Pag-ighit 14 - Hanunuu

¹ Magkun ti Panginuun sa kan Muysis,

² “Sabihun nimu sa manga Israilita kuntay pagbalik sida sa may arani Pi Hahirut, sa karaw-an Migdul ag Dagat Marara. Bag-u pagkampu sida ati sa saruy dagat, sa atubangan Baal Sipun.

³ Hantupun hari Ihiptu magtalang-talang kamu ag unman yi makalwas sa pangawakawaan.

⁴ Paganitun niku kay tagipusuun ag bukadun niya kamu. Dapat rurisun niku siya hanggan kay manga sundalu. Sa panab-anan tunda madayaw aku, ag maalaman manga Ihipsiyu aku ti Panginuun.” Nakan binuwat inda manga Israilita.

⁵ Pagka nabaritaan hari Ihiptu nakaighit yi ti manga Israilita, nagbag-u kay naisipan hanggan kay manga may kangaranan tungkul sa pag-ighit manga Israilita. Magkun sida, “Hintay inda kanta binwat? Hayga kanta pinaighit ti manga Israilita? Taynguna, udyi kita may manga suruguun.”

⁶ Nakan inalistu hari Ihiptu kay kalisa panggira hanggan kay manga sundalu.

⁷ Dinara niya ti 600 mahusay pag manga kalisa Ihiptu hanggan ti iba waya kalisa. Kada kalisa pagdumarahan niya may kangaranan.

⁸ Pinaganit ngani Panginuun ti tagipusuun hari Ihiptu, nakan binukad niya ti manga Israilita maglakaw may matutum pag naisipan.

⁹ Ti manga kinmuyug sa pagbukad pag manga Ihipsiyu imaw ti manga sundalu hari, kaibahan kay manga manugkabayu masakyan sa kanda kabayu hanggan kalisa. Natakdan nida ti manga Israilita sa kanda pagkampuhan sa saruy Dagat Marara arani sa Pi Hahirut, sa atubangan Baal Sipun.

¹⁰ Pagka magpakarani yi ti hari Ihiptu hanggan kay manga sundalu, nakitan sida manga Israilita. Nakan masyadu gid nadala ti manga Israilita ag nanhagad awat sa Panginuun.

¹¹ Magkun sida sa kan Muysis, “Hayga sitay waya sa pangawakawaan nimu kami pag dinara hampay mamatay? Unman aw lugud may kalubngan ati sa Ihiptu? Hayga kanmu waya kami ipinalwas sa Ihiptu?

¹² Unman aw kanmi yi sinabi sa kanmu katpung waya sa Ihiptu, pabay-ani yi lang nimu kami buwatun panawuhun manga Ihipsiyu? Mas gustu waya nimi bumaliw panawuhun manga Ihipsiyu kaysa mamatay sitay sa pangawakawaan!”

¹³ Sinmagut si Muysis sa manga tawu, “Danga kamu magkadala. Pagpakarig-un kamu ag makitan niyu ti pagribri Panginuun sa kanyu sa inda pag sirang. Ti manga mag-akitan niyu pag Ihipsiyu taynguna balaw yi niyu makitan uman.

¹⁴ Ti Panginuun ti lumaban para sa kanyu. Nakan pag maariwaya kamu.”

¹⁵ Bag-u magkun ti Panginuun sa kan Muysis, “Hayga parargu kawu magpakahagad awat sa kangku? Sabiha nimu sa manga Israilita pagparargu sida sa paglakaw.

¹⁶ Antayan kanmu sugkud sa dagat hampay maayaw ti danum ag makadipay ti manga Israilita sa mamara pag daga.

¹⁷ Paganitun niku ti tagipusuun manga Ihipsiyu hampay bukadun nida kamu. Dapat rurisun niku ti hari Ihiptu hanggan kay manga sundalu, manga manugkabayu ag manga kalisa. Sa panab-anan tunda, madayaw aku.

¹⁸ Nu maruris yi niku sida, maalaman manga Ihipsiyu aku ti Panginuun.”

¹⁹ Bag-u napasalyu sa uryan ti anghil Diyus magpanguna sa nasakupan Israil, katida diman ti rurum ga tulduk.

²⁰ Nagpat-ung ti rurum sa tab-anan manga Israilita ag manga Ihipsiyu. Sa buu yabi, nagpakaun inda rayaw sa manga Israilita dapat nagpakaun kadudulman sa manga Ihipsiyu. Nakan nakalawuy ti yabi unman nakapakarani ti manga Ihipsiyu sa manga Israilita.

²¹ Bag-u ihinunat ni Muysis kay kamang sa dagat, ag naayaw ti dagat sa panab-anan mabisug pag durus kay ipinadara Panginuun ginan sa butlakan. Buu yabi naghuyup ti durus tugka sa binmaliw mamara ti panungaan dagat.

²² Nagdipay ti manga Israilita sa mamara pag daga, ti danum ga alad batu sa baliw-baliw saruy.

²³ Binukad sida manga sundalu Ihipsiyu kaibahan kay tanan kabayuhan hari, manga kalisa hanggan ti manga manugkabayu tugka karaw-an dagat.

²⁴ Dapat igu magkasurip yi, binantayan Panginuun ti manga sundalu taga Ihiptu ginan sa rurum ga tulduk ag apuy ga tulduk, bag-u ipinabuyu niya sida.

²⁵ Pinalubung niya ti manga gulung nida kalisa hampay makurian sida pumalakaw. Magkun ti manga Ihipsiyu, “Umatras yi lang kita sa manga Israilita, dahil ti Panginuun ti maglaban sa kanta para sa kanda.”

²⁶ Pagka nakadipay yi ti manga Israilita, magkun ti Panginuun sa kan Muysis, “Ihunat nimu kanmu kamang sa dagat hampay bumalik ti danum ag matap-ukan ti manga Ihipsiyu ag ti manga kalisa nida hanggan ti manga manugkabayu.”

²⁷ Nakan ihinunat ni Muysis kay kamang sa dagat, pagka binmutlak yi ti init, nagbalik ti dagat sa daan niya rugar. Ginmayak malagiw ti manga Ihipsiyu dapat ilinimus sida Panginuun sa dagat.

²⁸ Tinakbunan danum ti tanan sundalu hari Ihiptu maglagas sa manga Israilita hanggan kanda manga manugkabayu ag manga kalisa. Unman una di usa ti nakaribri.

²⁹ Dapat ti manga Israilita linmakaw sa mamara pag daga sa karaw-an dagat, bilang ga alad batu ti danum baliw-baliw habig.

³⁰ Sa ati pag sirang, irinibri Panginuun ti manga Israilita sa kamang manga Ihipsiyu. Ag nakitan manga Israilita ti manga bangkay manga Ihipsiyu mahuprasayan sa baybay.

³¹ Nakitan manga Israilita ti masyadu pag kamaskihan Panginuun kay ginamit laban sa manga Ihipsiyu. Ag dahil siyun, nagkaimaw sida dala sa Panginuun ag nagsarig sida sa kanya hanggan sa kay suruguun sa kan Muysis.