Ruma 16 - Hanunuu

Manga Kamusta

¹ Pag-ibilin niku sa kanyu kanta mahal pag patar-ari si Pibi. Siya usa ka manug-awat sa iglisya sa Sinkiriya.

² Tanggapun niyu siya dahil sakup siya sa Panginuun. Katunda diman kailangan matinanggapun ti manga nasakupan Diyus. Awatan niyu siya una sa unu pag kailangan niya dahil mayamu waydi patar-ari ti inawatan niya hanggan aku paman inawatan diman waydi niya.

³ Ipadakit niyu kang kamusta sa kanda ni Pirisila ni Akila, sa kang manga kaawat sa buruwatun sa kan Kiristu Hisus.

⁴ Apinasubu nida kanda sadili bilug sa madala hampay lang makaribri kangku pag buhi. Balaw lang aku tigpasalamat, hanggan ti manga iglisya balaw Hudiyu magpasalamat waydi.

⁵ Ipadakit diman niyu kang kamusta sa iglisya magtiripun sa balay nida ni Pirisila ni Akila. Ipadakit diman waydi niyu kang kamusta sa pagmahalun niku pag patar-ari sa kan Ipinitu. Siya ti un-an nagsarig sa kan Kiristu ati sa daga nasakupan Asya.

⁶ Ipadakit diman waydi sa kan Marya. Nagpakibudlay siya para sa kanyu.

⁷ Ipadakit waydi niyu kang kamusta sa kanda ni Anduruniku ni Hunya, manga kaparihu niku Hudiyu, manga kaibahan niku sa pirisuhan. Nakilala sida manga apustul yi waydi, un-an man sa kangku pag nagtanggap sida sa kan Kiristu.

⁸ Ipadakit waydi niyu kang kamusta sa kan Ampilyatu. Imaw kang pagmahalun pag patar-ari sa Panginuun,

⁹ hanggan sa kan Urbanu, imaw kanta kaawat sa buruwatun ni Kiristu, hanggan sa kang pagmahalun pag patar-ari sa kan Istakis.

¹⁰ Katunda diman sa kan Apilis, kilala waydi nita kay matinupadun sa kan Kiristu. Ipadakit waydi niyu kang kamusta sa kay magtal-anakan ni Aristubulu,

¹¹ sa kang kaparihu niku Hudiyu sa kan Hirudyun hanggan sa manga patar-ari sa Panginuun sa kay magtal-anakan ni Narsisu.

¹² Ipadakit niyu kang kamusta sa kanda ni Tiripina, ni Tiripusa, masipag sida sa buruwatun Panginuun. Katunda diman hanggan sa kan Pirsida, sa kang pagbayaun pag patar-ari. Mayamu kay binwat sa Panginuun.

¹³ Ipadakit waydi niyu kang kamusta sa kan Rupu, mayad gid ungud siya pag suruguun Panginuun, hanggan sa kay ina, ga kang diman ina.

¹⁴ Ipadakit diman niyu kang kamusta sa kanda ni Asinkiritu, ni Piligunti, ni Hirmis, ni Patrubas, ni Hirmas, hanggan sa manga patar-ari kay kaibahan nida,

¹⁵ hanggan sa kanda ni Pilulugu, ni Hulya, sa kan Niryu, hanggan sa kay patar-ari babayi. Katunda diman sa kan Ulimpas hanggan sa tanan nasakupan Diyus kaibahan nida.

¹⁶ Pagmalahalan kamu pagparaingan-an kamu magtar-ari sa kan Kiristu. Ti tanan manga iglisya ni Kiristu magpaingana nu kabitay nguna kamu asan.

Manga Dugang pag Bilin

¹⁷ Pagsabihun yi gid niku sa kanyu, manga patar-ari, tandai niyu ti manga tawu magbuwat karampihan ag ti manga mag-pasimray sa manga patar-ari tungkul sa kanda pagsarig sa kan Kiristu, paglabanan nida ti manga tudlu kanyu tinanggap. Amana niyu tunda pag manga tawu.

¹⁸ Ti katunda pag manga tawu unman magsirbi sa kan Kiristu sa kanta Panginuun, bagkus ngap pag-intindihun lang nida kanda sadili kailangan. Pagdayaun nida ti manga kurang sa kinaalman sa panab-anan marahusay ag mararinu nida pamagaw.

¹⁹ Nilantag yi ti barita tungkul sa kanyu magsunud sa kan Kiristu, nakan magbaya gid aku sa kanyu. Dapat kang gustu pagmadunung kamu tungkul sa mayad, danga pagbatia ti daut.

²⁰ Diyus di ti magpakaun kahusayan. Dayi dumugay taluhun yi lubus niya si Satanas ga ipauli lang sa sirung niyu raprapa. Pagsa kanyu ti papalad nita Panginuun Hisu-Kiristu.

²¹ Kang kaawat sa buruwatun si Timutiyu magpaingana nu kabitay kamu asan hanggan kang manga kaparihu Hudiyu sida ni Lusyu, ni Hasun, ni Susipatru magpaingana waydi.

²² Aku si Tirsiyu ti nagsurat kan Pablu bagaw. Magpaingana aku waydi sa kanyu sa ngaran Panginuun nu kabitay kamu asan.

²³ Hanggan si Gayu magpaingana waydi nu kabitay kamu asan. Kay balay ni Gayu kang pagdayunan. Sa inda diman pag balay pag magtiripun ti buu iglisya. Magpaingana waydi sa kanyu si Irastu ti kasuriru banwa. Hanggan kanta patar-ari si Kuwartu magpaingana waydi sa kanyu nu kabitay kamu asan. [

²⁴ Pagsa kanyu gid tanan ti papalad nita Panginuun Hisu-Kiristu. Amin.]

Pangatapusan pag Pagdayaw sa Panginuun

²⁵ Dayawun nita ti Diyus. Siya ti makaparig-un sa kanyu pagsarig angay sa Mayad pag Barita tungkul sa kan Hisu-Kiristu kang pag-itudlu sa kanyu. Maalaman diman waydi nita tunda sa katutuuhanan udwaya maburayhawan kaybi ginan sa sulud kadugayun pag timpu.

²⁶ Taynguna bay tunda pag katutuuhanan niburayhaw yi ngap sa Kasuratan manga Purupita. Bag-u ti Diyus ti unman may katapusan imaw ti nagpatigayun hampay ipakilala tunda pag katutuuhanan sa tanan manga nasyun tawu agud sida sumarig sa Diyus ag sumunud sa kanya.

²⁷ Usa-usa ka Diyus. Siya lang ti madunung sa tanan. Siya ti dapat nita dayawun hanggan waya aban sa panab-anan ni Hisu-Kiristu. Amin.