Pag-ighit 37 - Hanunuu

Ti Pagbuwat Kaban Kasunduan

¹ Binwat ni Bisalil ti Kaban Kasunduan. Kayu akasya kay ginamit — 2 ka luk-an siku may tunga kay aba Kaban, 1 ka luk-an siku may tunga kay lapad ag 1 ka luk-an siku kay abwat inda.

² Sinaput inda lunsay gintu sa sulud hanggan sa luwas, ag pinaulian hinulma gintu kay manga giriw inda.

³ Binuwatan diman niya inda upat ka talinga gintu ag isinad-ang sa upat ka tulduk Kaban.

⁴ Bag-u namuwat siya yayungan akasya sinaputan gintu.

⁵ Ipinasulung niya ti manga yayungan sa manga talinga sa kada saruy Kaban agud mayayung ti Kaban.

⁶ Binuwatan diman niya taklub ti Kaban (ti Ulian Pangaawa) lunsay gintu. May 2 ka luk-an siku may tunga kay aba ag 1 ka luk-an siku may tunga kay lapad.

^7-8 Namuwat diman siya duwa ka gintu kirubin sa kada pudpud taklub Kaban.

⁹ Mabukladan kay manga pakpak manga kirubin sa tungud taklub, ti Ulian Pangaawa, hampay mahamuyan inda nida. Mag-aratubangan ti duwa ka kirubin magbantay sa taklub.

Ti Pagbuwat Lamisa Burugtangan Tinapay

¹⁰ Namuwat diman siya lamisa akasya 2 ka luk-an siku kay aba, 1 ka luk-an siku kay lapad, ag 1 ka luk-an siku may tunga kay abwat.

¹¹ Sinaput inda lunsay gintu ag pinaulian hinulma gintu kay manga giriw.

¹² Pinaulian niya sanipa ti kada giriw, manga upat ka purgada kay lapad ag pinaulian diman niya hinulma gintu ti sanipa.

¹³ Bag-u nagbuwat siya upat ka talinga gintu ag isinad-ang inda sa upat ka lulud lamisa,

¹⁴ arani sa sanipa. Siyun pag-isinulung ti manga yayungan pamas-an sa lamisa.

¹⁵ Human sa akasya ti manga yayungan ag sinaputan gintu.

¹⁶ Namuwat diman siya manga garamitun lunsay gintu para sa lamisa: manga taya, manga ungut, manga malukung, ag manga banga garamitun para sa handug irinmun.

Ti Pagbuwat Palaulian Sulu

¹⁷ Namuwat diman siya palaulian sulu lunsay gintu kay lulud, kay bilug, hanggan kay pamarinu histuda busang kayu kay iba um-um di waya ag ti iba waydi mabukladan yi. Ti pamarinu kinamhan kaibahan kay bilug palaulian sulu pagka inda binwat.

¹⁸ Ti palaulian sulu unum ka sanga, tigutlu sa kada giriw.

¹⁹ Ti kada sanga may tulu ka pamarinu busang kayu kay histuda ga almindru, kay iba um-um waya kay iba mabukladan yi.

²⁰ Ti bilug palaulian sulu may upat diman ka pamarinu busang kayu kay histuda ga almindru, kay iba um-um waya kay iba waydi mabukladan yi.

²¹ May histuda busang kayu sa sirung kada magtimbangan sanga.

²² Ti manga pamarinu hanggan ti manga sanga kinamhan kaibahan sa pagbuwat kay bilug palaulian sulu.

²³ Namuwat diman siya pitu ka sulu, manga pangilpit, manga panalud sa ayum mitsa. Lunsay gintu tanan inda.

²⁴ Manga 35 ka kilu lunsay gintu ti nagamit sa pagbuwat palaulian sulu hanggan ti tanan kagamitan siyun.

Ti Pagbuwat Harandugan Pagsunugan Kamangyan

²⁵ Namuwat diman siya harandugan akasya surunugan kamangyan. Kudradu inda, 1 ka luk-an siku kay aba, 1 ka luk-an siku kay lapad, ag 2 ka luk-an siku kay abwat. May ga sungay inda sa manga suuk kinamhan kaibahan harandugan pagka inda binuwat.

²⁶ Sinaput niya lunsay gintu kay babaw, kay upat ka giriw, hanggan kay manga sungay sa kada suuk, bag-u hinulmahan gintu kay sangput.

²⁷ Pinaulian niya duwa ka talinga gintu kay sirung hinulma gintu baliw-baliw giriw harandugan, hampay pasulungan siyun manga yayungan paras-anan.

²⁸ Ti yayungan binwat sa kayu akasya ag sinaput inda gintu.

²⁹ Namuwat diman siya banal pag lana pamayid hanggan lunsay kamangyan mabanglu gid.