Ruma 1 - Hanunuu

¹ Ti may surat inda si Pablu kay panawuhun ni Kiristu Hisus. Kay pinili aku Diyus hampay kay apustul, kay gid ibinukud hampay manudlu sa kay Mayad pag Barita Diyus.

² Ti Mayad pag Barita inda kay itinaratu Diyus kaybi di waya ginan, itinultul niya manga Purupita bag-u isinurat sa Banal Kasuratan.

^3-4 Inda pag Mayad pag Barita tungkul ngani sa kay Anak, sa kan Hisu-Kiristu, kanta Panginuun. Nu angay sa kay pagkatawu si Hisus inanak ginan sa kay linahi ni Dabid. Dapat ay nu angay sa kay pagka-Diyus, ipinakilala siya yi ngap ti Anak Diyus may kamaskihan, pagka siya nabuhi uman ginan sa kamatayan.

⁵ Tinanggap nimi ginan sa kanya ti karampatan hampay kami apustul agud ti tanan nasyun butungun nimi sa pagsarig hanggan pagsunud sa kanya. Pagbuwatun nimi inda para sa kanya.

⁶ Kabilang diman waydi kamu sa manga nasyun kay pinili Diyus hampay kay magkaapu ni Hisu-Kiristu.

⁷ Inda kang surat tabug sa kanyu tanan sa manga pagmahalun Diyus asan sa banwa Ruma, kamu manga banal. Pagsa kanyu ti papalad hanggan ti kahusayan ginan sa kanta Diyus Ama hanggan ginan sa Panginuun Hisu-Kiristu.

Daka kay Gustu ni Pablu Mansabang sa Ruma

⁸ Una sa tanan, magpasalamat aku sa kang Diyus sa panab-anan ni Hisu-Kiristu dahil sa kanyu tanan, dahil ngani kanyu pagsarig sa kan Kiristu nibantug sa buu kalibutan.

⁹ Pirmi diman kamu kang pag-idarangin. Inda alam di gid Diyus imaw kang pagsirbihan buu niku tagipusuun sa kang magtudlu sa Mayad pag Barita tungkul sa kay Anak.

¹⁰ Pirmi maghagad aku rugar sa Diyus nu kagustuhan niya, pagkainda yi mana makaatag aku sa kanyu.

¹¹ Magdumdum yi gid aku magtagasampaki sa kanyu hampay maayawan niku kamu kaluub Ispiritu pag kaayadan sa ikarig-un niyu.

¹² Ti gustu mana niku sabihun, hampay mag-arawatan kita sa ikarig-un nita sa kada usa dahil sa kanta pagsarig sa Diyus, una kangku, una kanyu.

¹³ Manga patar-ari, gustu niku maalaman niyu, balaw di pira ka pag-ulit kang gayak asan tag diman sa kanyu, dapat hanggan taynguna tugka pag-amparahun waya aku. Kang gustu diman bumutung sa manga tawu asan hampay sida sumarig waydi sa kan Kiristu, parihu diman sa kang binwat sa manga iba balaw Hudiyu.

¹⁴ May kapanagutan aku magtudlu sa manga Giriyigu, sa manga Barbaru, sa madunung hanggan sa manga balaw madunung.

¹⁵ Nakan ngani masyadu yi gid gustu niku itultul ti Mayad pag Barita asan diman sa kanyu sa banwa Ruma.

Ti Mayad pag Barita may Kapangyarihan

¹⁶ Balaw gid niku pag-ikakay-a ti Mayad pag Barita, dahil imaw yi ti kapangyarihan Diyus sa ikaribri kada tawu nu sumarig, una sa tanan sa manga Hudiyu, bag-u hanggan sa manga balaw Hudiyu.

