Pag-ighit 20 - Hanunuu

Ti Sampulu ka Sugu

¹ Magkun ti Diyus,

² “Aku ti Panginuun niyu Diyus ti nagpalwas sa kanyu sa Ihiptu nu naan kamu pag binwat panawuhun.

³ “Danga kamu magsamba sa tuhay pag diyus purya sa kangku.

⁴ “Danga kamu magbuwat manga diyus-diyusan histuda una hintay pag bagay sa langit, ngatay sa daga, una sa danum.

⁵ Danga gid niyu inda pagsirbihi ngatay sambahun, dahil aku, ti Panginuun niyu Diyus, balaw gid magkaibug may pagsambahun kamu tuhay. Pagparusahan niku ti manga magkasala sa kangku, hanggan kay manga anak tugka sa ikatlu ag sa ikap-at pag sinulput manga magdayu sa kangku.

⁶ Dapat pag-ipakakit niku kang pagmahal sa mayamu gid pag sinulput magmahal sa kangku ag magsunud sa manga sugu niku.

⁷ “Danga niyu paggamita kang ngaran sa unman may pulus. Aku, ti Panginuun niyu Diyus, ti pumarusa una si unu ti gumamit kang ngaran sa unman may pulus.

⁸ “Alalahana niyu ti Sirang Pamahari, buwatun niyu inda mahalaga pag sirang para sa kangku.

⁹ Pagtarabahu kamu sa sulud unum ka sirang,

¹⁰ dapat sa ikapitu pag sirang, ti Sirang Pamahari ialistu niyu para sa kangku, ti Panginuun niyu Diyus. Danga kamu magtarabahu sa tida pag sirang, hanggan kanyu manga anak, manga suruguun, manga hayup, ngatay ti manga day-uhan magpangulian kaibahan niyu.

¹¹ Dahil sa sulud unum ka sirang, linalang niku ti langit, ti daga, ag ti dagat, hanggan ti tanan-tanan asan, dapat nagpahari aku sa ikapitu pag sirang. Nakan pinapaladan niku ti Sirang Pamahari ag binwat niku inda mahalaga pag sirang para sa kangku.

¹² “Galanga niyu kanyu ama ag ina hampay mabuhi kamu dugay sa pag-ipakaun niku pag daga sa kanyu.

¹³ “Danga kamu magmatay.

¹⁴ “Danga kamu magpanguragin.

¹⁵ “Danga kamu magtakaw.

¹⁶ “Danga kamu magkastigus balaw tutuu sa kanyu kaparihu.

¹⁷ “Danga niyu pagkaibgi maapu ti balay niyu kaparihu, ngatay kay asawa, kay manga panawuhun, kay manga baka, kay asnu, ngatay ti una hintay pag kasiyunan niya.”

¹⁸ Pagka nadnugan manga tawu ti kurarug hanggan ti tunug budyung, ag pagka nakitan nida ti kilat ag ti bantud mag-anus, nangirkirug sida sa dala. Tinmindug sida sa arayu

¹⁹ magkumun sa kan Muysis, “Kawu yi lang ti pagbagaw sa kanmi ag mamatingi kami, danga yi lang ti Diyus, barang mamatay kami.”

²⁰ Nakan magkumun si Muysis sa manga tawu, “Danga kamu magkadala, dahil nagsitay ti Diyus hampay subukan kamu sa panab-anan niya kamaskihan agud madala kamu sa kanya sa pagbuwat kasalanan.”

²¹ Matindugan di ti manga tawu ati sa arayu habang magpakarani si Muysis sa madamul pag rurum nu naan ati ti Diyus.

²² Bag-u magkun ti Panginuun sa kan Muysis, “Sabihun nimu inda sa manga Israilita: Nakitan niyu nanhampang aku sa kanyu ginan sa langit.

²³ Nakan danga kamu magbuwat diyus-diyusan pilak ngatay gintu hampay sambahun kaibahan pagsamba sa kangku.

²⁴ “Pagbuwat kamu daga pag harandugan para sa kangku ag siyun niyu pag ihandug kanyu manga karanidu, manga kambing hanggan manga baka bilang handug pagsunugun ag handug para sa mayad pagpakiusa. Buwata niyu inda sa piliun niku pag rugar nu naan pag sambahun aku, umasan aku ag papaladan niku kamu.

²⁵ Nu bumuwat kamu harandugan batu para sa kangku, danga niyu pag bagasbasi, dahil nu gamitan niyu inda pamagasbas unman yi inda maangay gamitun sa paghandug sa kangku.

²⁶ Ag danga diman kamu magbuwat harandugan may agdan dahil barang mapasirang kamu sa kanyu magdayik.”