Pag-ighit 39 - Hanunuu

Ti manga Rutay manga Manug-asiwa

¹ Nantahi diman sida ni Bisalil marinu pag manga panrutayun para sa manga manughandug sa Banal pag Sulud-sulud angay sa pag-isugu Panginuun sa kan Muysis. Ti ginamit nida pag pisahan malatuy, dungun ag marara. Inda diman pag pisahan ti ginamit nida sa pagtahi banal pag rutay ni Aarun.

Ti Panulung manga Manug-asiwa

² Nantahi diman sida ipud. Ti ginamit nida pisahan linu binurdahan bunang malatuy, dungun ag marara.

³ Namuwat sida bunang gintu sa panab-anan pagpilpig sa gintu ag tinabas maranipis. Bag-u ibinurda nida inda sa pisahan linu, kaibahan ti bunang malatuy, dungun ag marara. Marinu gid kay nagburda inda.

⁴ May duwa ka bahagi inda pag rutay, kay dayu ag kay sarangwan, pagsugdungun duwa ka sinulapid sa labay.

⁵ Ti huragkus binwat diman sa linu binurdahan bunang kulay gintu, malatuy, dungun ag marara. Inda tanan binuwat nida angay sa isinugu Panginuun sa kan Muysis.

⁶ Ipinauli nida ti manga batu uniks sa gintu pag palaulian. Linahaban nida inda ngaran manga anak ni Hakub parihu sa kay pagkalahab sa panmarka.

⁷ Ipinauli nida inda sa manga sinulapid pag higut ipud bilang alaala pag manga batu para sa kay manga anak ni Israil. Inda tanan binuwat nida angay sa isinugu Panginuun sa kan Muysis.

Ti Bursa sa Dubdub

⁸ Namuwat diman sida bursa sa dubdub ag marinu gid kay pagkabuwat inda. Kay pisahan inda parihu diman sa pisahan ipud: linu binurdahan bunang kulay gintu, malatuy, dungun ag marara.

⁹ Ti bursa sa dubdub duwa ka tipluk kudradu — 1 ka dangaw kay aba ag 1 ka dangaw hanggan kay lapad.

¹⁰ Isinad-ang nida sitay ti upat ka hatay mahalaga pag manga batu. Sa un-an hatay nakapauli ti rubi, tupasyu, birilyu;

¹¹ sa ikadwa pag hatay, ismiralda, sapiru, ag diyamanti;

¹² sa ikatlu pag hatay, hasintu, agata, amatista;

¹³ sa ikap-at pag hatay, kirisulitu, uniks, haspi. Ipinauli nida inda sa gintu pag palaulian.

¹⁴ Ti kada batu may usa ka ngaran manga anak ni Hakub bilang pinagkabilug sa 12 ka lahi Israil. Kay naglahab pangaran parihu sa kay naglahab sa panmarka.

¹⁵ Pinaulian nida tarikada buwat sa lunsay pag gintu ti bursa sa dubdub.

¹⁶ Namuwat diman sida duwa ka gintu pag palaulian ag duwa ka talinga gintu pag isad-ang nida sa tungud manga suuk bursa sa dubdub.

¹⁷ Ipinasulung nida sa duwa ka talinga bursa sa dubdub ti duwa ka tarikada buwat sa gintu.

¹⁸ Ti duwa ka pudpud tarikada isinulung nida sa duwa ka palaulian gintu maulian sa sinulapid higut ipud.

¹⁹ Namuwat diman sida duwa waya ka talinga gintu ag itinakud sa sirung suuk bursa sa dubdub, mauniban sa ipud.

²⁰ Namuwat waya sida duwa ka talinga gintu ag isinulung nida inda sa ipud baliwa sa may huragkus.

²¹ Bag-u hinigtan nida malatuy pag higut kay sirung manga talinga bursa sa dubdub hanggan ti manga talinga ipud. Sa panab-anan inda, miunib mayad ti bursa sa ipud. Inda tanan binuwat nida angay sa isinugu Panginuun sa kan Muysis.

