Pag-ighit 5 - Hanunuu

Nagpakihampang Sida ni Muysis ni Aarun sa Hari Ihiptu

¹ Nag-atag sida ni Muysis ni Aarun sa hari Ihiptu ag magkun, “Inda ti pagsabihun Panginuun, ti Diyus Israil: ‘Pasnui nimu umighit kang manga nasakupan hampay tupadun nida kanda pista ati sa pangawakawaan para sa kangku.’ ”

² Magkun ti hari Ihiptu, “Si unu tunda pag Panginuun hampay mamatingi aku sa kanya ag pasnuan umighit ti manga Israilita? Balaw aku magkilala sa tunda pag Panginuun, ag balaw niku paighitun ti manga Israilita.”

³ Sinmagut sida ni Muysis ni Aarun, “Napakakit sa kanmi ti Diyus manga Hibriyu. Nakan nu mahimu, pasnui nimu kami umighit tulu ka sirang atag sa pangawakawaan hampay makahandug kami sa Panginuun nimi Diyus. Nu unman kami makahandug, matyun niya kami sa panab-anan sakit ngatay gira.”

⁴ Dapat magkun ti hari Ihiptu, “Hayga paapasun niyu ti manga tawu sa kanda tarabahu? Balik yi kamu sa kanyu tarabahu!

⁵ Bantayi niyu, mayamu yi ngani kamu, gustu waya niyu paapasun sa pagtarabahu ti manga tawu.”

⁶ Tunda diman pag sirang, nagsugu ti hari Ihiptu sa manga Ihipsiyu ti manugpatigayun sa manga Israilita magtarabahu hanggan sa manga tagapatigayun Israilita. Magkun siya,

⁷ “Danga yi kamu magpakaun manga dayami garamitun sa pagbuwat manga daga pinaganit sa manga manugtarabahu, sida yi ti bahala paghanap.

⁸ Dapat kailangan kainda diman kay kayamu kanda mabuwat pag daga pinaganit. Manga bugyahin sida, imaw kay dahilan nakan magpakihampang paighitun niku sida hampay makahandug sa kanda Diyus.

⁹ Patarabahua waya ngap niyu sida hampay mabalag ag udyi may udas manpatingi sa manga kapudilan.”

¹⁰ Nakan inatihan nida ti manga Israilita ag sinabihan, “Nagsugu ti hari Ihiptu kuntay balaw yi nimi kamu pakan-an dayami.

¹¹ Kamu yi ti paghanap inda una naan, dapat katida diman kay kayamu kanyu mabuwat pag daga pinaganit.”

¹² Nakan nangalat ti manga Israilita sa buu Ihiptu magbuul dayami.

¹³ Pag-apurahun sida nida manga manugpatigayun magkun, “Kailangan katida diman kay kayamu kanyu mabuwat pag daga pinaganit kada sirang, parihu sa pagbuwatun niyu kaybi katpung pagpakan-an waya kamu dayami.”

¹⁴ Bag-u paggarutihun nida ti manga tagapatigayun Israilita ag pagpaingan-un, “Hayga unman niyu nabuwat kaaldaw hanggan taynguna ti daan bilang manga daga pinaganit pag-ipabuwat sa kanyu, parihu sa pagbuwatun niyu kaybi?”

¹⁵ Nakan nag-atag ti manga tagapatigayun Israilita sa hari Ihiptu ag nagriklamu, “Hayga katida kanyu pagbuwatun sa kanmi, sa kanmu manga manugsirbi?

¹⁶ Unman kami pagpakan-an dayami, dapat pagpilitun kami bumuwat katida diman kay kayamu pag daga pinaganit, bag-u paggarutihun waya kami. Kanmu tawuhan inda ti may salan!”

¹⁷ Magkun ti hari Ihiptu, “Bugyahin kamu! Imaw kay dahilan nu hayga magpakihampang kamu paighitun niku hampay makahandug sa kanyu Panginuun.

¹⁸ Pagbalik yi baga kamu sa kanyu manga tarabahu! Balaw kamu pakan-an dayami, dapat katida diman kay kayamu kanyu buwatun pag daga pinaganit.”

¹⁹ Dahil pag-ipilit hari Ihiptu pag-ipabuwat sa kanda ti mayamu pag daga pinaganit sirang-sirang, inisip manga tagapatigayun Israilita makurian gid sida.

²⁰ Pagkaginan nida sa hari Ihiptu, nakitan nida sida ni Muysis ni Aarun mag-alagad sa kanda.

²¹ Magkun sida sa kanda ni Muysis ag ni Aarun, “Parusahan mana kamu Panginuun. Dahil sa kanyu nangisug sa kanmi ti hari Ihiptu hanggan kay manga tawuhan. Kanyu binwat ti dahilan nida hampay kami kanda matyun.”

Ti Taratu Diyus Iribri ti manga Israilita

²² Binmalik si Muysis sa Panginuun ag nandarangin, “Panginuun, hayga duy pagpakurianan nimu kanmu nasakupan? Hayga waya aku ipinadara nimu tag sa kanda?

²³ Ginan sa sinabi niku sa hari Ihiptu kanmu binagaw, lalu ngap hinigpitan niya kanmu nasakupan, ag unman diman nimu sida irinibri.”