Pag-ighit 16 - Hanunuu

Ti Mana pag Karan-unun hanggan manga Pugu

¹ Ginan sa Ilim, naparargu sa paglakaw ti manga Israilita tugka sa nakaras-ug sida sa pangawakawaan Sin, sa karaw-an Ilim ag Sinai. Nakaras-ug sida ati sa ika-15 pag sirang sa ikadwa pag bulan ginan sa nakalwas sida sa Ihiptu.

² Ati sa pangawakawaan, nagriklamu ti buu nasakupan Israil sa kanda ni Muysis ag ni Aarun.

³ Magkun sida, “Mayad waya minatay yi lang kami Panginuun sa Ihiptu! Ati una kabitay makakaun kami taguban hanggan tanan nimi pagkaibgan pag karan-unun. Dapat taynguna dinara niyu kami sitay sa pangawakawaan hampay mamatay sa lun-us.”

⁴ Magkun ti Panginuun sa kan Muysis, “Pagpatingi kawu! Pumauran aku karan-unun ginan sa langit para sa kanyu. Kada sirang, mamunpun ti manga Israilita kanda karan-unun sa tunda lang pag sirang. Siyun pag makitan niku nu sundun nida ngatay unman kang manga sugu.

⁵ Sabihun nimu sa kanda dublihun nida ti bul-un pag karan-unun sa kada ikan-um pag sirang kada duminggu.”

⁶ Nakan sinabi nida ni Muysis ni Aarun sa tanan Israilita, “Taynguna pag yabi, maalaman niyu ti Panginuun ti nagpalwas sa kanyu sa Ihiptu,

⁷ ag aldaw pag surip, makitan niyu ti kadayawan Panginuun. Dahil nadnugan niya kanyu manga riklamu. Si unu gid kami hampay manriklamu kamu sa kanmi? Kay tutuu, ti Panginuun kanyu pagriklamuhan.”

⁸ Magkun waya si Muysis, “Pakan-an kamu Panginuun taguban kanyu kan-un nu yabi ag busugun niya kamu tinapay sa surip, dahil nadnugan niya kanyu manga riklamu sa kanya. Balaw kamu sa kanmi pag magriklamu nu unman sa Panginuun. Si unu gid kami hampay kanyu riklamuhan?”

⁹ Magkun si Muysis sa kan Aarun, “Sabiha nimu sa buu nasakupan Israil pagpakarani sida sa atubangan Panginuun dahil nadnugan niya kanda manga riklamu.”

¹⁰ Habang magbagaw si Aarun sa buu nasakupan Israil, namantay sida sa pangawakawaan, nakitan nida ti kadayawan Panginuun sa rurum.

¹¹ Magkun ti Panginuun sa kan Muysis,

¹² “Nadnugan niku ti manga riklamu manga Israilita. Sabiha nimu sa kanda kada yabi makakaun sida taguban ag kada surip pagpakabusug sida tinapay. Sa katida maalaman niyu aku ti Panginuun niyu Diyus.”

¹³ Pagka maghugut marukirum yi, nagrugpu ti mayamu pag pugu ag harus matabunan ti buu kampu. Igu surip, nabasa tun-ug ti buu kampu.

¹⁴ Pagka namara ti tun-ug, may nakitan sida maranipis pag bagay malagti gid sa daga.

¹⁵ Unman nida alam nu hintay tida, nakan namaraingan-an sida, “Hintay nguna tunda?” Magkun si Muysis sa kanda, “Tunda ti karan-unun kay ipinakaun Panginuun sa kanyu hampay kanyu kan-un.

¹⁶ Magkun ti Panginuun ti kada usa sa kanyu pagpunpun angay sa kanyu kailangan: usa ka gantang kada tawu.”

¹⁷ Nakan namunpun karan-unun ti manga Israilita; mayamu ti napunpun iba habang ti iba waydi pira-pira lang.