Ti Tuhay waya pag Panulungun Rutay manga Manug-asiwa

²² Nanahi diman sida rutay panluwas manga manughandug. Inda pag rutay magkauniban ipud. Pisahan lunsay malatuy kanda ginamit pantahi sa rutay panluwas.

²³ Inda pag rutay liniugan may tipluk sangput liug agud balaw magisi.

²⁴ Pinaulian nida pamarinu histuda burak kayu pumigranata ti sangput paraway rutay binwat sa linu binurdahan bunang malatuy, dungun ag marara.

^25-26 Pinaulian nida manga gintu gurung-gurung ti paraway rutay sa tab-anan pamarinu histuda pumigranata. Inda pag rutay ti isulung ni Aarun nu magsirbi yi siya sa Panginuun. Inda tanan binuwat nida angay sa isinugu Panginuun sa kan Muysis.

²⁷ Namuwat diman sida pansulud pag rutay para sa kan Aarun hanggan sa kay manga anak lalaki. Linu kanda ginamit pag pisahan.

²⁸ Kainda diman pag pisahan ti ginamit nida sa pagbuwat pantaung, manga kalu, ag pansulud pag rutay.

²⁹ Ti manga huragkus binwat diman sa linu binurdahan bunang malatuy, dungun ag marara. Ag marinu gid kay nagburda inda. Inda tanan binuwat nida angay sa isinugu Panginuun sa kan Muysis.

³⁰ Namuwat sida banal pag midalya lunsay gintu ag iriniruk nida inda pag bagaw, “Ipinablag para sa Panginuun!” parihu kay naglahab sa panmarka.

³¹ Isinab-it nida inda sa atubangan pantaung ni Aarun sa panab-anan malatuy pag panhigut. Inda tanan binuwat nida angay sa isinugu Panginuun sa kan Muysis.

Inusisa ni Muysis ti Natapus pag Buruwatun

³² Natapus ti tanan buruwatun sa Turda Tiripnan pag-ingarnan diman Turda Taragbuan. Binuwat manga Israilita ti tanan isinugu Panginuun sa kan Muysis.

³³ Ipinakakit nida sa kan Muysis ti Turda Tiripnan hanggan ti tanan kagamitan siyun: ti manga kaw-it, manga kamhanan, manga pangagad, manga tulduk, manga paratukawan;

³⁴ ti panaklub buwat sa lukub lalaki karanidu tinagum marara, ti panaklub buwat sa marinu pag kalasi lukub, ti manga limbun;

³⁵ ti Kaban Kasunduan, hanggan kay yayungan ag kay taklub, imaw ti Ulian Pangaawa;

³⁶ ti lamisa hanggan ti tanan kagamitan siyun; ti tinapay handug sa atubangan Diyus;

³⁷ ti palaulian sulu lunsay gintu ag ti manga mahatayan sulu ag kay kagamitan siyun; ti lana para sa sulu;

³⁸ ti gintu pag harandugan; ti lana ulibu pamayid; ti mabanglu pag kamangyan; ti limbun sa sabian Turda;

³⁹ ti galang pag harandugan hanggan ti inalawat galang; ti pamas-an ag ti tanan kagamitan siyun; ti palanggana hanggan kay turungbawan;

⁴⁰ ti manga limbun sa sangput sugkadan, ti manga tulduk hanggan kay manga paratukawan; ti limbun sa sabian sugkadan; ti manga higut ag manga patuk para sa limbun sugkadan; ti tanan kagamitan Turda Tiripnan, pag-ingarnan diman Turda Taragbuan;

⁴¹ hanggan ti marinu ag banal pag manga rutay pansulung ni Aarun hanggan niya manga anak nu magsirbi yi sida bilang manga manughandug sa Banal pag Sulud-sulud.

⁴² Binuwat manga Israilita ti tanan kailangan buwatun angay sa isinugu Panginuun sa kan Muysis.

⁴³ Binantayan ni Muysis kanda tarabahu, ag nakitan niya binuwat nida tunda tanan angay sa isinugu Panginuun. Nakan pinapaladan sida ni Muysis.