Pag-ighit 26 - Hanunuu

Ti Turda Tiripnan

¹ “Pagpabuwat kawu Turda Tiripnan. Ti gamitun sa pagpabuwat sampulu ka pulud pisahan linu may burda dilana malatuy, dungun, ag marara. Ag paburdahi inda kirubin sa madunung pag manugburda.

² Kailangan parihu kay sukat ti kada pisahan kay aba 28 ka luk-an siku ag 4 ka luk-an siku kay lapad.

³ Sugdung-sugdungun niyu inda tig lima; bali duwa ka tig lima.

⁴ Bag-u pabwatan nimu talinga human sa pisahan malatuy ti kada saruy dinugpak-dugpak manga pisahan,

⁵ tig 50 ka histuda singsing ti ipauli sa kada saruy ag kailangan turupadan inda.

⁶ Pagpabuwat diman kawu 50 ka kaw-it gintu, bag-u dugpakun nimu ti manga pisahan sa panab-anan inda pag manga kaw-it hanggan talinga hampay mausa ti Turda Tiripnan.

⁷ “Pabwati panabun ti Turda. 11 ka pulud pisahan binwat sa bulbul kambing ti gamitun sa pagbuwat inda.

⁸ Kailangan kay aba 30 ka luk-an siku ti kada pisahan ag 4 ka luk-an siku kay lapad.

⁹ Dugpak-dugpakun nimu ti lima ka pisahan ag katida diman ti buwatun sa unum ka nasawad. Ti ikan-um pag pisahan tiplukun sa atubangan Turda.

¹⁰ Paulian diman nimu 50 ka pisahan talinga ti kada suru duwa ka dinugpak pisahan,

¹¹ ag idugpak siyun ti 50 ka galang kaw-it, para usa ka pisahan ti taklub.

¹² Ipalaylay niyu sa dayu Turda ti katunga sawad pisahan,

¹³ ag ipalaylay diman sa kada habig ti usa may tunga ka luk-an siku pisahan kay sawad sa tabun Turda.

¹⁴ Kay babaw tabun Turda tungbawan lukub lalaki karanidu tinagum marara, ag tungbawan waya marinu pag kalasi lukub.

¹⁵ “Kailangan kay lingub turda akasya pag manga tabla.

¹⁶ Kay aba ti kada tabla 10 ka luk-an siku kay lapad 1 ka luk-an siku may tunga.

¹⁷ Ti kada tabla lahaban duwa ka pansugdung agud misugdung sa usa waya ka tabla. Kailangan katunda ti buwatun sa tanan tabla.

¹⁸ Ti 20 sa inda pag manga tabla ilingub sa Turda baliwa sa salatan.

¹⁹ Inda pag manga tabla idugpak sa 40 ka paratukawan pilak — duwa ka paratukawan sa kada tabla.

²⁰ Ti baliwa sa kanaway Turda lingban diman 20 ka tabla,

²¹ ag isul-ud diman sa 40 ka paratukawan pilak — duwa ka paratukawan sa kada tabla.

²² Ti baliwa sa isalpan waydi Turda lingban unum ka tabla,

²³ ag duwa ka tabla sa kay manga suuk.

²⁴ Sugdungun kaayad ti manga tabla sa manga suuk ginan sa sirung tugka sa tungud sa panab-anan talinga. Kailangan parihu gid katunda ti buwatun sa duwa ka tabla sa manga saruy.

²⁵ Nakan may walu ka tabla sa inda pag bahagi Turda, ag nakasul-ud inda sa 16 ka paratukawan pilak — duwa ka paratukawan sa kada tabla.

²⁶ “Pagpabwat diman kawu manga pangagad human sa akasya — lima para sa kanaway baliwa Turda,

²⁷ lima diman baliwa sa salatan, ag lima diman baliwa sa isalpan sa dayu Turda.

²⁸ Ti pangagad sa karaw-an tabla ginan sa saruy Turda tugka sa baliw saruy.

²⁹ Saputun gintu ti manga tabla ag paulian talinga gintu pasulungan pangagad. Saputun diman gintu ti manga pangagad.

³⁰ “Kailangan ipatindug nimu ti Turda Tiripnan angay sa gayak kang binagaw sa kanmu atay sa bantud.

³¹ “Pagpabwat diman kawu limbun pisahan linu kay bunang malatuy, dungun, ag marara. Ag paburdahi inda kirubin sa madunung pag manugburda.

³² Isad-ang inda sa manga kaw-it gintu sa upat ka tulduk akasya sinaputan gintu. Inda pag upat ka tulduk nakasul-ud sa upat ka paratukawan pilak.

³³ Nu nisad-ang yi ti limbun sa manga kaw-it, ipauli sa kay dayu ti Kaban Kasunduan. Ti limbun ti magbulag sa Banal pag Sulud-sulud ag sa Pinakabanal pag Sulud-sulud.

³⁴ Ti Kaban Kasunduan kailangan ipauli sa Pinakabanal pag Sulud-sulud, kailangan sa kay babaw taklub ti Ulian Pangaawa.

³⁵ Ipauli ti lamisa sa luwas limbun Pinakabanal pag Sulud-sulud, sa kanaway baliwa Turda Tiripnan, ag ipauli sa tupad lamisa ti palaulian sulu sa salatan baliwa.

³⁶ “Pagpabwat diman kawu usa waya ka limbun para sa sabian Turda Tiripnan. Ti gamitun pisahan linu binurdahan bunang malatuy, dungun ag marara. Kailangan mayad gid kay nagburda tunda.

³⁷ Bag-u isad-ang inda sa kaw-it gintu sa lima ka tulduk akasya sinaputan gintu. Inda pag lima ka tulduk nakasul-ud sa lima ka paratukawan galang.”