Pag-ighit 15 - Hanunuu

Ti Kanta ni Muysis

¹ Kinmanta si Muysis hanggan ti manga Israilita inda pag kanta sa Panginuun: “Kantahan niku ti Panginuun dahil lubus siya magpanalu. Iyinamut niya sa dagat ti manga kabayu hanggan ti manga masakyan siyun.

² Ti Panginuun ti magpakaun sa kangku bisug, ag siya kang pagkantahun. Siya ti nagribri sa kangku. Siya kang Diyus, dayawun niku siya. Siya ti Diyus niku ama, pag-ipaabwat niku siya.

³ Panginuun kay ngaran, usa siya ka manuggira.

⁴ Iyinamut niya sa dagat ti manga kalisa hanggan ti manga sundalu hari Ihiptu. Nalimus ti pinakamadunung pag manga takinan hari Ihiptu sa Dagat Marara.

⁵ Nalimus sida sa abasad pag danum; nitalnud sida sa kaabasad-basadan parihu sa usa ka batu.

⁶ Panginuun, lubus gid kanmu kamaskihan; sa panab-anan inda, rinunut nimu ti manga kalaban.

⁷ Sa kanmu kamaskihan rinuris nimu ti maglaban sa kanmu. Pag-iparanas nimu sa kanda kanmu pangagalit, parihu sida sa uhut magkasunug.

⁸ Sa usa lang ka uyup nimu, naayaw ti danum. Ti magpaywas danum napinpin ag tinmindug ga alad batu; namara ti abasad pag dagat.

⁹ Magkun ti kalaban magpayabang, ‘Lagsun niku sida ag dakpun; ayaw-ayawun niku kanda kayamanan ag pasawaan niku kang sadili. Gabutun niku kang baladaw ag rurisun sida.’

¹⁰ Dapat sa usa lang nimu ka uyup, nalimus sida sa dagat. Nitalnud sida sa kaabasad-basadan parihu sa timga.

¹¹ Panginuun, si unu waya pag diyus ti parihu sa kanmu? Unman kawu may kaparihu sa kabanalan ag kamaskihan. Kawu lang ti Diyus ti magbuwat makadululaw pag bagay!

¹² Sa panab-anan nimu kamaskihan, kinaun daga kanmi manga kalaban.

¹³ Sa panab-anan nimu parargu pag pagmahal, ibahan nimu kanmu irinibri pag nasakupan. Sa panab-anan nimu bisug, ibahan nimu sida sa banal nimu pag ulian.

¹⁴ Madnugan inda manga nasyun ag takigan sida sa dala. Dalaun gid masyadu ti manga Pilistiyu.

¹⁵ Ti manga takinan Idum ag Muab takigan sa dala, ag ti manga takinan Kanaan himatayun sa dala.

¹⁶ Tutuu, dalaun gid sida. Sa panab-anan nimu bantug pag kamaskihan, bumaliw sida ga batu unman makatandug, tugka sa makalawuy kanmu irinibri pag nasakupan, Panginuun.

¹⁷ Daran-un nimu kanmu nasakupan sa kanmu daga, bag-u ipatahan nimu sida sa magkaapu nimu pag bantud — ti binwat nimu ulian pag rugar, Panginuun, ti Balay Diyus kawu gid ngap ti nagbuwat.

¹⁸ Humari kawu, Panginuun, hanggan waya aban.”

¹⁹ Tinakbunan Panginuun danum ti manga kabayu, manga kalisa hanggan ti manga manugkabayu hari Ihiptu igu nakadipay ti manga Israilita sa mamara pag daga sa karaw-an dagat.

²⁰ Si Miryam usa ka purupita kay patar-ari ni Aarun, nam-ul pamakaransing ag pinangunahan niya ti manga babayi magpatunug pamakaransing hanggan magsayaw.

²¹ Kinanta ni Miryam inda pag kanta sa kanda: “Pagkanta kamu sa Panginuun dahil lubus siya magpanalu. Iyinamut niya sa dagat ti manga kabayu hanggan ti manga masakyan siyun.”

Ti Mapait pag Danum

²² Ginan sa Dagat Marara, dinara ni Muysis ti manga Israilita sa pangawakawaan Sur. Sa sulud tulu ka sirang, naglakaw sida sa pangawakawaan ag unman may nakitan danum.

²³ Pagka nakaras-ug sida sa Mara, nakakit sida danum, dapat unman nida mainum dahil mapait ti danum. (Inda ti dahilan nu hayga Mara kay ngaran pag rugar.)

²⁴ Dahil siyun, nagriklamu ti manga Israilita sa kan Muysis, “Hintay wadi kanta inmun?”

²⁵ Nakan nanhagad awat si Muysis sa Panginuun, ag ipinakakit Panginuun sa kanya ti usa ka pulud kayu. Iyinamut inda ni Muysis sa danum ag nab-ul kay pait danum. Ati pag-ipinakaun Panginuun ti surundanun hanggan ti kasuguan hampay subukan kanda magtupad sa kanya:

²⁶ “Nu buu tagipusuun kamu sumunud sa kangku, ti Panginuun niyu Diyus, ag bumuwat mayad sa kang magbantay, ag sundun kang manga kasuguan hanggan surundanun, unman kamu padaran-an niku manga panakitun parihu sa ipinadara niku sa Ihiptu. Aku ti Panginuun kanyu manugbulung.”

²⁷ Rinmas-ug sida sa Ilim, nu naan may 12 ka bulbugan ag 70 ka puun palma, ag kinmampu sida arani sa danum.