Pag-ighit 18 - Hanunuu

Sinabang ni Hitru si Muysis

¹ Nabaritaan ni Hitru, manughandug sa Midyan ag manugang ni Muysis, ti tanan binwat Diyus sa kan Muysis hanggan sa kay nasakupan Israilita. Nabaritaan niya nu kabitay ipinalwas Panginuun ti manga Israilita sa Ihiptu.

^2-3 Ati katpung pinauli ni Muysis kay asawa si Sipura hanggan kay duwa ka anak lalaki tabug sa kay manugang sa kan Hitru. Kay ngaran niya usa ka anak si Girsum, dahil pagka inanak siya, magkun si Muysis, “Day-uhan aku sa iba daga.”

⁴ Kay pangadwa si Iliyisir, dahil pagka inanak siya, magkun si Muysis, “Ti Diyus niku ama ti mag-awat sa kangku. Irinibri niya aku sa baladaw hari Ihiptu.”

⁵ Taynguna, nag-atag si Hitru hanggan kay asawa ni Muysis ag ti duwa nida ka anak sa pagkampuhan ni Muysis sa pangawakawaan, arani sa bantud Diyus.

⁶ Nagpaalam yi si Hitru sa kan Muysis kuntay rumas-ug siya kaibahan si Sipura hanggan kay duwa ka anak.

⁷ Nakan sinulang ni Muysis kay manugang, yinmuk-ub siya ag nangaruk bilang paggalang sa kanya. Nangaramustahan sida bag-u sinmulud yi sa turda.

⁸ Itinultul ni Muysis sa kan Hitru ti tanan binwat Panginuun sa hari Ihiptu hanggan sa manga Ihipsiyu para sa manga Israilita. Itinultul diman niya ti tanan nida nalakawan pag kakurian sa kanda maglakaw ag nu kabitay sida irinibri Panginuun.

⁹ Magbaya gid si Hitru sa tanan binwat kaayadan Panginuun sa manga Israilita pagka irinibri niya sida sa kamang manga Ihipsiyu.

¹⁰ Magkun si Hitru, “Dayawun ti Panginuun, ti nagribri sa kanyu sa kamang manga Ihipsiyu ag sa hari nida.

¹¹ Naalaman niku taynguna mas makamaskihan ti Panginuun sa tanan diyus, dahil irinibri niya ti manga Israilita sa manga Ihipsiyu mag-api sa kanda.”

¹² Bag-u nagpakaun si Hitru manga handug pagsunugun ag tuhay waya pag manga handug sa Diyus. Pagka pagbuwatun niya inda, rinmas-ug si Aarun hanggan ti tanan manugpamahala sa Israil. Sinmaru sida sa kan Hitru hampay mangaun sa atubangan Diyus.

Nagpili si Muysis manga Manughusay

¹³ Pagka nasurip, tinmukaw si Muysis bilang manughusay hampay patingihan ti kasu manga tawu. Mahanayan ti manga tawu sa kay atubangan ginan surip tugka sa yabi.

¹⁴ Pagka nakitan inda ni Hitru, magkun siya sa kan Muysis, “Hayga pagbuwatun nimu inda para sa manga tawu? Mahanayan ti manga tawu sa kanmu atubangan ginan surip tugka sa yabi.”

¹⁵ Sinmagut si Muysis, “Pagbuwatun niku inda dahil magpakarani ti manga tawu sa kangku hampay maalaman ti kagustuhan Diyus.

¹⁶ Nu mag-aratwan ti manga tawu, pagdaran-un nida inda sa kangku, ag aku ti maghusay nu si unu sa kanda ti hustu. Bag-u pagtudluan niku sida manga surundanun hanggan manga sugu Diyus.”

¹⁷ Magkun si Hitru, “Balaw duy kang-ud inda kanmu palakaw.

¹⁸ Subra nimu pagpakurianan kanmu sadili hanggan ti manga tawu. Mabuyat inda para sa kanmu; unman nimu inda mabuwat kawu lang usa.

¹⁹ Pagpatingi kawu sa kangku, patigayunun kawu niku, mana ibahan kawu Diyus. Iparargu nimu kanmu pagbuwatun magpakarani sa Diyus para sa manga tawu. Daran-a nimu kanda kasu sa kanya.

²⁰ Iparargu diman nimu ti pagtudlu manga surundanun hanggan manga sugu Diyus sa kanda. Tudlui nimu sida nu kabitay mangabuhi ag nu hintay kanda buwatun.

²¹ Dapat pagpili kawu manga tawu makaawat sa kanmu. Kailangan may imaw sida kakayahan maghusay, may dala sa Diyus, makatiwalaan, ag unman magtanggap suhul. Buwatun nimu sida tagahusay sa kada gurupu sa tig 1,000, 100, 50 ag 10 ka tawu.

²² Manirbi sida bilang manga manughusay sa tanan pag udas. Sida ti maghusay sa maragaan pag kasu, dapat daran-un nida sa kanmu ti marabuyat pag kasu. Sa kainda pag palakaw, gumaan ti buruwatun nimu dahil maawatan kawu nida.

²³ Alam niku inda ti gustu Diyus kanmu buwatun, nu sundun nimu inda, udyi kawu makurian. Ag makauli inda pag manga tawu may kahusayan.”

²⁴ Sinunud ni Muysis ti patigayun sa kanya niya manugang.

²⁵ Pinmili siya sa manga Israilita manga tawu may kakayahan maghusay, ag binwat niya sida manga manughusay manga gurupu sa tig 1,000, 100, 50 ag 10 ka tawu.

²⁶ Nagsirbi sida sa manga tawu bilang manga manughusay sa tanan pag udas. Sida ti maghusay sa maragaan pag kasu, dapat nu marabuyat pagdaran-un nida inda sa kan Muysis.

²⁷ Bag-u pinasnuan ni Muysis kay manugang bumalik sa kay sadili nasyun.