⁵ Dapat ay sa kaganitan nimu tagipusuun ud waydi mag-ampu sa kanmu kasalanan, pagpakadugangan nimu ti parusa kay ganti Diyus sa kanmu nu ipaburayhaw kay galit Diyus aban sa kaudasan niya matadlung pag sintinsiya.

⁶ Dahil ti Diyus gumanti sa tanan tawu angay sa kanda balus.

⁷ Ti manga iba magparargu sa magbuwat mayad dahil sa kanda maghingbut kadayawan, karangalan, hanggan sa unman may kamatayan. Sida pakan-an Diyus buhi unman may katapusan.

⁸ Dapat mahigpit pag galit kay ganti Diyus sa manga magbuwat kaguluhan, sa manga dayu magpaniwala sa katutuuhanan, bagkus naniwala di ngap sa kadautan.

⁹ Masyadu pag kakurian ti malakawan kada tawu magbuwat daut, ti manga Hudiyu dapu bag-u kumun diman ti manga balaw Hudiyu.

¹⁰ Dapat ti kada tawu nu magbuwat mayad tumanggap kadayawan, karangalan, hanggan kahusayan, ti manga Hudiyu dapu bag-u hanggan ti manga balaw Hudiyu.

¹¹ Dahil ti Diyus balaw may pag-apihun.

¹² Ti manga balaw Hudiyu unman sakup sa Kasuguan ni Muysis. Nu magbuwat sida kasalanan, ipadamhak sida dapat unman angay sa isinurat sa Kasuguan. Ti tanan manga Hudiyu manga nasakup sa Kasuguan. Nu sida magkasala, sintinsiyahan sida angay sa isinurat sa Kasuguan.

¹³ Dahil balaw ti manga magpatingi lang sa Kasuguan, nu unman ti manga magtupad sa Kasuguan imaw ti pagkilalan-un Diyus kuntay matadlung.

¹⁴ Ti manga balaw Hudiyu balaw nasakup sa Kasuguan. Nu bumuwat sida angay sa pagsabihun Kasuguan dahil lang sa kanda sadili buut naisipan, tunda ga Kasuguan yi ngap sa kanda.

¹⁵ Kanda yi buwat tigpakilala kuntay ti pagsabihun Kasuguan nisurat yi sa kanda manga tagipusuun. Pagpatutuuhanan diman inda nida naisipan, dahil nu kas-a ginan pagtamyawun sida nida naisipan ag nu kas-a ginan kanda diman sadili naisipan tigpatutuu kuntay unman nagbuwat kasalanan.

¹⁶ Angay sa Mayad pag Barita kang pag-itudlu, mangyari gid tunda nu sa kaudasan aban ti manga ilinihim manga tawu sa kanda tagipusuun pihuun Diyus nu daut nu mayad sa panab-anan ni Kiristu Hisus.

Ti Isinurat sa Kasuguan para sa manga Hudiyu

¹⁷ Dapat pagsabihun nimu kawu Hudiyu magpaniwala sa Kasuguan ni Muysis, kanmu pag-ipadayaw-dayaw kanmu pakiusa sa Diyus.

¹⁸ Alam nimu kay kagustuhan, nakilala diman nimu nu hintay ti mayad, dahil imaw ti itinudlu Kasuguan sa kanmu.

¹⁹ Kanmu isip kawu yi ngani ti manug-abat sa buta, tigrayaw sa manga tawu sa kadudulman,

²⁰ manugpaanyu sa manga unman madunung, manugtudlu diman sa manga anak, dahil kanmu isip ti Kasuguan yi ngani ti buu kadunungan hanggan katutuuhanan.

²¹ Magtudlu ngani kawu sa manga iba. Bati hayga unman pagtudluan nimu kanmu sadili? Magtudlu kawu magkun, “Danga magtakaw”, bati hayga kawu magtakaw?

²² Kanmu pagsabihun magkun, “Danga mag-uragin”, dapat bati kawu diman magpanguragin? Magkadaut kawu sa manga diyus-diyusan, bati kawu magsaka sa manga balay diyus-diyusan hampay manakaw?

²³ Magdayaw kawu sa Kasuguan, dapat sa kanmu maglabag sa Kasuguan unman ngap paggalangun nimu ti Diyus.

²⁴ Nakan ngani nisurat sa Kasuratan magkun, “Ti ngaran Diyus pagpuyaan manga balaw Hudiyu dahil sa kanyu.”

²⁵ Nu kawu napaturi mahalaga lang tunda nu tupadun nimu ti Kasuguan ni Muysis. Dapat nu paglabagun diman nimu ti Kasuguan, bilang ga unman diman kawu tinuri.

²⁶ Ti tawu unman tinuri nu magbuwat angay sa pagsabihun sa Kasuguan, unman aw siya parihu diman ga tinuri?

²⁷ Nakan ngani kamu ti manga tinuri sintinsiyahan aban manga balaw tinuri. Dahil sida magtupad sa Kasuguan, dapat kamu madi may isinurat Kasuguan ag manga tinuri kamu, maglabag diman ngap kamu sa tunda pag Kasuguan.

²⁸ Ti usa ka tawu balaw masabi tutuu Hudiyu, una paman Hudiyu kay manga gurang una waya tinuri siya.

²⁹ Ti tawu nu binag-u yi sa kay tagipusuun hanggan naisipan angay sa Ispiritu balaw lang angay sa nisurat pag Kasuguan, tunda yi ti tutuu Hudiyu. Balaw tawu nu unman Diyus ngap ti dumayaw sa kanya.