¹⁷ Dahil pagsabihun sa Mayad pag Barita nu kabitay pagkilalan-un Diyus ti tawu kuntay matadlung, tunda sa panab-anan lang pagsarig. Angay sa nisurat sa Banal Kasuratan magkun, “May buhi ti tawu pagkilalan-un Diyus kuntay matadlung dahil sa kay pagsarig sa Diyus.”

Makasalanan ti Tanan-tanan manga Tawu

¹⁸ Niburayhaw ti pangagalit Diyus ginan sa langit laban sa tanan kadautan manga tawu. Kanda magbuwat kadautan imaw ti mag-ampara sa kanda agud makilala ti katutuuhanan.

¹⁹ Dahil ti katutuuhanan tungkul sa Diyus malinaw sa kanda, ipinakilala yi Diyus tunda sa kanda.

²⁰ Kay unman may katapusan pag kamaskihan hanggan kay pagka-Diyus pag-ipakilala malinaw ginan sa manga bagay kay binwat niya ginan waya sa pagkalalang niya sa kalibutan. Nakan ngani unman yi sida may isingyanan.

²¹ Madi alam nida may imaw Diyus, unman nida pagdayawun ngatay pagpasalamatan. Bagkus ngap pinamintuhu nida ti manga bagay unman may kabuluhan, nadluman yi lang kanda naisipan unman makaintindi sa katutuuhanan.

²² Magpanaguabi sida kuntay madunung, dapat ay unman ngap may kabuluhan kanda kadunungan.

²³ Tinalikdan nida ti mamaski pag Diyus unman may kamatayan, kanda ngap pagsambahun ti manga ilinarawan pag manga tawu may kamatayan, manga manuk, manga hayup, manga iyay magyapang.

²⁴ Nakan ngani pinasibut-an waydi sida Diyus sa kanda mayagting pag kagustuhan naisipan, bag-u nagumun yi sida sa magbuwat mahalay sa usa kag sa usa.

²⁵ Dahil sa kanda nagpatlikud sa katutuuhanan tungkul sa Diyus, inadi ngap nida ti kapudilan. Sinambahan nida ti manga linalang Diyus ag kanda sinirbihan. Dinayu di ngap nida ti Diyus madi imaw ti naglalang. Siya ngap ti dapat nita pagdayawun hanggan aban. Amin.

²⁶ Nakan pinasibut-an sida Diyus sa mahalay pag kagustuhan nida naisipan. Una manga babayi nagdayu yi sa natural pag malahalan sa lalaki tag sa babayi bag-u kaparihu ngap babayi tigkaraibgan.

²⁷ Tinayakan diman manga lalaki ti natural pag malahalan sa lalaki tag sa babayi, inmamat ngap kanda mayagting pag kagustuhan naisipan sa usa kag sa usa. Magbuwat mahalay ti manga lalaki sa kay kaparihu lalaki. Nakan ngani ti kada usa sa kanda parusahan Diyus angay sa kanda buwat kasalanan.

²⁸ Unman inisip nida mahalaga ti pagkilala sa Diyus, nakan pinasibut-an sida Diyus sa kanda daut pag-iisip hampay balaw yi maangay kanda ugali.

²⁹ Nasakup yi sida tanan kalasi kadautan, kalukuhan, maramuun, daut pag naisipan. Punu sida kainggitan. Nag-ugali sida sa maglibun tawu, sa magtalaluhan, sa magdaya hanggan sa maglupig. Sida maglibak daut,

³⁰ magpamauyauya, magkadaut sa Diyus, udyi may painu-inu, palabi-labihun, parayabang, parapathaw sa kadautan, manga maglaban sa gurang,

³¹ manga unman may intindi, manga parahimudilun, udyi may awa, udyi sida may pasunaid sa kanda kaparihu.

³² Naalaman diman nida ti ibinilin Diyus magkun, kailangan matyun ti magbuwat katunda. Dapat ay magparargu di ngap sida sa pagbuwat daut. Magbaya waya sida nu maghiling sida sa manga iba magbuwat katunda waydi.