Pag-ighit 17 - Hanunuu

Ti Danum ginan sa Batu

¹ Angay sa sugu Panginuun, nighit ti buu nasakupan Israil sa pangawakawaan Sin ag nagparargu sa paglakaw. Nagpasalyu-salyu sida rugar. Igu dugay, kinmampu sida sa Ripidim, dapat unman may danum mainum ati.

² Nakan nangatadlungan sida sa kan Muysis ag magkun, “Pakan-i kami danum.” Sinmagut si Muysis, “Hayga kamu magpangatadlungan sa kangku? Hayga kanyu pagsubukan ti Panginuun?”

³ Dapat magkauwaw yi ti manga tawu ati, nakan parargu ti riklamu nida sa kan Muysis. Magkun sida, “Hayga kanmu waya kami ipinalwas sa Ihiptu? Mamatay lang waydi maaw kami sitay sa uwaw hanggan kanmi manga anak ag manga hayup.”

⁴ Nakan nanhagad awat si Muysis sa Panginuun magkun, “Hintay nguna kang buwatun sa inda pag manga tawu? Harus bintukun yi nida aku!”

⁵ Sinmagut ti Panginuun sa kan Muysis, “Bul-a kanmu ihinampak sa sapa Nilu pag sugkud, pagtaban kawu pira ka paggurangunun sa Israil ag pag-una kamu sa manga tawu.

⁶ Alagdun kawu niku ati sa may batu Hurib. Nu ati yi kawu, hampaka ti batu, ag lumuwang ti danum inmun manga tawu.” Ag binuwat ngani inda ni Muysis sa atubangan manga paggurangunun sa Israil.

⁷ Iningarnan ni Muysis Masa ag Miriba ati pag rugar dahil nangatadlungan sa kanya ti manga Israilita ag sinubukan nida ti Panginuun magkun, “Pag-ibahan aw kita Panginuun ngatay unman?”

Natalu ti manga Amalikita

⁸ Pagka ati di waya sa Ripidim ti manga Israilita, ginira sida manga Amalikita.

⁹ Magkun si Muysis sa kan Huswi, “Pagpili kawu pira ka tawuhan nita ag paglaban kamu sa manga Amalikita. Tumindug aku aldaw sa babaw tagudtud habang hiyaput ti sugkud pag-isugu Diyus kang daran-un.”

¹⁰ Nanlaban ngani sida ni Huswi sa manga Amalikita angay sa isinugu ni Muysis, habang sida ni Muysis, ni Aarun ag ni Hur tinmukad sa tagudtud.

¹¹ Habang maabwatan kay kamang ni Muysis, magpanalu ti manga Israilita, dapat nu pag-ipaababa niya kay kamang, magpanalu maan ti manga Amalikita.

¹² Pagka sa uryan, tinaklay yi kay kamang ni Muysis. Nakan binmuul sida ni Aarun ni Hur usa ka batu bag-u pinatukaw ati si Muysis. Ipinaabwat ni Aarun kay usa ka kamang ni Muysis ag katida diman kay binwat ni Hur sa kay usa ka kamang tugka sa nisangday ti init.

¹³ Nakan natalu nida ni Huswi ti manga Amalikita.

¹⁴ Pagkatapus, magkun ti Panginuun sa kan Muysis, “Isurat duy nimu inda hampay balaw malimtan ag ipaalam nimu sa kan Huswi kanmu isinurat: Tabuhun gid niku ti lahi manga Amalikita.”

¹⁵ Nagbuwat si Muysis harandugan ag iningarnan niya, “Ti Panginuun kang Bandira Kapanaluhan.”

¹⁶ Magkun siya, “Dahil sa ipinaabwat manga Amalikita kanda manga kamang laban sa tukawan Panginuun, parargu lumaban sa manga Amalikita ti Panginuun hanggan aban.”