Ruma 14 - Hanunuu

Danga Pagsisiha Kanyu Patar-ari

¹ Tanggapa niyu ti malumuy kay pagsarig, danga niyu pagtamyawa kay manga tun-anun.

² May tawu magkaun una hintay pag karan-unun, unman may daut sa kay naisipan. Dapat ti malumuy kay pagsarig unman magkaun taguban.

³ Ti tawu magkaun una hintay pag karan-unun danga mag-away sa tawu unman magkaun taguban. Ti tawu unman magkaun taguban danga waydi pagpihua niya kuntay daut ti magkaun una hintay pag karan-unun, dahil sida duwa parihu tinanggap Diyus.

⁴ Hayga lugud kawu magpihu nu daut nu mayad ti manga suruguun iba tawu? Kay amu lang ti makasabi nu ngatay siya matinupadun aw ngatay unman. Pihu gid siya balaw dayuun dahil kay Panginuun ti may kapangyarihan magtudlu sa kay suruguun hampay magbuwat mayad.

⁵ May tawu magsabi may mahalaga pag sirang, may tawu waydi magsabi parihu lang ti tanan pag manga sirang. Pagpakarig-un ti kada usa sa kay naisipan nu naan ti mayad sa kanya tungkul sa siti.

⁶ Ti magpahalaga sa usa ka sirang nakan kay pagpahalagaan, dahil siya mag-alaala sa Panginuun. Ti magkaun una hintay pag karan-unun, mag-alaala diman sa Panginuun dahil magpasalamat diman siya sa Diyus. Tunda ngani ti unman magkaun manga iba kalasi karan-unun nakan katunda kay buwat pag-alaalahun diman niya ti Panginuun, magpasalamat diman sa Diyus.

⁷ Una sitapu sa kanta balaw mahimu nu sa kay lang sadili pag magkabuhi, unman diman waydi sa kanta may tawu mamatay sa kay sadili lang.

⁸ Nu kita buhi, kanta buhi para sa Panginuun. Ag nu kita mamatay, mamatay kita para diman waydi sa Panginuun. Nakan ngani sa buhi aw sa mamatay man, kita sakup sa Panginuun.

⁹ Ungud si Kiristu namatay bag-u nabuhi uman hampay siya yi ngani ti Panginuun una sa manga namatay una sa manga buhi di waya.

¹⁰ Kawu duy hayga pag-unuunuhun ngatay pagpihuun nimu ti daut ti mayad sa kanmu patar-ari? Kita tanan umatubang sa Diyus bag-u pihuun niya ti daut ti mayad sa kanta.

¹¹ Nisurat sa Banal Kasuratan magkun, “Aku, ti Panginuun buhi, pihu gid ti tanan tawu lumuhud sa kang atubangan ag dumayaw sa Diyus.”

¹² Nakan ngani ti kada usa sa kanta aban may kapanagutan sa Diyus.

Danga Paturnan Nimu Kanmu Patar-ari sa Talang

¹³ Danga yi pihua nita ti kada usa kay daut kay mayad. Bagkus ngap ialistu nita kanta pag-iisip sa danga kita magbuwat karadayaanun nita patar-ari tag sa kasalanan.

¹⁴ Angay sa kang magpakiusa sa Panginuun Hisus naintindihan niku pihu ud may turun-anun pag karan-unun. Dapat nu may tawu mag-isip kuntay may kalasi karan-unun pag-irangan, danga yi lang siya magkaun.

¹⁵ Nu sa kanmu pagkan-un pag karan-unun magkabyatan ti tagipusuun nimu patar-ari, unman yi angay sa pagmahal ti kanmu pagbuwatun tunda. Si Kiristu namatay para sa kanya, nakan ngani danga ipadamhak nimu siya ginan lang sa kanmu pagkan-un.

¹⁶ Una pag-isipun niyu balaw daut ti usa ka bagay, danga niyu pagbuwata nu puyaan kamu iba dahil siyun.

¹⁷ Dahil ti pagpasakup tawu sa kay paghari Diyus balaw labut sa kay pagkan-un, sa kay pag-inmun. Ti mahalaga lang nu ti tawu matadlung, nu magkarausa ag nu may kabayaan lunsay manga pakaun Ispiritu Banal.

¹⁸ Nu katunda kay magsirbi tawu sa kan Kiristu, pagbayaun siya Diyus ag paggalangun manga tawu.

¹⁹ Nakan hingabtun gid nita buwatun ti manga bagay makaparig-un sa kada usa.

²⁰ Ti tawu irinibri yi Diyus danga pagpadamhakan niyu dahil lang sa karan-unun. Ti tanan karan-unun mahimu kan-un tawu. Dapat ti daut lang nu magkasala ti usa ka tawu dahil sa karan-unun.

²¹ Mayad ti unman magkaun taguban, unman mag-inum makalangu, ag unman magbuwat una hintay nu karadayaanun nimu patar-ari tag sa kasalanan.

²² Kawu lang ag Diyus ti dapat makatau sa kanmu intindi tungkul siti. Masulung ti tawu nu pagbuwatun niya ti pag-isipun niya mayad bag-u nu unman pagtamyawun siya niya tagipusuun.

²³ Dapat ti tawu nu magkaun siya magkaduwa-duwa kay naisipan, siya makasalanan sa kay magbantay Diyus, dahil kay buwat balaw angay sa kay pagsarig nu unu ti mayad. Kasalanan ti magbuwat una hintay nu unman angay sa kay pagsarig nu unu ti mayad.