Pilipus 2 - Hanunuu

Tanan Tawu Dumayaw sa Ngaran ni Kiristu

¹ Pagpabisugun ungud kamu dahil sa kanyu magpakiusa sa kan Kiristu. Kay pagmahal ni Kiristu tigparig-un sa kanyu naisipan. Magpakiusa waydi kamu sa Ispiritu Banal. Maawaun kamu ag magparasunaidan kamu sa usa kag sa usa.

² Nakan pagkarausa gid kamu sa kanyu naisipan katunda diman kanyu pagmahal sa usa kag sa usa. Pagkaraminsan kamu sa kanyu kagustuhan hanggan sa kanyu turunu hampay lubus yi aku magbaya dahil sa kanyu.

³ Danga makasadili lang kanyu turunu gayak, danga sa ikadayaw lang sa kanyu sadili. Bagkus ngap lubus pagparakumbabaan kamu sa usa kag sa usa, isipa niyu ti manga iba lalu mayad man sa kanyu sadili bilug.

⁴ Danga pag-intindiha lang niyu ti ikamayad niyu sadili. Bagkus ngap pag-arawatan gid kamu sa ikamayad sa kada usa.

⁵ Kailangan kanyu ugali naisipan pagga kan Kiristu Hisus waydi pag ugali naisipan.

⁶ Si Hisus daan diman Diyus, unman kailangan maghinaum magpaparihu sa Diyus.

⁷ Dapat tinalikdan dapu niya tunda tanan-tanan, pinili niya ti pagkapanawuhun, nagpaparihu sa manga tawu ag nakitan siya sa histuda tawu.

⁸ Pagka siya nabilug tawu, nagpakumbaba siya, masurundun siya hanggan tugka sa kamatayan. Sa kurus paman pag namatay.

⁹ Nakan ngani pinakan-an siya Diyus mataas gid sa tanan pag karampatan. Siya pinakan-an ngaran subra waya sa tanan pag ngaran.

¹⁰ Agud ti tanan linalang sa langit, una sa daga, una sa ulian manga namatay lumuhud ag dumayaw sa ngaran ni Hisus.

¹¹ Ipabantug nida tanan magkun, “Si Hisu-Kiristu ti Panginuun,” hampay lalu dayawun ti Diyus Ama.

Pagduag yi Parihu sa Sulu

¹² Nakan ngani manga patar-ari, kailangan pagmasurundun kamu, lalu taynguna aku unman asan sa kanyu. Paggalang yi gid kamu sa Diyus, pagparargu hanggan sa ud mamhan kanyu karibrihan.

¹³ Dahil Diyus ti magbuwat sa kanyu kagustuhan hanggan kakayahan hampay makatupad kamu sa kagustuhan niya.

¹⁴ Buwata niyu ti tanan pag manga bagay danga sa pilitan ag danga waydi sa barungbadu.

¹⁵ Sa kanyu manga kalibut may manga tawu unman mayad kay ugali ag daut kay pagbuwatun. Kailangan kamu pag manga anak Diyus ga mustara sa manga iba tawu malumpiyu kanyu ugali, unman may ikasabi sa kanyu. Nu katunda magduag yi kamu sa kanda karaw-an parihu ga manga pamgasan magrayaw sa langit.

¹⁶ Ag itultul niyu ti Mayad pag Barita hampay nu paniwalaan tawu siya may tutuu pag buhi. Nu katida kanyu buwat, kamu kang dayawun sa kaudasan pagbalik ni Kiristu ag pihu kang tarabahu balaw unman may kaganahan hanggan kang budlay balaw nauyang.

¹⁷ Nu abi aku matyun, kang dugu ibuhus ga ihandug sa Panginuun dungan sa kanyu pag-ipakaun kanyu pagsarig sa kanya. Una abi ti ikamatay niku katida, masulung di aku ag mirinsan kita tanan magbaya.

¹⁸ Katunda diman waydi pagmasulung kamu, pakan-an diman waydi niyu aku sa masulung.

Tungkul sa Kanda ni Timutiyu ni Ipapruditu

¹⁹ May pag-asa aku sa Panginuun Hisus hampay udyi dugay masugu niku si Timutiyu asan tag sa kanyu hampay aku balaw yi maruku sa kang naisipan nu mabaritaan niku kanyu kahamtangan asan.

²⁰ Si Timutiyu lang waydi ti parihu ga kangku kay naisipan magpasunaid sa kanyu kahamtangan.

²¹ Dahil ti pagsipagan manga iba kanda lang sadili pangailangan, unman tungkul sa kay buruwatun ni Hisu-Kiristu.

²² Dapat ay naalaman yi waydi niyu matinupadun si Timutiyu. Inawatan niya aku sa kang magtudlu Mayad pag Barita, parihu ga anak mag-awat sa kay ama.

²³ Nakan mana siya yi gid kang suguun madali asan tag, nu maalaman niku nu hintay ti mangyari sa kang kasu.

²⁴ Dapat may pag-asa aku sa Panginuun makaras-ug diman aku asan udyi waydi dugay.

²⁵ Dapat inisip niku pauliun sa kanyu kanta patar-ari si Ipapruditu. Parihu siya ga kangku manugtarabahu ag sundalu diman Diyus. Siya ti sinugu niyu hampay magdara kanyu pakaun ag rargu makaawat sa kangku sitay.

²⁶ Mag-ayup yi gid siya sa kanyu tanan. Tutuu yi gid pinung-aw siya pagka naalaman niya kuntay nabaritaan niyu siya may sakit.

²⁷ Tutuu ngani nasakit siya. Diit yi lang mamatay. Dapat kinaawaan siya Diyus. Balaw lang siya hanggan aku kinaawaan diman Panginuun hampay balaw manungbaw-tungbaw kang karukuan.

²⁸ Nakan ngani kang gid gustu pag-atag siya sa kanyu hampay nu makakit kamu sa kanya, makabaya maan kamu ag hampay mab-ul waydi kang karukuan.

²⁹ Kailangan tanggapun ngani niyu siya may daka pag kabayaan dahil magkarausa kamu sa kanyu pakiusa sa Panginuun. Ti katunda pag manga tawu kay buwat ga kanya kailangan pagpahalagaan gid niyu.

³⁰ Arani yi lang siya sa kamatayun, dahil unman inirangan niya kay budlay sa kay buruwatun kay tinanggap ginan sa kan Kiristu. Inawatan niya aku pinarargu niya kanyu iinawat sa kangku tugka sa kanyu makaya.