Ruma 12 - Hanunuu

Ti Ugali manga Magsarig sa kan Kiristu

¹ Nakan ngani manga patar-ari, alang-alang sa kay daka pangaawa Diyus sa kanta, inda kang paanyu gid mana sa kanyu, ipakaun niyu buhi waya kanyu sadili bilug sa Diyus hampay sakup sa kanya, imaw pag pakaun kay pagbayaun niya. Inda ti tutuu niyu pagsamba sa Diyus.

² Danga kamu magpaangay sa inda pag palakaw manga taga kalibutan. Danga magpaparihu kamu, pag bag-u yi kanyu naisipan agud maalaman niyu nu hintay ti kagustuhan Diyus, nu hintay ti mayad ag ti ikabaya niya ag udyi may kakurangan.

³ Angay sa kaayadan kay ipinakaun Diyus sa kangku, pagsabihun niku sa kada usa sa kanyu, danga niyu pagpahalagai subra kanyu sadili bilug, bagkus painu-inuha ngap niyu kanyu tutuu kahamtangan angay sa kay kadaka niyu pagsarig kay ipinakaun Diyus sa kada usa sa kanyu.

⁴ Ti buu bilug mayamu kay gamit may kanya-kanya katungkulan.

⁵ Katunda diman kita mayamu magkausa diman sa kabuuhan bilug ni Kiristu, ti kada usa may kabahagi tag sa manga iba.

⁶ May kanya-kanya pakaun ti Diyus sa kanta, angay sa kay pangaawa sa kanta. Nakan kailangan gamitun nita tunda pag manga pakaun. Nu kay ipinakaun Diyus sa kanta para manugpurupita, pagpurupita yi ngani kita angay sa kay kadaka pag sarig nita.

⁷ Nu kay ipinakaun Diyus sa kanta para manugsirbi sa kay buruwatun, pagsirbi yi kita. Pagtudlu yi nu kay tinanggap pag pakaun para manugtudlu.

⁸ Pagparig-un sa manga patar-ari ti pinakan-an para manugparig-un. Nu mag-ambag, danga may kabuyatan. Nu kawu magpinunu, ilubus nimu kanmu pagkapipunu. Nu mag-awat sa tawu may kakurian, pagmasulung kam naisipan sa kanmu mag-awat.

⁹ Pag-ungud yi gid kanyu pagmahal. Pagsuku yi kamu sa daut, mayada niyu ti kaayadan.

¹⁰ Pagmalahalan kamu ga suud magtar-ari. Nu kabitay ti manga iba kanda pagpahalaga sa kanyu, paglalu waya daka kanyu magpahalga sa kanda.

¹¹ Pagpakasipag kamu, pagsa karayawan Ispiritu Banal kanyu pagsirbi sa Panginuun.

¹² Pagbaya kamu dahil sa kanyu pag-asa. Pagmatugway kanyu naisipan una sa kakurian, ag pirmi pagdarangin.

¹³ Awati niyu ti manga pangailangan niyu manga patar-ari. Pagpirmi kamu alistu magtanggap sa manga dayuhan sa kanyu balay.

¹⁴ Idarangin niyu ti manga mag-unuunu sa kanyu hampay sida papaladan Diyus. Daranginan di niyu sida hampay balaw sida saadan Diyus.

¹⁵ Pagpakibagay kamu sa manga magbaya, pagpakibagay diman sa manga maglumi.

¹⁶ Pagkarausa kanyu nalub-anan. Danga kamu magpalabi-labi, bagkus ngap pagpakiusa kamu sa manga makuri kay kahamtangan. Danga pag-isipa niyu kanyu sadili kuntay kamu lang ti madunung.

¹⁷ Nu may magbuwat daut laban sa kanyu, danga pagbalusi daut. Pangungud kamu sa kanyu ugali mayad sa magbantay tanan tawu.

¹⁸ Hanggan tugka sa kanyu makaya pagpakiusa kamu kaayad sa tanan manga tawu.

¹⁹ Manga mayad patar-ari, danga kamu magbalus. Ipabahala niyu tunda sa Diyus. Dahil nakasurat sa Banal Kasuratan magkun, “Magkun ti Panginuun, aku ti bahala magganti, pihu gumanti aku.”

²⁰ Bagkus ngap, “Nu magkalun-us kanmu kalaban, pakan-a nimu. Nu magkauwaw painma nimu. Nu katunda mangay-a siya sa kay sadili.”

²¹ Danga kawu magpadaug sa daut. Bagkus ngap idaug nimu ti kaayadan sa kadautan.