Pag-ighit 25 - Hanunuu

Ti manga Panagda para sa Turda Tiripnan

¹ Magkun ti Panginuun sa kan Muysis,

² “Sabihun nimu sa manga Israilita paghandug sida sa kangku. Kawu ti tumanggap kanda manga pagkaibgan ihandug sa kangku.

³ Inda kanmu tanggapun pag manga handug ginan sa kanda: gintu, pilak, galang,

⁴ bunang malatuy, dungun ag marara, marinu pag kalasi pisahan linu, pisahan binwat sa bulbul kambing,

⁵ lukub lalaki karanidu tinagum marara, marinu pag kalasi lukub, kayu akasya,

⁶ lana ulibu para sa sulul-an, manga panlakay sa lana pamayid ag pamanglu sa kamangyan,

⁷ batu uniks ag iba waya mahalaga pag manga batu pag-ipakput sa ipud pangulu manughandug hanggan sa kay bursa sa dubdub.

⁸ “Ipabwat nimu sa nasakupan Israil ti banal pag ulian para sa kangku nu naan aku pag umuli kaibahan nida.

⁹ Ipabwat ngani nimu inda ti banal pag ulian hanggan ti tanan garamitun angay sa pag-ipakakit niku pag gayak sa kanmu.” (Inda ti banal pag ulian pag-ingarnan diman Turda Tiripnan).

Ti Kaban Kasunduan

¹⁰ “Pagpabwat kawu kaban buwat sa akasya — 2 ka luk-an siku may tunga kay aba, 1 ka luk-an siku may tunga kay lapad ag 1 ka luk-an siku may tunga kay abwat.

¹¹ Saputun niyu kay sulud ag luwas lunsay gintu, ag paulian hinulma gintu kay palibut inda.

¹² Pagpabwat kamu upat ka talinga gintu ag ipahuput siyun sa kay upat ka tulduk.

¹³ Pagpabwat diman kawu yayungan human sa akasya ag saputun inda gintu.

¹⁴ Ipasulung ti manga yayungan sa manga talinga gintu sa kada saruy Kaban agud mayayung ti Kaban.

¹⁵ Danga gid niyu pagbul-a ti manga yayungan ginan sa talinga kaban.

¹⁶ Ipauli nimu sa Kaban ti duwa ka malapad pag batu siyun pag nakasurat ti kasuguan ipinakaun niku sa kanmu.

¹⁷ “Buwati niyu taklub lunsay gintu ti Kaban, 2 ka luk-an siku may tunga kay aba ag 1 ka luk-an siku may tunga kay lapad.

^18-19 Pagpabwat diman kawu duwa ka gintu kirubin ag ipauli inda sa baliw-baliw pudpud taklub Kaban, ti Ulian Pangaawa.

²⁰ Kailangan mabukladan patungud kay manga pakpak kirubin hampay mahamuyan nida manga pakpak ti taklub, ag kailangan mag-aratubangan sida duwa magbantay sa taklub.

²¹ Ipauli ngani nimu sa Kaban ti ipinakaun niku pag Kasuguan sa kanmu, bag-u takluban nimu ti Kaban.

²² Pumasampak aku sa kanmu ati sa karaw-an duwa ka kirubin ati sa babaw Kaban, ag ipakaun niku sa kanmu ti tanan sugu para sa nasakupan Israil.

Ti Lamisa Burugtangan Tinapay

²³ “Pagpabuwat diman kawu lamisa human sa akasya, kay sukat 2 ka luk-an siku kay aba, 1 ka luk-an siku kay lapad ag 1 ka luk-an siku may tunga kay abwat.

²⁴ Saputun niyu inda lunsay gintu ag paulian hinulma gintu kay manga palibut inda.

²⁵ Paulii diman niyu sanipa kay palibut, usa ka dangaw kay lapad, ag palibuti gintu kay palibut sanipa.

²⁶ Pagpabwat diman kawu upat ka talinga gintu ag ipakput sa upat ka suuk lamisa, sa may tupad lulud,

²⁷ arani sa sanipa. Siyun niyu pag ipasulung ti yayungan pamas-an sa lamisa.

²⁸ Dapat namhan sa akasya kay panyayung ag sinaputan gintu.

²⁹ “Pagpabwat diman kawu manga taya, ungut, tapayan ag manga malukung garamitun para sa handug irinmun. Kailangan lunsay diman gintu inda.

³⁰ Kailangan pirmi paulian tinapay handug sa kang atubangan ti lamisa.

Ti Palaulian Sulu

³¹ “Pagpabwat diman kawu manga palaulian sulu lunsay gintu kay lulud, kay bilug ag manga pamarinu ga histuda busang kayu, kay iba um-um di waya ag kay iba mabukladan yi. Inda pag pamarinu kaibahan yi pagka binwat ti bilug palaulian sulu.

³² Ti palaulian sulu may unum ka sanga, tig-tigutlu sa kada saruy.

³³ Ti kada sanga may tulu ka palaulian histuda busang kayu almindru, kay iba um-um waya ag kay iba mabukladan yi.

³⁴ Ti bilug palaulian sulu may upat ka pamarinu parihu sa histuda busang kayu almindru, kay iba um-um waya ag kay iba mabukladan yi.

³⁵ May usa ka histuda busang kayu sa sirung kada paris unum ka sanga.

³⁶ Ti manga pamarinu busang kayu ag ti manga sanga hinulma kaibahan palaulian sulu.

³⁷ “Pagpabuwat kawu pitu ka sulul-an ag ipauli sa kay paulian, agud marayaw sa kay atubangan.

³⁸ Ti manga pangilpit ag ti manga panalud dapug sulu kailangan lunsay gintu diman.

³⁹ Manga 35 ka kilu lunsay gintu ti kailangan nimu sa pagpabwat palaulian sulu hanggan sa tanan pag kagamitan siyun.

⁴⁰ Pihuun nimu ipabuwat inda tanan angay sa ipinakakit niku pag gayak sa kanmu atay sa bantud.