Ruma 10 - Hanunuu

¹ Manga patar-ari, imaw diman kang pagpakaisip-isipun hanggan pag-idarangin sa Diyus hampay miribri kang manga kaparihu kanasyun.

² Mapatutuuhanan niku sida nanipag hampay pagbayaun mana sida Diyus, dapat nagsalan sida sa kanda pag-intindi.

³ Dahil unman naintindihan nida kay paraan Diyus hampay kay pagkilalan-un niya ti manga tawu kuntay manga matadlung. Unman nida sinunud ti paraan Diyus. Bagkus ngap nanipag sida sa kanda sadili paraan hampay pagkilalan-un sida Diyus kuntay manga matadlung.

⁴ Si Kiristu ti katugkaan Kasuguan ni Muysis. Nakan ngani una si unu ti sumarig sa kanya kilalan-un Diyus kuntay matadlung.

Ti Karibrihan para sa Tanan Tawu

⁵ Kainda kay sinurat ni Muysis tungkul sa kay pagkilala Diyus sa tawu kuntay matadlung nu sida magtupad sa Kasuguan. Magkun siya, “Ti tawu nu magtupad sa Kasuguan, may buhi siya sa panab-anan waydi Kasuguan.”

⁶ Dapat tungkul sa kay pagkilala Diyus sa tawu kuntay siya matadlung dahil sa kay pagsarig, kainda ti pagsabihun sa Banal Kasuratan magkun, “Danga isipa nimu sa kanmu sadili magkun, ‘Si unu ti makaatag sa langit?’ ” Nu katida bilang ga ipadugsun maan si Kiristu.

⁷ “ ‘Danga diman waydi nimu pagsabiha, si unu ti dumugsun tag sa kaabasad-basadan?’ ” Nu katida bilang ga bul-un si Kiristu ginan sa namatay.

⁸ Dapat inda kay pagsabihun magkun, “Arani yi sa kanmu ti bagaw Diyus, sa kanmu yi bibig ag sa kanmu tagipusuun.” Imaw yi ngani pag manga bagaw kanmi pag-itudlu tungkul sa pagsarig.

⁹ Nu itultul nimu magkun, “Si Hisus imaw ti Panginuun,” ag nu sumarig kawu buu tagipusuun siya binuhi uman Diyus ginan sa kamatayan, nu katunda miribri kawu.

¹⁰ Dahil ginan sa kanta tagipusuun kita pag magsarig sa Panginuun bag-u kita pagkilalan-un Diyus kuntay kita matadlung. Ag nu pag-itultul nita kanta pagsarig, miribri kita.

¹¹ Pagsabihun sa Banal Kasuratan, “Balaw mibuyu una si unu pag tawu nu sumarig sa kanya.”

¹² Balaw may nagtuhay ti kahamtangan una Hudiyu una balaw Hudiyu. Usa lang ti Panginuun tanan tawu. Siya tigpakaun kay manga kaayadan sa tanan manga magdangup sa kanya.

¹³ Dahil pagkumnun sa Banal Kasuratan, “Maribri ti kada tawu nu magdangup sa kay ngaran Panginuun.”

¹⁴ Dapat kabitay pag dumangup ti manga tawu sa kay ngaran Panginuun nu unman kanda pagsarigan siya? Kabitay sida pag sumarig nu unman waya sida may nadnugan barita tungkul sa kanya? Kabitay sida pag makadnug nu unman may magtudlu?

¹⁵ Kabitay pag makatudlu una si unu nu unman siya pagsuguun? Angay sa nisurat magkun, “Anung, pag mangarinu pag lulud ti magdara Mayad pag Barita.”

¹⁶ Dapat unman tanan nagsunud sa Mayad pag Barita. Kainda kay sabi ni Isayas magkun, “Panginuun, si unu ti naniwala sa kanmi sinabi?”

¹⁷ Ti tawu dayu waya sumarig nu unman nakadnug siya sa Mayad pag Barita. Makadnug lang ti tawu nu may manudlu tungkul sa kan Kiristu.

¹⁸ Dapat kang paingana, unman aw nguna sida nakadnug? Nakadnug yi waydi sida. Dahil magkun sa Banal Kasuratan, “Ras-ug yi sa tanan rugar kanda bagaw, kanda bagaw nilantag yi sa kalibutan.”

¹⁹ Inda waya kang paingana, unman aw nguna nakaintindi ti nasyun Israil? Kaybi waya nasagut yi tunda ni Muysis magkun, “Ti manga tawu balaw paman masabi kuntay usa ka nasyun imaw ngap ti gamitun niku aban hampay sida pumahirak sa kanyu. Gamitun niku ti usa ka nasyun tawu unman may kadunungan hampay paisugun nida kamu.”

²⁰ Itinapat yi gid ni Isayas kay pagsabihun magkun, “Magkun ti Panginuun, nakilala aku manga tawu madi unman maghanap sida sa kangku. Aku nagpakakit sa manga tawu madi unman magpaingana tungkul sa kangku.”

²¹ Dapat sinabi niya tungkul sa Israil magkun, “Ginan surip hanggan malambung aku magpakapatigagad sa usa ka nasyun tawu maganit kay ulu ag maglaban sa kangku.”