¹⁸ Pagka kanda tinakal inda, usa ka gantang ti kada tawu. Unman nagsubra ti nakapunpun mayamu ag unman diman kinurang ti nakapunpun pira-pira. Kang-ud kang-ud lang ti napunpun kada usa.

¹⁹ Magkun si Muysis sa kanda, “Danga may magsawad inda para sa sunud pag sirang.”

²⁰ Dapat ti iba sa kanda unman nagpatingi sa kan Muysis, nagsawad sida para sa sunud pag sirang. Pagka nasurip, sinapatan inda ag namawu. Nakan nagalit si Muysis sa kanda.

²¹ Kada surip, magpunpun sida angay sa kanda pangailangan. Nu mainit yi, magkatunas ti balaw nida napunpun pag karan-unun.

²² Sa ikan-um pag sirang kanda pag punpunun — duwa ka gantang ti kada tawu. Nakan nag-atag ti manga takinan nasakupan Israil sa kan Muysis ag namaingana nu hayga dubli.

²³ Magkun si Muysis sa kanda, “Pag-isugu Panginuun pagpahari kamu aldaw dahil inda ti Sirang Pamahari, banal pag sirang para sa Panginuun. Nakan tamaa yi ti gustu niyu tamaun, ag gulaya ti gustu niyu gulayun. Ti masawad alistuhan para aldaw surip.”

²⁴ Nakan sinawadan nida inda para sa sunud pag sirang angay sa isinugu ni Muysis. Igu sa sunud pag sirang unman inda sinapatan ngatay namawu.

²⁵ Magkun si Muysis sa kanda, “Kan-un niyu kainda tunda, dahil taynguna ti Sirang Pamahari para sa Panginuun. Unman kamu may makitan tunda taynguna sa daga.

²⁶ Makab-ul kamu inda pag karan-unun sa sulud unum lang ka sirang, dapat sa ikapitu pag sirang pagpahari kamu. Sa tida pag sirang, unman kamu may mab-ul karan-unun.”

²⁷ May manga tawu waya gid linmuwas hampay mam-ul karan-unun sa ikapitu pag sirang, dapat unman sida may nakitan.

²⁸ Ag magkun ti Panginuun sa kan Muysis, “Tugka kapira waya inda pag nasakupan maglabag sa kang manga sugu hanggan manga tudlu?

²⁹ Alalahana niyu pinakan-an niku kamu Sirang Pamahari, nakan kada ikan-um pag sirang pagdublihun niku kanyu karan-unun. Kailangan pumirmaminti sa kay ulian ti kada usa sa ikapitu pag sirang. Unman may lumuwas hampay mam-ul karan-unun.”

³⁰ Nakan nagpahari ti manga tawu sa ikapitu pag sirang.

³¹ Iningarnan manga Israilita ti karan-unun mana. Inda ga dariit ag malagti pag but-ul, ag matagsing parihu sa manipis pag tinapay may daykut.

³² Magkun sa kanda si Muysis, “Pag-isugu Panginuun paghamnu kamu usa ka gantang mana para sa sunud pag manga sinulput tawu, hampay makitan nida ti karan-unun ipinakaun niya sa kanyu sa pangawakawaan pagka ipinalwas niya kamu sa Ihiptu.”

³³ Magkun si Muysis sa kan Aarun, “Pagbuul kawu sukadan ag sukadi nimu inda usa ka gantang mana. Pagkatapus, ipauli nimu inda sa atubangan Panginuun para sa sunud pag manga sinulput tawu.”

³⁴ Sinunud ngani inda ni Aarun angay sa sinabi Panginuun sa kan Muysis. Ipinauli ni Aarun ti mana sa Kaban Kasunduan agud itagu.

³⁵ Nagkaun mana ti manga Israilita sa sulud upatpulu ka timpu, tugka sa nakaaput sida sa kanda ulianan pag daga sa Kanaan.

³⁶ (Kada sirang ti kada usa sa kanda magtipun mana, manga usa ka gantang.)