Pag-ighit 28 - Hanunuu

Ti manga Rutay manga Manug-asiwa

¹ “Ipablag nimu sa manga tawu si Aarun kanmu patar-ari hanggan kay manga anak lalaki sida ni Nadab, ni Abihu, ni Iliyasar ag ni Itamar hampay magsirbi sida sa kangku bilang manughandug.

² Pagpatahi kawu banal pag rutay para sa kan Aarun, sa ikagalang hanggan sa ikadayaw manga tawu.

³ Sabihun nimu sa tanan antigu pag manugtahi kang pinakan-an kakayahan manahi kuntay tahian nida rutay si Aarun imaw ti manpatuhay sa kanya sa manga tawu hampay makasirbi siya sa kangku bilang manughandug.

⁴ Inda ti tahiun nida pag manga rutay: ti bursa sa may dubdub, ti ipud, ti kulimpay, ti pansulud pag rutay binurdahan, ti pantaung hanggan ti panhawud. Tahiun nida ti banal pag manga rutay para sa kanmu patar-ari sa kan Aarun ag sa kay manga anak, hampay makasirbi sida sa kangku bilang manughandug.

⁵ Kailangan kanda gamitun bunang kulay gintu, malatuy, dungun ag marara hanggan linu.

Ti Panulung manga Manug-asiwa

⁶ “Ti ipud kailangan ngani buwat sa pisahan linu binurdahan kulay gintu, bunang malatuy, dungun ag marara. Kailangan mayad gid kay nagburda tunda.

⁷ May duwa inda ka bahagi, sa dayu ag sa sarangwan, bag-u may duwa higut panakbay sa labay.

⁸ Ti huragkus human sa linu binurdahan kulay gintu ag bunang malatuy, dungun ag marara.

⁹ “Bag-u pagpab-ul kawu duwa ka batu uniks ag ilahab nimu siti ti manga ngaran manga anak lalaki ni Hakub.

¹⁰ Kailangan darasnan kay magpauli manga ngaran angay sa kanda pagkalusad, sa kada batu tig unum ka ngaran.

¹¹ Kailangan ilahab inda parihu sa paglahab manugpanday pilak sa manga panmarka. Bag-u ipauli ti manga batu sa gintu pag palaulian

¹² ag ipakput inda sa may labay sa ipud bilang alaala pag manga batu para sa manga linahi ni Israil. Sa panab-anan inda, pirmi madara ni Aarun ti ngaran nida sa atubangan Panginuun, ag alalahanun niku sida.

¹³ Ti gintu pag palaulian

¹⁴ paulii nimu duwa ka tarikada human sa lunsay gid pag gintu hampay maitakud sa may labay rutay.

Ti Bursa sa Dubdub

¹⁵ “Pagpabwat kawu bursa sa dubdub gamitun panulung hampay maalaman ti nalub-anan niku. Kailangan mayad gid kay nagburda tunda, ag kay pisahan parihu sa ipud manga manughandug: linu binurdahan kulay gintu, bunang malatuy, dungun ag marara.

¹⁶ Ti bursa sa dubdub kailangan dubli kay tipluk ag parihu kay sukat — usa ka dangaw kay aba ag usa diman ka dangaw kay lapad.

¹⁷ Paulii inda upat ka manga hatay mahalaga pag batu. Sa un-an hatay, ipauli ti rubi, hanggan ti tupasyu ag birilyu;

¹⁸ sa ikadwa pag hatay, ismiralda, sapiru, ag diyamanti;

¹⁹ sa ikatlu pag hatay, hasintu, agata, ag amatista,

²⁰ ag sa ikap-at pag hatay, kirisulitu, uniks, ag haspi. Ipauli ti batu sa gintu pag palaulian.

²¹ Kailangan may ngaran manga anak ni Hakub ti kada batu pahalimbawa sa 12 ka linahi ni Israil. Kailangan pararihu kay nag lahab pangaran ti lahab panmarka.

²² “Paulian diman tarikada human sa lunsay gintu ti bursa sa dubdub.

²³ Pagpabwat kawu duwa ka talinga gintu ag isugdung inda sa tungud manga suuk bursa sa dubdub.

