Pag-ighit 13 - Hanunuu

Ti Pagtalaga sa Panganay Lalaki

¹ Magkun ti Panginuun sa kan Muysis,

² “Italaga nimu sa kangku ti tanan panganay lalaki manga Israilita hanggan ti tanan lalaki pag panganay hayup. Kangku sida.”

³ Bag-u magkun si Muysis sa manga tawu, “Alalahana niyu inda pag sirang, ti sirang ipinalwas kamu ginan sa pagka panawuhun sa Ihiptu. Dahil ipinalwas kamu Panginuun sa panab-anan niya kamaskihan. Danga kamu magkaun tinapay may pamadaka.

⁴ Alalahana niyu inda pag sirang sa bulan Abib — ti sirang ipinalwas kamu sa Ihiptu.

⁵ Kailangan niyu inda alalahanun nu darahun yi kamu Panginuun sa daga manga Kananiyu, Hitiyu, Amuriyu, Hibiyu hanggan manga Hibusiyu. Inda pag daga, imaw ti itinaratu niya sa kanyu manga ginurang kay ipakaun sa kanyu. Marinu inda pag daga ag abunda.

⁶ Sa udas pag-alaala niyu, mangaun kamu tinapay unman may pamadaka sa sulud pitu ka sirang. Pagka sa ikapitu pag sirang, kanyu alalahanun ti pista para sa Panginuun.

⁷ Danga gid kamu magkaun tinapay may pamadaka sa sulud pitu ka sirang, kailangan unman gid may makitan pamadaka una naan asan sa kanyu rugar.

⁸ Sa udas niyu mag-alaala, itultul niyu sa kanyu manga anak kuntay pagbuwatun niyu inda bilang pag-alaala sa binwat Panginuun pagka ipinalwas kamu ginan sa Ihiptu.

⁹ Inda pag pista ga usa ka marka sa kanyu manga kamang ngatay sa kanyu manga bangas, imaw ti pumaalaala sa kanyu kailangan sabihun niyu sa iba ti sugu Panginuun dahil ipinalwas niya kamu ginan sa Ihiptu sa panab-anan niya kamaskihan.

¹⁰ Nakan alalahanun niyu inda pag pista sa itinagka pag panahun kada timpu.

¹¹ “Nu darahun yi kamu Panginuun sa daga manga Kananiyu, ti itinaratu niya ipakaun sa kanyu manga ginurang hanggan sa kanyu,

¹² italaga niyu sa Panginuun kanyu panganay pag anak lalaki hanggan ti lalaki pag panganay niyu hayup, dahil sa Panginuun tunda.

¹³ Mahimu lukatun ginan sa Panginuun ti lalaki pag panganay asnu sa panab-anan pagbalyu karanidu. Dapat nu unman niyu lukatun, kailangan matyun ti asnu sa panab-anan pagbari kay liug. Kailangan diman lukatun kanyu panganay pag anak lalaki.

¹⁴ “Aban nu paingan-un kamu niyu manga anak nu hayga niyu inda pagbuwatun, sabihun niyu sa kanda, ‘Sa panab-anan kamaskihan Panginuun, ipinalwas niya kami ginan sa Ihiptu nu naan kami pag binwat panawuhun.

¹⁵ Pagka unman waya kami pagpasnuan hari Ihiptu umighit, minatay Panginuun ti tanan panganay pag anak lalaki sa Ihiptu, una tawu una hayup. Tida kay dahilan nu hayga pag-italaga nimi sa Panginuun ti tanan lalaki pag panganay hayup bag-u paglukatun nimi kanmi panganay pag anak lalaki.’

¹⁶ Inda pag patayak layi parihu sa marka sa kanyu manga kamang ngatay sa kanyu manga bangas magpaalaala sa kanyu pagka ipinalwas kamu Panginuun sa Ihiptu sa panab-anan niya kamaskihan.”

Ti Pagdipay manga Israilita sa Dagat Marara

¹⁷ Pagka pinaighit yi hari Ihiptu ti manga Israilita, unman sida ipinalakaw Diyus sa dalan atag sa daga manga Pilistiyu, una tida ti pinakaarani pag dalan. Dahil magkun ti Diyus, “Nu may atubangun girahan ti manga Israilita, barang bumag-u waya kanda isip ag bumalik sida sa Ihiptu.”

¹⁸ Nakan ipinaliku sida Diyus sa pangawakawaan atag sa Dagat Marara. Armadu ti manga Israilita para sa girahan pagka nighit sida ginan sa Ihiptu.

¹⁹ Dinara ni Muysis kay manga but-ul ni Husi, angay sa ipinasumpa kaybi ni Husi imaw ti buwatun manga Israilita. Magkun kaybi si Husi, “Pihu gid palpasan kamu Diyus. Nu mangyari yi tunda, daran-a niyu kang manga but-ul sa kanyu pag-ighit ginan sa inda pag rugar.”

²⁰ Pagka nighit sida sa Sukut, nagkampu sida sa Itam, sa katugkaan pangawakawaan.

²¹ Nu sa sirang, paggiyahan sida Panginuun sa panab-anan rurum ga tulduk, ag nu sa yabi paggiyahan sida apuy ga tulduk magpakaun rayaw sa kanda, hampay makalakaw sida una sirang una yabi.

²² Pirmi mag-una sa kanda nu sirang ti rurum ga tulduk ag nu yabi waydi ti apuy ga tulduk.