Pag-ighit 29 - Hanunuu

Ti Pagtalaga sa kan Aarun hanggan sa Kay manga Anak Lalaki bilang Manug-asiwa

¹ “Inda ti buwatun nimu sa pagtalaga sa kan Aarun hanggan sa kay manga anak lalaki hampay makasirbi sida sa kangku bilang manga manughandug. Pagbuul kawu usa ka turiti baka ag duwa ka lalaki karanidu unman may alangan.

² Pagbuul diman kawu marinu pag kalasi arina ag pagtama tinapay unman may pamadaka. Pagtama kawu madamul pag tinapay linibugan lana ulibu hanggan manipis pag tinapay pinayidan lana ulibu.

³ Bag-u ipauli nimu ti tinapay sa alat bag-u daran-a sa kangku kaibahan ti turiti pag baka ag duwa ka lalaki karanidu.

⁴ “Daran-a nimu sa may sabian Turda Taragbuan si Aarun hanggan kay manga anak lalaki, ag parigsa nimu sida.

⁵ Bag-u ipasulung nimu sa kan Aarun ti pansulud pag rutay, ti pamaunib, ti ipud hanggan ti bursa sa dubdub. Hapgunga nimu kaayad sa kay awak ti ipud gamit ti hinabul pag huragkus marinu kay nagbuwat.

⁶ Ipasulung nimu sa kay ulu ti pantaung, bag-u sab-itan sa atubangan pantaung ti banal pag midalya gintu tanda ipinablag siya para sa Panginuun.

⁷ Bag-u bul-a ti lana panhaplas ag buhusan sa ulu ni Aarun sa pagtalaga sa kanya.

⁸ Italaga diman kay manga anak lalaki bag-u pasulungi diman sida pansulud pag rutay,

⁹ pantaung hanggan huragkus. Bumaliw sida manughandug hanggan aban. Sa kainda pag paraan iintirga nimu si Aarun hanggan kay manga anak.

¹⁰ “Daran-a nimu ti turiti baka sa atubangan Turda Taragbuan, ag ikupa ni Aarun hanggan niya manga anak kanda kamang sa ulu baka.

¹¹ Bag-u iyawun ti baka sa atubangan Panginuun, sa sabian Turda Taragbuan.

¹² Pagbuul kawu dugu baka ag ipayid nimu inda sa sungay sa kada suuk harandugan, ti masawad pag dugu ibuhus nimu sa sirung harandugan.

¹³ Bag-u bul-a nimu ti tanan kuriras sa puna baka, ti dariit pag bahagi atay, ag ti duwa ka batu hanggan kay taba inda ag sunuga sa harandugan.

¹⁴ Dapat kay nayi, kay lukub, hanggan kay puna sunuga ati sa luwas kampu. Handug inda sa paglumpiyu.

¹⁵ “Bag-u bul-a nimu ti usa ka lalaki karanidu ag ipakupa nimu kay kamang ni Aarun hanggan niya manga anak sa ulu karanidu.

¹⁶ Iyawun nimu inda, ag iwidwisik kay dugu sa sangput harandugan.

¹⁷ Pahat-pahata nimu ti karanidu ag ugasi ti manga bahagi sa sulud tiyan hanggan ti manga lulud, bag-u tipuna inda hanggan kay ulu ag ti iba waya bahagi sa inda pag hayup.

¹⁸ Sunuga nimu inda tanan sa harandugan bilang handug pagsunugun para sa kangku. Ti mabanglu pag hungaw inda pag handug sa panab-anan apuy makapasulung sa kangku.

¹⁹ “Bag-u bul-a waya nimu ti usa ka lalaki karanidu, ag pakupaan kay kamang ni Aarun hanggan niya manga anak sa ulu karanidu.

²⁰ Iyawa nimu inda ag bul-a kay dugu, bag-u ipayid sa pararungpungan tuli ni Aarun hanggan niya manga anak, ag sa sikun ina-ina nida kamang ag lulud. Bag-u iwidwisik ti nasawad pag dugu sa sangput harandugan.

²¹ Pagbuul kawu dugu kadiit sa harandugan ag ilibug inda sa lana ulibu pamayid, bag-u iwidwisik inda sa kan Aarun hanggan sa kay manga anak lalaki, hanggan sa kanda manga rutay. Sa panab-anan inda, maintirga si Aarun hanggan kay manga anak, hanggan kanda manga rutay.

²² “Bag-u bul-a niyu ti taba karanidu, ti matabul pag ikug, ti tanan taba sa sulud tiyan, ti diit pag bahagi atay, ti duwa ka batu ag kay taba, hanggan kay sikun pag balangbang. Inda ti handug para sa pag-intirga sa manga manughandug.

²³ Pagbuul kawu sa alat tigus-a ka kalasi manga tinapay unman may pamadaka ihinandug sa kangku: tinapay unman may lakay lana ulibu, madamul pag tinapay may lakay lana ulibu ag manipis pag tinapay.

