Pag-ighit 36 - Hanunuu

¹ “Sida ni Bisalil, ni Ahulyab hanggan ti iba waya pinakan-an Panginuun kadunungan ag kakayahan sa tuhay-tuhay pag buruwatun imaw ti mamuwat banal pag Turda Tiripnan angay sa sugu Panginuun.”

² Nakan pinatawag ni Muysis sida ni Bisalil, ni Ahulyab ag ti iba waya pinakan-an Panginuun kadunungan ag kakayahan sa tuhay-tuhay pag buruwatun hanggan ti magkaibug gid mangawat sa pagtarabahu.

³ Ipinakaun ni Muysis sa kanda ti tanan ipinakaun manga Israilita para sa pagpatindug Turda. Ag parargu di gid magdara ti manga tawu kanda buluntad pag manga handug kada surip.

⁴ Nakan inmatag sa kan Muysis ti manga manugtarabahu sa Turda ag magkun,

⁵ “Subra yi sa pagkailanganun ti pagdaran-un manga tawu para sa buruwatun isinugu Panginuun.”

⁶ Nakan nagpadara sugu si Muysis sa buu kampu magkumun: “Danga yi kamu magpakaun para sa pagpatindug banal pag Turda Tiripnan.” Nakan inmapas yi ti manga tawu sa pagdara manga handug nida,

⁷ dahil subra-subra yi ti ipinakaun nida para sa tanan buruwatun sa Turda.

Ti Pagpatindug Turda Tiripnan

⁸ Ti tanan gid antigu magtarabahu imaw ti nagbuwat Turda Tiripnan. Kanda ginamit sa pagbuwat siyun sampulu ka pulud pisahan linu binurdahan bunang malatuy, dungun ag marara. Bag-u binurdahan tunda anad pag manugburda histuda kirubin.

⁹ Ti kada pisahan kay aba 28 ka luk-an siku, kay lapad 4 ka luk-an siku.

¹⁰ Dinugpak nida inda sa tig-lima; bali duwa ka tig-lima.

¹¹ Bag-u binuwatan nida talinga pisahan malatuy kay saruy sa pudpud baliwa kada dinugpak manga pisahan;

¹² tig 50 ka talinga ti ipinauli sa kada saruy ag mag-aratubangan tunda.

¹³ Namuwat diman sida 50 ka kaw-it gintu hampay midugpak ti duwa ka manga pisahan sa panab-anan inda pag manga talinga. Sa panab-anan siyun nabwat ti Turda Tiripnan.

¹⁴ Bag-u namuwat sida panaklub sa Turda. Sampulu may usa ka pulud pisahan kanda ginamit ginan sa bulbul kambing.

¹⁵ Kay aba kada pisahan 30 ka luk-an siku ag may lapad 4 ka luk-an siku.

¹⁶ Dinugpak-dugpak nida ti lima ka pisahan, ag katida diman ti binwat nida sa unum ka nasawad.

¹⁷ Pinaulian nida 50 ka talinga ti kada pudpud dinugpak pisahan,

¹⁸ bag-u isinab-it nida inda sa 50 ka kaw-it galang.

¹⁹ Kay babaw inda pag taklub tinakluban lukub lalaki karanidu tinagum marara, ag tinungbawan waya marinu pag kalasi lukub.

²⁰ Bag-u nagbuwat sida kamhanan Turda. Ti ginamit nida tabla akasya.

²¹ Kay aba ti kada tabla 10 ka luk-an siku ag 1 ka luk-an siku may tunga kay lapad.

²² Ti kada tabla linahaban duwa ka pansugdung agud misugdung sa usa ka tabla. Katunda kanda binwat sa kada tabla.

²³ Ti 20 sa inda pag manga tabla ginamit nida panlingub sa salatan baliwa Turda.

²⁴ Inda pag manga tabla isinul-ud nida sa 40 ka paratukawan pilak — duwa ka paratukawan kada tabla.

²⁵ Ti kanaway baliwa Turda ginamitan diman 20 ka tabla.

²⁶ Isinul-ud diman sa 40 ka paratukawan pilak — duwa ka paratukawan kada tabla.

²⁷ Ti isalpan pag bahagi Turda, imaw ti sa dayuan tunda, liningban nida unum ka tabla,

²⁸ ag duwa ka tabla diman sa manga suuk inda.

²⁹ Ti manga tabla sa suuk isinad-ang kaayad ginan sa sirung tugka sa tungud sa panab-anan usa ka talinga. Kainda diman ti binwat nida sa duwa ka tabla sa manga suuk.

³⁰ Nakan may walu ka tabla sa inda pag bahagi Turda, ag nakasul-ud inda sa 16 ka paratukawan pilak — duwa ka paratukawan sa kada tabla.

³¹ Namuwat diman sida manga tabla akasya para sa lingub — lima baliwa sa kanaway Turda,

³² lima diman baliwa sa salatan, lima diman baliwa sa isalpan, sa dayu Turda.

³³ Ti pangagad sa karaw-an lingub kanda ipinauli ginan sa pudpud Turda atabug sa baliw pudpud.

³⁴ Sinaputan nida gintu ti manga tabla ag pinaulian talinga gintu imaw ti pasulungan pangagad sinaput diman gintu.

³⁵ Namuwat diman sida limbun linu binurdahan bunang malatuy, dungun ag marara. Binurdahan inda mayad histuda kirubin.

³⁶ Namuwat diman sida upat ka tulduk akasya may manga kaw-it gintu, isinad-ang nida ati ti limbun. Ti upat ka tulduk nakasul-ud sa upat ka paratukawan pilak.

³⁷ Namuwat sida usa waya ka limbun para sa sabian Turda Tiripnan. Ti ginamit nida pisahan linu binurdahan bunang malatuy, dungun ag marara. Ag marinu gid kay nagburda inda.

³⁸ Namuwat diman sida lima ka tulduk may manga kaw-it, isinad-ang nida siyun ti limbun. Ti manga tulduk sinaput gintu hanggan kay manga ulu ag kay bantuyan inda, nakasul-ud inda sa lima ka paratukawan galang.