Pag-ighit 30 - Hanunuu

Ti Harandugan Pagsunugan Kamangyan

¹ “Pagpabwat kawu harandugan akasya pagsunugan kamangyan.

² Kudradu inda, 1 ka luk-an siku kay aba, 1 ka luk-an siku kay lapad, ag 2 ka luk-an siku kay abwat. Kailangan may imaw inda ga sungay sa kada suuk kaibahan yi pagka binwat ti harandugan.

³ Saputun lunsay gintu kay babaw inda, kay upat ka saruy hanggan ti sungay sa kada suuk. Ag paulian hinulma gintu kay sangput inda.

⁴ Paulii duwa ka talinga gintu sa sirung hinulma gintu sa baliw-baliw harandugan, hampay pasulungan manga yayungan para sa pagkabyaw.

⁵ Ti yayungan inda kailangan human sa akasya ag sinaput gintu.

⁶ Ipauli inda pag harandugan sa atubangan limbun magtakip sa Kaban Kasuguan, siyun sa tungud kaban ti Ulian Pangaawa. Ati aku pag pumakakit sa kanyu.

⁷ “Kada surip, nu mag-asikasu si Aarun manga sulu, magtuub siya mabanglu kamangyan sa tunda pag harandugan.

⁸ Sa malambung, nu magsantik siya sulu, magtuub maan siya kamangyan. Kailangan inda buwatun sirang-sirang sa atubangan niku tugka sa sunud pag manga sinulput tawu.

⁹ Danga kamu maghandug tuhay pag kamangyan sa inda pag harandugan ngatay una hintay pag handug pagsunugun, ngatay handug irinmun.

¹⁰ Usa ka bisis kada timpu, kailangan lumpiyuhun ni Aarun ti harandugan sa panab-anan pagpayid dugu sa ga manga sungay sa suuk. Ti ipayid pag dugu ginan sa handug panlumpiyu. Kailangan inda buwatun kada timpu tugka sa sunud pag manga sinulput tawu, dahil inda pag harandugan pinakabanal gid para sa kangku.”

¹¹ Bag-u magkun ti Panginuun sa kan Muysis,

¹² “Nu sininsus nimu ti nasakupan Israil, ti kada masinsus manbayad sa kangku panlukat para sa kay buhi, hampay unman may kadamhakan rumas-ug sa kanda habang pag-isinsus nimu sida.

¹³ Ti ibayad kada usa mabilang sa sinsus unum ka guhit pilak angay sa timbangan paggamitun manga manughandug. Ipakaun nida inda bilang handug sa kangku.

¹⁴ Ti tanan may idad 20 paabwat ti mamakaun inda sa kangku.

¹⁵ Balaw manbayad subra ti mayaman, ag balaw manbayad kurang ti pugri.

¹⁶ Gamita nimu inda pag kuwarta para sa buruwatun sa Turda Tiripnan. Bayad inda manga Israilita para sa kanda buhi, ag sa panab-anan inda alalahanun niku sida.”

Ti Palanggana Urugasan

¹⁷ Magkun ti Panginuun sa kan Muysis,

¹⁸ “Pagbuwat kawu galang pag palanggana ag galang diman kay turungbawan, hampay gamitun urugasan. Ipauli nimu inda sa tab-anan Turda Tiripnan ag harandugan, bag-u paulian inda danum.

¹⁹ Inda ti gamitun ni Aarun hanggan niya manga anak sa pag-ugas manga kamang ag lulud nida,

^20-21 bag-u sida sumulud sa Turda Tiripnan, ag bag-u sida pumakarani sa harandugan hampay mangayaw sa kangku manga handug sa panab-anan apuy. Kailangan ugasan gid nida kanda manga kamang ag lulud hampay balaw sida mamatay. Kailangan sundun ni Aarun hanggan niya manga anak inda pag surundanun tugka sa sunud pag manga sinulput tawu.”

Ti Lana Pamayid

²² Magkun ti Panginuun sa kan Muysis,

²³ “Pagbuul kawu pinakamayad pag manga panlakay: unum ka kilu mira, tulu ka kilu mabanglu sinamun, tulu ka kilu mabanglu kalamus,

²⁴ unum ka kilu kasya (kailangan kay buyat inda angay sa timbangan paggamitun manga manughandug), ag usa ka galun lana ulibu.

²⁵ Sa panab-anan inda, bumuwat kawu banal pag lana pamayid mabanglu gid.

^26-28 Payidan nimu lana ti Turda Tiripnan, ti Kaban Kasunduan, ti lamisa hanggan ti tanan garamitun siyun, hanggan diman ti harandugan surunugan kamangyan, ti harandugan handug pagsunugun ag ti tanan garamitun siyun, ag ti palanggana hanggan kay burugtangan.

²⁹ Intirgahan nimu inda pag manga bagay hampay lubus yi gid banal; ag kailangan banal diman ti maghiyaput inda.

³⁰ “Payidan diman nimu lana ulibu si Aarun hanggan kay manga anak bilang pagtalaga sa kanda, hampay makasirbi sida sa kangku bilang manga manughandug.

³¹ Sabihun nimu sa manga Israilita kuntay ti banal niku pag lana ti kailangan gamitun pamayid tugka sa sunud pag manga sinulput tawu.

³² Danga niyu inda pagpayidan sa manga basta lang pag manga tawu, ag danga diman kamu magbuwat para sa kanyu sadili. Banal inda, nakan baliwun niyu inda banal.

³³ Una si unu pag balaw manughandug ti bumuwat inda pag lana ngatay ti gumamit inda una sa kantapu, danga yi pagkilalan-a nasakupan niyu.”

Ti Kamangyan

³⁴ Magkun ti Panginuun sa kan Muysis, “Pagbuul kawu inda pag manga mabanglu pag panlakay, pagpararihu kay kayamu: salung, unika, galbanu ag lunsay kamangyan.

³⁵ Sa panab-anan inda, bumuwat kawu mabanglu gid pag kamangyan. Bag-u paulian nimu inda asin hampay bumaliw lunsay ag banal.

³⁶ Kay iba inda runutun nimu ka pinu bag-u iwidwisik sa atubangan Kaban Kasunduan ati sa Turda Taragbuan, nu naan aku pag pumakakit sa kanmu. Kailangan baliwun gid nimu inda pinakabanal.

³⁷ Danga kamu magbuwat inda pag kamangyan para sa kanyu sadili. Baliwun niyu inda banal para sa Panginuun.

³⁸ Una si unu ti bumuwat inda hampay gamitun pamanglu danga yi pagkilalan-a nasakupan niyu.”