²⁴ Isulung ti duwa ka gintu tarikada sa duwa ka talinga bursa sa dubdub,

²⁵ ag ihigut ti duwa ka pudpud tarikada sa duwa ka gintu pag palaulian masulputan sa duwa ka sinulapid sa ipud.

²⁶ Pagpabwat kawu duwa ka talinga gintu ag isugdung inda sa sirung saruy bursa sa dubdub mauniban sa ipud.

²⁷ Pagpabuwat waya kawu duwa ka talinga gintu, paulian inda sa ipud baliwa sa may huragkus.

²⁸ Bag-u higtan niyu malatuy sa sirung baliwa talinga sa dubdub hanggan ti talinga ipud. Sa panab-anan inda, maihigut mayad ti bursa sa may dubdub sa ipud.

²⁹ “Nu sumulud si Aarun sa Banal pag Sulud-sulud kailangan sulung niya ti bursa sa dubdub may manga ngaran linahi ni Israil hampay alalahanun niku sida pirmi.

³⁰ Ipauli sa bursa sa dubdub ti Urim ag Tumim hampay ati inda sa bursa sa dubdub ni Aarun nu umatag siya sa kang atubangan. Nakan pirmi daran-un ni Aarun inda pag duwa ka bagay kada atabug siya sa atubangan niku hampay maalaman niya kang kagustuhan para sa manga Israilita.

Ti Tuhay waya pag Panrutayun manga Manug-asiwa

³¹ “Ti pamaunib kailangan lunsay malatuy magkapababawan ipud.

³² Ag liugan sa karaw-an para sa ulu, lapisan diman kay liug agud balaw magisi.

^33-34 Pag may paraway inda manga pamarinu ga histuda burak kayu pumigranata, buwat sa bunang malatuy, dungun ag marara. Ipakaraw-an nimu inda pag manga pamarinu sa tab-anan manga gintu pag gurung-gurung.

³⁵ Kailangan isulung inda ni Aarun nu magsulud siya sa Banal pag Sulud-sulud hampay magsirbi sa kang atubangan, hampay madnugan kay tunug gurung-gurung nu magsulud ag magpalwas siya sa Banal pag Sulud-sulud. Nu buwatun niya inda, balaw siya mamatay.

³⁶ “Pagpabwat kawu midalya gintu ag palahaban nimu inda kainda pag bagaw: ‘Ipinablag tag sa Panginuun.’

³⁷ Ihigut nimu inda sa atubangan pantaung ni Aarun sa panab-anan malatuy pag higut,

³⁸ hampay makitan inda sa kay bangas. Pag-ipakakit inda pag-akuun ni Aarun ti kasalanan manga Israilita sa kanda maghandug sa Panginuun. Pagpirmi inda sa kay bangas ni Aarun agud makabaya ti Panginuun sa kanda.

³⁹ “Ti pansulud pag rutay ni Aarun kailangan linu, katida diman kay pantaung. Ti huragkus kailangan binurdahan marinu.

⁴⁰ Pagpatahi diman kawu pansulud pag rutay, manga huragkus, hanggan manga pantaung, para sa kay manga anak ni Aarun sa ikagalang hanggan sa ikadayaw manga tawu.

⁴¹ Ipasulung nimu ti manga rutay sa kanmu patar-ari sa kan Aarun ag sa kay manga anak lalaki, bag-u payidan nimu sida lana ulibu ag itigana sa buruwatun. Ipablag nimu sida sa kangku hampay makasirbi sida sa kangku bilang manga manughandug.

⁴² “Patahian nimu sida manga salwal tabun sa kanda kauyaan. Kay aba inda ginan sa awak tugka sa balangbang hampay balaw sida mapasirang.

⁴³ Kailangan nida inda isulung nu magsulud sida sa Turda Tiripnan, ngatay nu magpakarani sida sa harandugan sa Banal pag Sulud-sulud sa pagsirbi bilang manga manughandug, agud balaw sida sumalan ag mamatay. Inda pag surundanun kailangan sundun ni Aarun hanggan niya manga lahi hanggan aban.