Pag-ighit 12 - Hanunuu

Ti Paglawuy Anghil

¹ Magkun ti Panginuun sa kanda ni Muysis ag ni Aarun ati sa Ihiptu,

² “Taynguna ginan, inda pag bulan ti un-an pag bulan timpu para sa kanyu.

³ Paalaman niyu sa buu kalamalayan Israil kuntay sa ikasampulu pag sirang sa inda pag bulan, pag-alistu ti kada magtal-anakan usa ka karanidu ngatay kambing.

⁴ Nu diit lang ti usa ka magtal-anakan ag unman makatabu usa ka karanidu, tungaan sida sa kay kamalay. Tungaun nida inda angay sa kayamuun nida ag angay diman sa makaun kada usa ka tawu.

⁵ Kailangan piliun niyu ti lalaki pag kambing ngatay karanidu, usa ka timpu di waya kay idad, ag unman may alangan.

⁶ Alagaun niyu inda tugka sa malambung ika-14 pag sirang sa inda pag bulan, dahil sa ati pag udas iyawun buu kalamalayan Israil inda pag manga hayup.

⁷ Bag-u pagbuul kamu kay dugu ag payidan sa tungud hanggan sa habig bakalan manga sabian balay nu naan niyu kan-un inda pag manga karanidu.

⁸ Sa ati pag yabi, kanyu kan-un sinugba karanidu, marapait pag urupiun hanggan tinapay unman may pamadaka.

⁹ Danga niyu pagkan-a latuy ngatay ginulay ti taguban, nu unman sugbahun niyu inda bilugan kaibahan ti ulu, lulud hanggan ti manga sa sulud bilug.

¹⁰ Tabuhun niyu inda, ag nu may masawad sa surip, sunuga yi.

¹¹ Sa kanyu magkaun, kailangan alistu yi kamu umighit. Isulung yi niyu kanyu manga lapak ag pag mahiyaptan yi sa kanyu sugkud. Kadali kamu magkaun. Inda ti Pista Pag-alaala sa Karibrihan kailangan alalahanun niyu bilang pagkilala sa kangku.

¹² “Sa ati pag yabi, lumawuy aku sa Ihiptu ag matyun niku ti tanan panganay pag anak lalaki manga Ihipsiyu hanggan ti lalaki pag panganay nida hayup. Parusahan niku ti tanan diyus Ihiptu. Aku ti Panginuun.

¹³ Ti dugu ipinayid niyu sa bakalan sabian imaw ti tanda kamu magpangulian ati pag balay. Nu makitan niku ti dugu, lawyan lang niku kanyu balay, nakan unman may sarut rumas-ug sa kanyu nu parusahan niku ti manga taga Ihiptu.

¹⁴ “Kailangan kanyu tandaan inda pag sirang hanggan aban. Idaus niyu inda timpu-timpu bilang pista pagkilala sa kangku. Inda pag surundanun kanyu sundun tugka sa sunud pag manga sinulput tawu.

¹⁵ Sa sulud pitu ka sirang, kumaun kamu tinapay unman may pamadaka. Sa un-an pag sirang, bul-a niyu ti tanan pamadaka sa kanyu balay, dahil una si unu ti kumaun tinapay may pamadaka ginan sa un-an tugka sa ikapitu pag sirang balaw yi sakup sa Israil.

¹⁶ Sa un-an ag sa ikapitu pag sirang, pagtiripun kamu hampay sumamba sa kangku. Danga kamu magtarabahu sa tida pag manga sirang, purya lang sa mag-alistu kanyu karan-unun, inda lang ti mahimu niyu buwatun.

¹⁷ “Idaus niyu ti Pista Tinapay Unman may Pamadaka, dahil magpaalaala inda sa kanyu katpung ipinalwas niku kanyu buu nasakupan ginan sa Ihiptu. Idaus niyu inda hanggan aban bilang surundanun kailangan niyu tupadun tugka sa sunud pag manga sinulput tawu.

¹⁸ Umpisahi niyu idaus inda baliwa sa malambung ika-14 pag sirang sa un-an pag bulan tugka sa malambung ika-21 pag sirang, kailangan kumaun kamu tinapay unman may pamadaka.

¹⁹ Sa sulud pitu ka sirang, kailangan unman may makitan pamadaka sa kanyu balay. Una si unu ti kumaun tinapay may pamadaka, Israilita man ngatay balaw Israilita, balaw yi sakup sa Israil.

²⁰ Sa udas pista danga gid kamu magkaun tinapay may pamadaka, una naan katpung kamu pag mag-uli.”

²¹ Bag-u ipinatawag ni Muysis ti tanan paggurangunun sa Israil, ag sinabihan, “Sabihun niyu sa tanan magtal-anakan niyu kuntay pagbuul sida karanidu ngatay kambing ag iyawun nida hampay idaus ti Pista Pag-alaala sa Karibrihan.

²² Patiktikun niyu kay dugu sa malukung. Pagbuul kamu manga sanga isupu bag-u sugmawan sa dugu, ag payidi kanyu tungud hanggan habig bakalan manga sabian. Danga may magluwas sa kanyu balay tugka surip.

²³ Dahil lumawuy ti Panginuun sa Ihiptu hampay matyun ti manga panganay pag anak lalaki manga taga Ihiptu. Dapat nu makitan Panginuun ti dugu sa tungud ag sa habig bakalan niyu sabian, lawyan lang niya kanyu balay ag balaw pasnuan ti Manugpapas sumulud sa balay ag matyun kanyu manga panganay lalaki.

²⁴ Inda pag surundanun kailangan kanyu sundun hanggan niyu manga linahi tugka aban.

²⁵ Iparargu di niyu ti patayak layi nu nakaslud yi kamu sa daga itinaratu Panginuun ipakaun sa kanyu.

