Pag-ighit 23 - Hanunuu

Katutuuhanan ag Katadlungan

¹ “Danga kamu magbarita kapudilan. Danga kamu magkastigus kapudilan agud maawatan ti usa ka daut pag tawu.

² “Danga kamu magpausa sa kayamuan sa magbuwat kadautan. Nu mangastigus kamu sa usa ka kasu danga pag likua ti katadlungan hampay lang masunud ti pagsabihun kayamuan.

³ Danga pagpaangayi ti kasu manga makuri dahil lang sa kanda kahamtangan.

⁴ “Nu makitan niyu nakalpas ti baka ngatay asnu niyu kalaban, kailangan kanyu iuli inda sa kanya.

⁵ Nu makitan niyu nagpu ti asnu niyu kalaban dahil mabuyat kay baba, danga niyu pagpabay-ani, bagkus ngap kanyu awatan inda makatindug.

⁶ “Pihua niyu mapakan-an katadlungan ti kasu manga makuri.

⁷ Danga kamu magbangdan unman may katutuuhanan. Danga niyu pagmatya ti manga matadlung ngatay unman may kasalanan pag tawu, dahil parusahan gid niku una si unu ti bumuwat inda.

⁸ “Danga kamu magtanggap suhul, dahil ti suhul magbuta sa tawu sa katutuuhanan, unman yi magkapakan-an katadlungan ti manga unman may kasalanan.

⁹ “Danga niyu pagpakahigpiti ti manga day-uhan, dahil kamu hanggan nakalakaw day-uhan katpung kamu ati sa Ihiptu waya.

Ti Sirang ag Timpu Pamahari

¹⁰ “Sa sulud unum ka timpu, makatanum kamu ag makapatubas sa kanyu daga.

¹¹ Dapat sa ikapitu pag timpu, danga niyu inda pagtanumi. Nu may tumubu pananum sa kanyu daga, pabay-ani niyu ti manga pugri ti makab-ul manga karan-unun ginan sa manga tanum, nu may masawad, ipakaun yi lang niyu sa simarun hayup. Katunda diman ti buwatun niyu sa manga taranuman ubas hanggan taranuman ulibu.

¹² “Pagtarabahu kamu sa sulud unum ka sirang, dapat sa ikapitu pag sirang pagpahari kamu hampay makapahari diman kanyu manga baka ag manga asnu, hanggan yi kanyu manga panawuhun ag ti manga day-uhan magpangulian kaibahan niyu.

¹³ “Sunda niyu inda tanan kang sinabi sa kanyu. Danga kamu magdarangin sa tuhay pag manga diyus ngatay sampitun lang kanda ngaran.

Ti Tulu ka Pista kada Timpu

¹⁴ “Pagdaus kamu tulu ka pista kada timpu para sa kang kadayawan.

¹⁵ Tupada niyu ti Pista Tinapay Unman may Pamadaka. Angay sa isinugu niku sa kanyu, pagkaun kamu tinapay unman may pamadaka sa sulud pitu ka sirang. Buwata niyu inda sa itinagka pag udas sa bulan Abib, dahil tida pag bulan kamu pag nagluwas sa Ihiptu. Ti kada usa sa kanyu kailangan dumara sa kangku handug sa tida pag udas.

¹⁶ “Alalahana diman niyu ti Pista Tig-arani sa panab-anan pagdara sa kangku manga un-an pag tubas niyu tanman. Alalahana diman niyu ti Pista Uryan Ani sa katapusan timpu, nu tipunun yi niyu ti manga tubas sa kanyu tanman.

¹⁷ “Kailangan lumuwang kanyu kalalakihan sa inda pag tulu ka pista kada timpu hampay sumamba sa kangku, ti Panginuun kanyu Amu.

¹⁸ “Danga kamu maghandug dugu sa kangku kaibahan tinapay may pamadaka. Danga kamu magsawad para sa aldaw pag surip taba hayup ihinandug sa kangku sa pista.

¹⁹ “Daran-a niyu sa balay Panginuun niyu Diyus ti pinakamarinu pag un-an bahagi niyu tubas. “Danga niyu paggulaya ti anak kambing sa gatas niya ina.

²⁰ “Taynguna, suguun niku ti anghil hampay bantayan ag giyahan kamu atag sa rugar inalistu niku para sa kanyu.

²¹ Pagpatingi kamu sa kanya ag sunda kay pagsabihun. Danga kamu maglaban sa kanya. Dahil ti tanan niya pagbuwatun, pagbuwatun niya sa kang ngaran, ag balaw niya patawadun kanyu manga kasalanan.

²² Nu mamatingi lang kamu kaayad sa pagsabihun niya ag buwatun ti tanan pagsabihun niku, girahun niku kanyu manga kalaban.

²³ Giyahan kamu niku anghil ag daran-un niya kamu sa daga manga Amuriyu, Hitiyu, Pirisiyu, Kananiyu, Hibiyu ag Hibusiyu, ag rurisun niku sida.

²⁴ Danga kamu magsamba ngatay magsirbi sa manga diyus-diyusan nida, ngatay huwadun ti manga pagbuwatun nida. Runuta niyu lubus kanda manga diyus-diyusan, ag gubaa ti manga aramirawan pag batu nida.

²⁵ Sambaha niyu aku, ti Panginuun niyu Diyus, ag pakan-an niku kamu abunda pag karan-unun ag danum. Paayadun niku kanyu mag-asaydan,

²⁶ unman may babayi maagasan ag unman may bumaliw baug sa kanyu daga, ag pakan-an diman niku kamu malawig pag buhi.

²⁷ “Padalaun niku ag lituhun ti maatubang niyu pag manga kalaban, ag malagiw sida pakarayu sa kanyu.

²⁸ Mamadara aku putyukan manug-una sa kanyu, ag tabugun nida ti manga Hibiyu, Kananiyu ag Hitiyu.

²⁹ Dapat balaw niku sida tabugun sa sulud lang usa ka timpu hampay unman mapabay-anan ti daga ag hampay maampara ti pagyamu manga simarun hayup ati.

³⁰ Amat-amat niku sida tabugun tugka sa yumamu kamu ag makayahan yi niyu apuun ti daga.

³¹ “Pagpihuun niku ti katugkaan daga niyu umumpisa sa Dagat Marara tugka sa Dagat Miditiranyu, ag ginan sa pangawakawaan sa salatan tugka sa Sapa Iyupratis. Ipatalu niku sa kanyu ti manga magpangulian sa tunda pag daga, ag tabugun niyu sida.

³² Danga kamu magbuwat kasunduan sa kanda ngatay sa manga diyus-diyusan nida.

³³ Danga niyu sida pagpabay-ani mangulian sa kanyu manga daga barang sida waya ti dumara sa kanyu atag sa kasalanan laban sa kangku. Nu mansamba kamu sa diyus-diyusan nida, pihu bumaliw suduk inda sa kanyu.”