Pag-ighit 35 - Hanunuu

Ti Surundanun sa Sirang Pamahari

¹ Pinatipun ni Muysis ti tanan Israilita ag sinabi sa kanda, “Inda ti sugu Panginuun kanyu buwatun:

² Sa sulud unum ka sirang, buwata niyu kanyu manga buruwatun, dapat sa ikapitu pag sirang pumahari kamu, dahil banal inda pag sirang ag para inda sa Panginuun. Matyun una si unu ti manarabahu sa inda pag sirang.

³ Nakan danga gid kamu magtarabahu una lang manantik apuy sa kanyu balay agud manama sa tunda pag sirang.”

Ti manga Panagda para sa Turda Tiripnan

⁴ Magkun si Muysis sa tanan Israilita, “Inda ti pag-isugu Panginuun kanyu buwatun:

⁵ Paghandug kamu sa Panginuun ginan sa kanyu manga kasiyunan. Mahimu kamu makahandug gintu, pilak, galang,

⁶ bunang malatuy, dungun ag marara, linu, pisahan binwat sa bulbul kambing,

⁷ lukub lalaki karanidu tinagum sa marara, marinu pag kalasi lukub, kayu akasya,

⁸ lana ulibu para sa manga sulul-an, manga panlakay sa lana pamayid ag para sa pamanglu sa kamangyan,

⁹ batu uniks ag tuhay waya pag mahalaga manga batu pag-ipauli sa ipud pangulu manughandug hanggan sa kay bursa sa dubdub.

Ti manga Garamitun sa Balay Tiripnan

¹⁰ “Ti tanan madunung magtarabahu pagsitay pag-awat sa tanan isinugu Panginuun pag buruwatun:

¹¹ ti Turda Tiripnan hanggan kay manga pantabun, manga kaw-it, manga lingub tabla, manga pangagad, manga tulduk, ag kay manga paratukawan;

¹² ti Kaban Kasunduan hanggan kay manga yayungan, ag kay panaklub imaw ti Ulian Pangaawa, hanggan ti limbun;

¹³ ti lamisa hanggan kay manga yayungan ag ti tanan garamitun siyun; ti tinapay handug sa atubangan Diyus;

¹⁴ ti palaulian sulu hanggan kay manga garamitun siyun; ti manga sulu hanggan ti lana para sa sulu;

¹⁵ ti harandugan surunugan kamangyan hanggan kay manga panyayung; ti lana pamayid; ti mabanglu pag kamangyan; ti limbun sabian Turda Tiripnan;

¹⁶ ti harandugan manga handug pagsunugun hanggan ti inalawat galang, kay manga yayungan hanggan ti tanan garamitun siyun; ti palanggana galang hanggan kay turungbawan;

¹⁷ ti manga limbun sa sangput sugkadan hanggan ti manga tulduk ag paratukawan; ti limbun sa sabian sugkadan;

¹⁸ ti manga patuk, hanggan ti manga panhigut Turda Tiripnan hanggan siyun sa kay sangput;

¹⁹ ti mahalaga ag banal pag manga rutay manughandug, ni Aarun hanggan niya manga anak lalaki, kanda isulung nu mansirbi sida bilang manga manughandug sa Banal pag Sulud-sulud.”

²⁰ Bag-u nighit ti manga Israilita sa atubangan ni Muysis.

²¹ Ti tanan may gustu mamakaun sa Panginuun nagdara manga kalap gamitun sa pagbuwat Turda Tiripnan hanggan tanan garamitun siyun, ag manga garamitun sa pagbuwat ipinablag pag rutay manga manughandug.

²² Ti tanan may gustu maghandug, lalaki una babayi nandara mahalaga pag manga kulintas: manga parungpung, manga pangunu, manga ugsung ag tuhay-tuhay pag kalasi kulintas gintu. Dinara nida kanda manga gintu bilang handug pag-ipaabwat sa Panginuun.

²³ May naghandug diman bunang malatuy, dungun hanggan marara, linu, buwat sa bulbul kambing, hanggan diman lukub karanidu lalaki tinagum marara, ag marinu pag kalasi lukub.

²⁴ Ti iba nagdara pilak ngatay galang hanggan manga kayu akasya bilang handug sa Panginuun.

²⁵ Nagdara diman bunang malatuy, dungun ag marara, hanggan pisahan linu ti manga babayi may kakayahan magbuwat pisahan.

²⁶ Ti manga babayi waydi madunung magbuwat pisahan bulbul kambing buluntad namuwat inda.

²⁷ Ti manga takinan nandara manga batu uniks ag iba waya mahalaga pag batu hampay ipauli sa ipud pangulu manughandug hanggan sa bursa sa dubdub.

²⁸ Nagdara diman sida manga panlakay hanggan lana ulibu para sa sulu, para sa lana pamayid ag para sa pamanglu sa kamangyan.

²⁹ Nakan ti tanan Israilita, lalaki hanggan babayi, ti magkaibug mag-awat nagdara kanda buluntad pag manga handug sa Panginuun para sa tanan buruwatun isinugu Panginuun sa panab-anan ni Muysis.

Ti manga Manugtarabahu sa Turda Tiripnan

³⁰ Magkun si Muysis sa manga Israilita, “Pagpatingi! Pinili Panginuun si Bisalil, kay anak ni Uri laki ni Hur, ginan sa lahi ni Huda.

³¹ Sinuldan siya Ispiritu Diyus ag pinakan-an kadunungan hanggan kakayahan sa una hintay pag buruwatun —

³² sa pagbuwat mararinu pag manga bagay gintu, pilak ag galang;

³³ sa pagriruk mahalaga pag manga batu agud buwatun batu sa manga panbisti; sa pagkurti sa kayu; ag sa tanan kalasi buwat kamang.

³⁴ Si Bisalil hanggan si Ahulyab kay anak ni Ahisamak ginan sa lahi ni Dan, pinakan-an Diyus kadunungan hampay itudlu nida sa manga iba kanda nataw-an.

³⁵ Pinakan-an sida Panginuun kakayahan bumuwat tanan kalasi buruwatun: ti pagriruk, ti pagbuwat pisahan, ag ti pagburda bunang malatuy, dungun ag marara sa pisahan linu. Kaya nida buwatun una hintay pag kalasi buruwatun, ag antigu gid sida magbuwat inda.