Pag-ighit 31 - Hanunuu

Ti manga Manugbuwat Turda Tiripnan

¹ Magkun ti Panginuun sa kan Muysis,

² “Pinili niku si Bisalil, kay anak ni Uri ag laki ni Hur, ginan sa lahi ni Huda.

³ Ilinubus niku sa kanya kang Ispiritu, ag kadunungan hanggan kakayahan sa una hintay pag buruwatun —

⁴ sa pagbuwat marinu pag manga bagay human sa gintu, pilak, ag galang,

⁵ sa pagriruk mahalaga pag manga batu agud buwatun panbisti, sa pagkurti sa kayu ag una hintay pag kalasi buwat kamang.

⁶ Pinili diman niku si Ahulyab kay anak ni Ahisamak, ginan sa lahi ni Dan, hampay mangawat sa kan Bisalil. Pinakan-an diman niku kakayahan ti tanan antigu pag manugpanday hampay mabuwat nida ti tanan niku pag-isugu sa kanmu:

⁷ ti Turda Taragbuan, ti Kaban Kasunduan ag kay taklub inda, hanggan ti tanan garamitun sa Turda —

⁸ ti lamisa ag kay manga garamitun, ti palaulian sulu lunsay gintu ag ti tanan garamitun, ti harandugan pagsunugan kamangyan,

⁹ ti harandugan pagsunugan manga handug pagsunugun hanggan ti tanan garamitun, ti palanggana hanggan kay turungbawan,

¹⁰ ti banal ag ti marinu pag rutay kay isulung ni Aarun hanggan kay manga anak nu magsirbi yi sida bilang manga manughandug,

¹¹ ti lana pamayid ag ti mabanglu pag kamangyan para sa Banal pag Sulud-sulud. Buwatun nida inda tanan angay sa kang pag-isugu sa kanmu.”

Ti Sirang Pamahari

¹² Pag-isugu Diyus sa kan Muysis

¹³ kuntay sabihun inda niya sa manga Israilita, “Sunda niyu kang pag-isugu tungkul sa Sirang Pamahari, dahil tanda inda nita kasunduan tugka sa sunud pag manga sinulput tawu. Sa panab-anan inda maalaman niyu aku, ti Panginuun, ti nagpili sa kanyu hampay kamu kang yi manga nasakupan.

¹⁴ Hu, tupada niyu kang manga pag-ipabuwat sa Sirang Pamahari, dahil banal tunda pag sirang para sa kanyu. Una si unu ti dayu sumunud sa kang manga pag-ipabuwat sa tunda pag sirang kailangan gid matyun. Una si unu ti mantarabahu sa tunda pag sirang danga yi pagkilalan-a nasakupan niyu.

¹⁵ Buwatun niyu kanyu buruwatun sa sulud unum ka sirang, dapat sa ikapitu pag sirang pumahari gid kamu. Dahil banal inda pag sirang para sa kangku, una si unu ti manarabahu sa tunda pag sirang kailangan gid matyun.

^16-17 Nakan kamu manga Israilita, kailangan kanyu sundun kang pag-isugu tungkul sa Sirang Pamahari tugka sa sunud pag manga sinulput tawu. Inda tanda nita kasunduan unman may katapusan. Dahil sa sulud unum ka sirang, linalang niku ti langit hanggan ti daga, ag nagpahari aku sa ikapitu pag sirang.”

¹⁸ Pagka nakatapus hampang ti Panginuun sa kan Muysis sa Bantud Sinai, ipinakaun niya sa kan Muysis ti duwa ka malapad pag batu sinuratan niya sugu, siya gid ti nagsurat.