Pag-ighit 38 - Hanunuu

Ti Pagbuwat Harandugan Pagsunugan Panagda

¹ Namuwat diman siya kudradu pag harandugan handug pagsunugun. Ti ginamit niya kayu akasya. 5 ka luk-an siku kay aba, 5 ka luk-an siku kay lapad, ag 3 ka luk-an siku kay abwat.

² Pinaulian niya inda ga manga sungay sa upat ka suuk, kinamhan kaibahan harandugan pagka inda binwat. Sinaput niya galang ti harandugan.

³ Ti tanan kagamitan harandugan binuwat diman sa galang — ti manga palaulian dapug, ti manga pala, ti manga malukung, ti lalaun pag panubuk para sa taguban, ag ti manga palaulian baga.

⁴ Namuwat diman siya inalawat galang para sa harandugan, ipinaslud niya inda sa sulud harandugan ag ipinauli baliwa sa karaw-an.

⁵ Namuwat diman siya upat ka talinga galang ipinauli inda sa upat ka suuk inalawat galang. Inda pag manga talinga parasulungan yayungan pamas-an sa harandugan.

⁶ Ti manga yayungan binwat sa kayu akasya ag sinaput galang.

⁷ Isinulung niya ti manga yayungan sa talinga harandugan agud mapas-an. Tabla ti binuwat niya harandugan may ukang sa sulud.

Ti Pagbuwat Palanggana Urugasan

⁸ Bag-u namuwat siya galang palanggana hanggan kay turungbawan inda human diman sa galang. Ti manga galang ginamit siyun ginan sa galang salamin manga babayi magsirbi sa sabian Turda Tiripnan.

Ti Pagbuwat Sugkadan Turda Tiripnan

⁹ Pinaulian niya sugkadan ti Turda Tiripnan, pinasangputan inda manga limbun pisahan linu. Ti aba limbun baliwa sa salatan 100 ka luk-an siku.

¹⁰ Isinad-ang niya ti limbun sa 20 ka tulduk galang nakasul-ud diman sa 20 ka paratukawan galang. Ti sinad-angan limbun imaw ti manga kaw-it pilak nakasad-ang sa manga bantuyan pilak sa manga tulduk.

¹¹ Ti limbun baliwa sa kanaway 100 ka luk-an siku diman kay aba ag nakasad-ang inda sa 20 ka tulduk galang nakasul-ud diman sa 20 ka paratukawan galang. Ti pagsad-angan limbun imaw ti manga kaw-it pilak nakasad-ang sa manga bantuyan pilak sa manga tulduk.

¹² Ti limbun baliwa sa isalpan 50 ka luk-an siku kay aba, nakasad-ang inda sa 10 ka tulduk nakasul-ud diman sa 10 ka paratukawan. Ti sinad-angan limbun imaw ti manga kaw-it pilak nakasad-ang sa manga bantuyan pilak sa manga tulduk.

¹³ Ti atubangan baliwa sa butlakan 50 ka luk-an siku kay aba.

¹⁴ May sabian inda may limbun baliw-baliw giriw. Ti limbun sa sikun 15 ka luk-an siku may tunga kay aba, nakasad-ang inda sa tulu ka tulduk nakasul-ud sa tulu diman ka paratukawan.

¹⁵ Ti limbun sa wala baliwa 15 ka luk-an siku kay aba, nakasad-ang diman inda sa tulu ka tulduk nakasul-ud sa tulu diman ka paratukawan.

¹⁶ Ti tanan limbun sa sangput sugkadan binwat sa pisahan linu.

¹⁷ Galang ti paratukawan manga tulduk, pilak diman ti manga kaw-it ag manga bantuyan inda. Ti manga ulu tulduk nasaputan pilak. Ti tanan tulduk sa kay sangput sugkadan may bantuyan pilak.

¹⁸ Ti limbun sa sabian sugkadan binwat sa pisahan linu binurdahan bunang malatuy, dungun ag marara. Ag marinu gid kay nagburda inda. Kay aba inda 20 ka luk-an siku, 5 ka luk-an siku kay abwat, parihu kay abwat manga limbun nakasangput sa sugkadan.

¹⁹ Inda pag limbun nakasad-ang sa upat ka tulduk nakasul-ud waydi sa upat ka paratukawan. Pilak ti manga kaw-it hanggan manga bantuyan manga tulduk, ag kay ulu inda sinaput pilak.

²⁰ Lunsay galang ti tanan patuk sa Turda hanggan ti tanan patuk manga limbun sa sangput.

Ti manga Kalap Ginamit sa Pagpatindug Turda

²¹ Inda ti manga kalap ginamit sa pagpatindug Turda Tiripnan, nu naan nakapauli ti malapad pag batu sinuratan sampulu ka sugu Diyus. Ilinista manga Libita ti manga kalap angay sa sugu ni Muysis. Inda pag buruwatun pagdumarahan ni Itamar kay anak ni Aarun manughandug.

²² Ti nandumara sa pagpatindug Turda Tiripnan si Bisalil kay anak ni Uri sa kan Hur laki, ginan sa lahi ni Huda. Binuwat niya ti tanan isinugu Panginuun sa kan Muysis.

²³ Kaawat niya si Ahulyab kay anak ni Ahisamak, ginan sa lahi ni Dan. Madunung gid siya magtarabahu, magkurti, ag magburda sa pisahan linu bunang malatuy, dungun ag marara.

²⁴ Ti kabuuhan buyat gintu ipinakaun hampay gamitun sa pagbuwat Turda 1,000 ka kilu angay sa surukatan paggamitun manga manughandug.

^25-26 Ti kabuuhan buyat pilak natipun 3,520 ka kilu angay sa surukatan paggamitun manga manughandug. Ginan inda sa manga tawu ilinista sa sinsus. Namakaun ti kada usa sa kanda unum ka guhit pilak angay sa surukatan paggamitun manga manughandug. May 603,550 tawu may idad 20 paabwat ti ilinista sa pagsinsus.

²⁷ Ti 3,500 ka kilu pilak ginamit sa pagbuwat 100 paratukawan Turda hanggan manga limbun. 35 ka kilu sa kada paratukawan.

²⁸ Ti nasawad 20 ka kilu pilak binuwat kaw-it ag bantuyan manga tulduk, ag isinaput sa ulu manga tulduk.

²⁹ Ti buyat galang ihinandug sa Panginuun manga 2,500 ka kilu.

³⁰ Ginamit inda sa pagbuwat manga paratukawan manga tulduk sa sangput sugkadan hanggan sa kay sabian Turda Tiripnan. Kay iba siyun ginamit sa pagbuwat harandugan galang hanggan kay alawat, ag sa tanan kagamitan sa harandugan.

³¹ Ginamit diman ti manga galang sa pagbuwat manga paratukawan manga tulduk sa sangput sugkadan hanggan sa kay sabian, ag sa pagbuwat tanan patuk sa manga higut Turda hanggan patuk manga limbun sa kay sangput.