²⁴ Pahiyaptan nimu inda tanan sa kan Aarun hanggan sa kay manga anak, ag ipaabwat nida sa kangku bilang handug pag-ipaabwat.

²⁵ Bag-u bul-a nimu inda sa kanda ag sunuga sa harandugan kaibahan ti manga handug pagsunugun. Ti mabanglu pag hungaw inda pag handug sa panab-anan apuy makapasulung sa kangku.

²⁶ Bul-a diman nimu ti dubdub karanidu ag ipaabwat nimu inda sa kangku bilang handug pag-ipaabwat. Inda kanmu bahagi pag handug karanidu para sa pag-intirga sa kan Aarun hanggan sa kay manga anak lalaki.

²⁷ “Iintirga nimu sa kangku ti manga bahagi karanidu ihinandug para sa pagtalaga sa kan Aarun hanggan sa kay manga anak, kaibahan yi ti dubdub ag balangbang ipinaabwat nimu sa kangku.

²⁸ Kada manhandug ti manga Israilita manga handug para sa mayad pag pakiusa, kailangan pirmi kainda ti manga bahagi manga hayup miatag sa kan Aarun hanggan sa kay manga anak lalaki.

²⁹ “Nu mamatay yi si Aarun, ti banal pag rutay niya ipakaun sa kay linahi imaw ti umilis sa kanya bilang pangulu manughandug, hampay kanda isulung nu iintirga sida sa panab-anan paghaplas lana sa kanda.

³⁰ Kay lahi ni Aarun ti umilis sa kanya bilang takinan manughandug ti sumulung inda pag manga rutay sa sulud pitu ka sirang nu sumulud siya sa Turda Taragbuan hampay mansirbi sa Banal pag Sulud-sulud.

³¹ “Bul-a nimu ti karanidu ihinandug sa pag-intirga ag tamaa kay taguban sa usa ka banal pag rugar.

³² Kan-un inda ni Aarun hanggan niya manga anak, kaibahan ti tinapay sa balulang, ati sa sabian Turda Taragbuan.

³³ Sida lang ti makakaun inda pag taguban hanggan tinapay ihinandug hampay sa kapatawadan manga kasalanan nida pagka itinalaga sida. Unman may iba makakaun inda dahil banal inda pag karan-unun.

³⁴ Nu may masawad karan-unun aldaw surip, kailangan sunugun. Kailangan balaw gid inda kan-un, dahil inda banal.

³⁵ “Sunda nimu inda kang pag-isugu sa kanmu tungkul sa pag-intirga sa kan Aarun hanggan sa kay manga anak lalaki. Buwata nimu ti pag-intirga sa kanda sa sulud pitu ka sirang.

³⁶ Kada sirang, paghandug kawu usa ka bilug baka bilang handug sa paglumpiyu hampay bumaliw malumpiyu ti harandugan, bag-u payidan nimu ti harandugan lana ulibu para sa pagtalaga inda.

³⁷ Buwata nimu inda sa sulud pitu ka sirang; ag bumaliw banal ti harandugan, ag kailangan banal diman ti maghiyaput inda.

Ti Sirang-sirang pag manga Panagda

³⁸ “Duwa ka karanidu usa ka timpu kay idad ti ihandug nimu sa harandugan sirang-sirang.

³⁹ Usa sa surip ag usa sa malambung.

⁴⁰ Pagka manhandug kawu karanidu sa surip, paghandug diman kawu duwa ka kilu marinu pag kalasi arina linibugan usa ka litru lana ginan sa pin-gis ulibu. Paghandug diman kawu usa ka litru pin-gis ubas bilang handug irinmun.

⁴¹ Pagka manhandug kawu karanidu sa malambung, ihandug diman nimu ti binanggit pag arina hanggan irinmun. Ti mabanglu pag hungaw inda pag handug sa panab-anan apuy makapasulung sa kangku.

^42-43 Inda pag manga handug pagsunugun kailangan ihandug sirang-sirang tugka sa sunud pag manga sinulput tawu. Ihandug niyu inda sa atubangan niku, ati sa may sabian Turda Taragbuan nu naan aku pag pumakihampang sa kanmu ag pumasampak sa manga Israilita. Bumaliw banal inda pag Turda dahil sa kadayawan niku.

⁴⁴ Hu, buwatun niku banal ti Turda Tiripnan hanggan ti harandugan, ag ipablag niku si Aarun hanggan kay manga anak hampay sumirbi sa kangku bilang manga manughandug.

⁴⁵ Mangulian aku kaibahan manga Israilita ag bumaliw aku kanda Diyus.

⁴⁶ Maalaman nida aku ti Panginuun kanda Diyus ti nagpalwas sa kanda sa Ihiptu hampay mangulian aku kaibahan nida. Hu, aku, ti Panginuun kanda Diyus.