²⁶ Nu mamaingana kanyu manga anak kuntay hintay kay ibug sabihun inda pag patayak layi,

²⁷ kanyu isagut: ‘Inda Pista Pag-alaala sa Karibrihan bilang pagkilala sa Panginuun, dahil linawyan lang niya ti manga balay Israilita sa Ihiptu katpung minatay niya ti panganay anak lalaki manga Ihipsiyu.’ ” Pagkatapus bagaw ni Muysis, linmuhud ti manga Israilita ag nagsamba sa Panginuun.

²⁸ Sinunud nida ti isinugu Panginuun sa kanda ni Muysis ag ni Aarun.

²⁹ Pagka karaw-an yi yabi, minatay Panginuun ti tanan panganay pag anak lalaki sa Ihiptu, ginan sa panganay hari Ihiptu, ti umilis sa kay pagkahari, tugka sa panganay manga pirisu ati sa pirisuhan. Minatay diman niya ti tanan panganay manga hayup.

³⁰ Pagka sa ati pag yabi, nimata ti hari Ihiptu hanggan kay manga may kangaranan, ag ti tanan Ihipsiyu. Ag nasaydan ti matnug pag lulumian sa Ihiptu, dahil unman gid may balay balaw namatyan.

³¹ Tunda diman pag yabi ipinatawag hari Ihiptu sida ni Muysis ni Aarun ag sinabi, “Pag-ighit yi kamu! Tayaki yi niyu kang nasyun. Pag-ighit yi kamu ag pagsamba sa Panginuun, angay sa pag-ipakihampang niyu.

³² Daran-a niyu kanyu manga hayup, angay diman sa kanyu pag-ipakihampang, ag pag-ighit yi kamu. Dapat pakihampangi di maan niyu kanyu Diyus kuntay kaawai di aku!”

³³ Pag-apurahun manga Ihipsiyu ti manga Israilita sa pag-ighit gin sa kanda nasyun, dahil magsabi sida, “Nu unman kamu umighit, mamatay kami tanan!”

³⁴ Nakan dinara manga Israilita ti manga kinamas arina unman may pamadaka nakapauli sa palaulian. Sinaput nida inda sa kanda manga rutay ag pinas-an.

³⁵ Sinunud manga Israilita ti sinabi sa kanda ni Muysis kuntay paghagad sida sa manga Ihipsiyu manga pamarinu pilak ag bulawan, hanggan manga rutay.

³⁶ Ipinahintulut Panginuun bumaliw mayad ti nalub-anan manga Ihipsiyu sa manga Israilita, nakan ipinakaun manga Ihipsiyu ti manga paghagadun nida. Sa kainda pag paraan, nabul-an nida kasiyunan ti manga Ihipsiyu.

³⁷ Linmakaw ti manga Israilita ginan sa Ramisis atag sa Sukut. Manga 600,000 tanan ti lalaki, balaw waya kabilang ti manga babayi ag manga anak.

³⁸ Mayamu diman manga day-uhan ti kinmuyug sa kanda ag mayamu kanda dinara hayup.

³⁹ Pagka pinmat-ung sida hampay mangaun, tinama nida ti tinapay unman may pamadaka ginan sa kinamas arina kanda dara ginan sa Ihiptu. Unman inda napaulian pamadaka dahil pag-apurahun yi sida pagpaighitun manga Ihipsiyu ag udyi sida may udas mag-alistu kanda karan-unun.

⁴⁰ Nangulian ti manga Israilita sa Ihiptu 430 ka timpu.

⁴¹ Sa uryan gid pag sirang 430 pag timpu, nighit ti buu nasakupan Panginuun ginan sa Ihiptu.

⁴² Katpung nighit yabi ti manga Israilita sa Ihiptu, giniyahan sida Panginuun buu yabi. Nakan sa ati diman pag yabi, kada timpu magpapuyat ti manga Israilita bilang pagkilala sa Panginuun ag buwatun nida inda tugka sa sunud pag manga sinulput tawu.

Ti manga Surundanun tungkul sa Pista Pag-alaala sa Karibrihan

⁴³ Magkun ti Panginuun sa kanda ni Muysis ag ni Aarun, “Inda ti surundanun tungkul sa Pista Pag-alaala sa Karibrihan: “Ti manga day-uhan unman kailangan kumaun manga karan-unun inalistu sa inda pag pista.

⁴⁴ Makakaun ti tanan binili pag panawuhun nu tinuri yi sida,

⁴⁵ dapat balaw mahimu kumaun ti manga upahan pag manugtarabahu ag ti manga day-uhan.

⁴⁶ “Kailangan inda kan-un sa sulud balay nu naan pag-iinalistu; balaw mahimu ipalwas sa balay ti taguban, ag danga pag baria kay manga but-ul.

⁴⁷ Kailangan inda tupadun buu nasakupan Israil.

⁴⁸ “Nu may day-uhan magpangulian kaibahan niyu magkaibug mag-alaala sa Pista Pag-alaala sa Karibrihan sa pagkilala sa Panginuun, kailangan turiun dap ti tanan lalaki sa kay magtal-anakan. Bag-u mahimu yi siya makaibahan sa pag-alaala bilang usa ka tinubu Israilita. Dapat unman mahimu mag-alaala ti tawu balaw tinuri.

⁴⁹ Inda pag surundanun para sa tanan — sa manga tinubu Israilita hanggan sa manga day-uhan magpangulian kaibahan niyu.”

⁵⁰ Sinunud manga Israilita ti isinugu Panginuun sa kanda ni Muysis ag ni Aarun.

⁵¹ Pagka ati pag sirang, ipinalwas Panginuun ti buu nasakupan Israil ginan sa Ihiptu.