Pilipus 3 - Hanunuu

Pagkilalan-un Diyus ti Tawu kuntay Siya Matadlung

¹ Inda waya duy, manga patar-ari, kang mana sabihun sa kanyu, pagbaya kamu dahil sa kanyu pakiusa sa Panginuun. Una kas-a waya kang ulitun kang isinurat sitay, unman may makuri sa kangku. Dapat imaw ngap tigparig-un sa kanyu.

² Pag-aman kamu sa manga tawu magbuwat daut, kanda ugali ga idu. Amanan niyu tunda pag manga tawu imaw tig biyag sa bilug.

³ Kabay kita yi ngap ti tutuu manga tinuri. Dahil magsamba kita sa Diyus angay sa udyuk Ispiritu Banal. Magbaya kita sa kanta pakiusa sa kan Kiristu Hisus ag unman may pagsarigan kita sa kanta sadili bilug.

⁴ Nu sa ungud aku makasarig mana sa kang sadili pagkatawu. Nu ti iba mag-isip may sarigan sa kanda sadili pagkatawu, lalu gid aku masabi may pagsarigan sa kang sadili pagkatawu.

⁵ Pagka sa ikawalu pag sirang ginan sa pagkalusad niku, tinuri aku. Linahi aku ni Israil, minamat ni Binhamin, tutuu gid Hibriyu aku! Sa kang mag-ungud magtupad sa Kasuguan manga Hudiyu, Parisiyu aku.

⁶ Masyadu masipag aku nakan inunu-unu niku ti iglisya. Nu bay tungkul sa katadlungan ginan sa kang magtupad gid sa Kasuguan, unman may ikasabi.

⁷ Madi kaybi mahalaga sa kangku kang pagtupad sa Kasuguan manga Hudiyu, taynguna udyi ngap pagpahalagahan niku tunda, dahil pinili niku si Kiristu ti mayad.

⁸ Balaw lang kang pagtupad sa Kasuguan, hanggan ti tanan pag manga buruwatun kang sinipagan kaybi pag-isipun niku udyi gid ngap mahalaga sa kangku taynguna. Dahil ti pinakamahalaga sa kangku kang pagkilala hanggan kang pakiusa sa kan Kiristu Hisus sa kang Panginuun. Dahil sa kanya dinayu yi niku ti tanan pag manga bagay, ga paruk yi lang balaw yi pagpahalagahan niku hampay sa kangku yi si Kiristu, imaw ti tutuu gid mahalaga,

⁹ ag hampay aku lubus magpakiusa sa kanya. Udyi aku pagkilalan-un Diyus kuntay aku matadlung dahil lang sa kang magtupad sa Kasuguan ni Muysis. Pagkilalan-un aku Diyus kuntay matadlung dahil aku magsarig sa kan Kiristu. Inda pag katadlungan ginan ngani sa Diyus dahil sa kang pagsarig.

¹⁰ Kang gustu lang gid makilala si Kiristu, maungdan ti kamaskihan niya pagkabuhi uman ag masaydan niku kay kakurian ag miparihu aku sa kanya hanggan sa kay kamatayan.

¹¹ Nu katunda may pag-asa aku hampay aban buhiun aku Diyus ginan sa kamatayan.

Parargu sa Katugkaan

¹² Unman kuntay sa nakaaput yi aku ag unman waya aku kang-ud. Dapat lalu ngapu magparargu aku hampay maaput niku ti turunu kay ihinanda ni Kiristu para sa kangku, pagka aku kay binutung.

¹³ Manga patar-ari, unman pag-isipun niku kuntay aku nakaaput yi sa turunu. Dapat ay usa lang ka bagay kang pagbuwatun, balaw yi pag-isipun niku ti manga nalawyan yi. Lalu pagtuyuun niku ti turunu sa kang paratabgan.

¹⁴ Nakan magparargu aku sa katugkaan hampay tanggapun niku ti pirimyu, nu magtawag yi aban ti Diyus sa kangku ag butungun aku ni Kiristu Hisus tabug sa langit.

¹⁵ Katida diman waydi kailangan kita tanan kanta pag-iisip nu marig-un kita sa kanta pagsarig. Nu bay unman kainda kanyu pag-isipun, ipakilala diman waydi Diyus tida sa kanyu.

¹⁶ Pagparargu yi lang kita parihu ga kanta diman ugali.

¹⁷ Manga patar-ari, kamu tanan-tanan paghuwad sa kangku. Bantayan niyu ti manga magtupad sa kanmi mustara sa kanyu.

¹⁸ Pirmi kang sinabi sa kanyu ag maglumi aku sa kang tagipusuun sa kang magsabi maan sa kanyu kuntay mayamu tawu mag-ugali maglaban sa kamatayan ni Kiristu sa kurus.

¹⁹ Kanda aban ras-ugan sa kaparusahan sa impirnu, dahil kanda sadili kailangan imaw kanda pinagkadiyus. Ti kanda ikakay-a mana, imaw ngap ti pag-ipadayaw nida. Kanda paghingbutun ti manga bagay lang sitay sa babaw daga.

²⁰ Kita bay manga taga langit. Magpatigagad kita sa kanta Manugribri, sa Panginuun Hisu-Kiristu ginan sa langit.

²¹ Gamitun niya kay kamaskihan hampay kanta malumuy pag ginhawa bag-uhun niya agud pumarihu sa kay sadili bilug may kadayawan. Tunda pag kamaskihan imaw diman kay paggamitun hampay masakup niya ti tanan pag manga bagay tabug sa kay sadili.