Pilipus 4 - Hanunuu

Pagbaya Kamu sa Panginuun

¹ Kamu, duy manga patar-ari, kang gid pagmayadun. Mag-ayup yi gid aku sa kanyu, masulung aku sa kanyu, kamu kang gid pinagkapirimyu. Nakan ngani pagpakarig-un gid kamu sa kanyu pakiusa sa Panginuun.

² Kang pagsabihan sida ni Iudyas ni Sintiki, pagkarausa kanda naisipan dahil sa kanda magpakiusa sa Panginuun.

³ Ag kawu duy usa ka mayad pag kaawat niku, kang pagsabihan diman kawu, awati nimu asan pag manga babayi hampay udyi sida mag-arawayan. Dahil manga masipag diman waydi sida kaibahan niku sa magpadakit Mayad pag Barita. Nagkarausa diman sida sa buruwatun tabug sa kan Kaluminti hanggan sa tanan niku pag manga kaibahan sa tarabahu. Kanda manga ngaran nisurat sa listahan pag ribru. Ati pag ilinista ti manga ngaran tawu pinakan-an buhi unman may katapusan.

⁴ Pagbaya kamu pirmi sa kanyu magpakiusa sa Panginuun, ulitun waya gid niku maan magkun, pagbaya kamu!

⁵ Kailangan pagmakilala gid tanan tawu kanyu kaalumanay. Udyi dugay aban rumas-ug yi ti Panginuun.

⁶ Danga kamu magkaarimputu sa una hintay pag bagay. Bagkus ngap pagdarangin kamu paghagad sa Diyus kanyu kailangan pag may pasalamat diman.

⁷ Balaw matabu nita masalman kay kahusayan Diyus. Imaw pag kahusayan ti makaingat sa kanyu tagipusuun hanggan sa kanyu naisipan sa kanyu pakiusa sa kan Kiristu Hisus.

⁸ Inda waya manga patar-ari, kang pagsabihun sa kanyu. Ilubus niyu kanyu naisipan sa una hintay pag manga kaayadan sa ikadayaw manga iba. Nakan ngani pag-ugali yi kanyu naisipan sa manga lunsay tutuu, sa manga pagbayaun manga tawu, sa mahal, sa balaw may ikasabi, sa maalumanay pag-iisip, sa manga pagmahalun manga iba.

⁹ Tupada niyu una hintay kang itinudlu ag ipinadakit sa kanyu. Sunda gid niyu ti kanyu nadnugan ag nakitan sa kangku. Nu katunda kamu, mangulian sa kanyu ti Diyus ti gimpuunan nita kahusayan.

Kay Pasalamat ni Pablu sa Ipinakaun manga Patar-ari

¹⁰ Angay sa kang magpakiusa sa Panginuun, aku tutuu gid magbaya dahil pagka nakalawuy dugay pag timpu, nakahimu maan kamu nakaawat sa kangku. Balaw kuntay inapasan niyu kanyu pasunaid sa kangku. Nakan lang unman may rugar kamu makaawat sa kangku.

¹¹ Balaw kang gustu sabihun kuntay aku may kailangan, dahil kang yi waydi naanadan una makuri kang kahamtangan.

¹² Nalakawan yi niku ti kakurangan, nalakawan yi waydi niku ti kaabundahan. Naanadan yi niku ti masulung pag naisipan una naan katpung aku, una kapira, una aku busug, una malun-us, una sa kaabundahan, una sa kakurangan.

¹³ Kaya niku mabuwat inda tanan dahil si Kiristu tigpabisug sa kangku.

¹⁴ Dapat ay mayad gid kanyu binwat, pagka inawatan niyu aku sa kang kakurian.

¹⁵ Naalaman diman niyu kuntay kamu lang pag taga Pilipus ti nakaabay sa kangku sa makuri kag sa maalwan, kang nighit ginan sa Masidunya sa kang kabag-u waya tudlu Mayad pag Barita sa kanyu.

¹⁶ Dahil pagka aku ati sa Tisalunika, ipinadara niyu tabug sa kangku balaw lang kas-a ginan kang garamitun.

¹⁷ Balaw kuntay sa may paghingbutun manga pakaun. Dapat ti mahalaga gid sa kangku nu yumamu waya kanyu manga mayad buwat hampay may matanggap waydi kamu pirimyu aban.

¹⁸ Kainda, may imaw aku tanan niku kailangan ag mag-abunda waya, dahil sa nakatanggap aku sa kan Ipapruditu manga bagay ginan sa kanyu. Kanyu awat ga usa ka mabanglu ag marinu pag handug ag pagbayaun Diyus.

¹⁹ Ginan sa kay kayamanan unman may katabwanan, ipakaun niya ti tanan niyu kailangan dahil sa kanyu gid magpakiusa sa kan Kiristu Hisus.

²⁰ Dayawun nita kanta Diyus Ama hanggan aban. Amin.

Manga Kamusta

²¹ Ipadakit niyu kang kamusta sa tanan manga nasakupan Diyus, sa manga magpakiusa sa kan Kiristu Hisus. Kang kaibahan sitay kanta manga patar-ari magpaingana sa kanyu, sa manga taga Pilipus nu kabitay waydi kamu asan.

²² Ti tanan manga pinili Diyus, lalu yi ti manga magtarabahu sa balay ni Pangulu Hari, magpaingana nu kabitay waydi kamu asan.

²³ Pagsa kanyu ti papalad nita Panginuun Hisu-Kiristu.