Pag-ighit 10 - Hanunuu

Ti Sarut manga Apan

¹ Magkun ti Panginuun sa kan Muysis, “Pag-ati kawu sa hari Ihiptu dahil pinaganit niku kay tagipusuun hanggan ti tagipusuun niya manga may kangaranan, hampay parargu niku maipakakit sa kanda kang manga makadululaw.

² Ag hampay maitultul niyu sa kanyu manga anak hanggan manga laki nu kabitay niku pinarusahan ti manga Ihipsiyu ag nu kabitay aku nagbuwat makadululaw sa kanda. Sa kainda pag paraan, maalaman niyu aku ti Panginuun.”

³ Nakan nag-atag sida ni Muysis ni Aarun sa hari Ihiptu bag-u sinabi sa kanya, “Inda ti pagsabihun Panginuun, ti Diyus manga Hibriyu, ‘Tugka kapira kawu magpalabaw-labaw sa kangku? Paighita yi nimu kang nasakupan hampay makasamba sida sa kangku.

⁴ Nu balaw nimu sida paighitun, aldaw mamadara aku manga apan sa kanmu nasyun.

⁵ Sa kayamuun nida, udyi makitan ti daga. Kan-un nida ti manga natayak pag manga tanum balaw nadaut sa uran yilu, hanggan diman ti tanan kakayuhan niyu.

⁶ Mapnu manga apan kanmu balay hari, ti balay nimu manga may kangaranan hanggan nasakupan. Udwaya may nangyari ga kainda sa tultulanun Ihiptu ginan sa rinmas-ug kanyu ginurang tugka taynguna.’ ” Igu nakasabi nighit yi sida.

⁷ Magkun ti manga takinan hari sa kanya, “Tugka kapira niyu pagpabay-anan inda pag kakurian magpakuri sa kanta? Paighita yi duy nimu ti manga Israilita, hampay makasamba sida sa Panginuun nida Diyus. Unman aw mag-akitan nimu nadaut yi ti Ihiptu?”

⁸ Nakan ipinabalik maan sida ni Muysis ni Aarun sa hari Ihiptu. Magkun ti hari Ihiptu sa kanda, “Mahimu yi kamu umighit hampay makasamba kamu sa Panginuun niyu Diyus. Dapat sabiha dap niyu sa kangku nu si unu kanyu ibahun sa kanyu pag-ighit.”

⁹ Sinmagut si Muysis, “Umighit kami tanan, anak ag gurangun. Daran-un nimi kanmi manga anak ag manga hayup, dahil tanan kami mandaus pista para sa Panginuun.”

¹⁰ Magkun ti hari Ihiptu may tapil puya, “Mana ibahan kamu Panginuun nu paighitun niku kamu kaibahan kanyu magtal-anakan! Pihu yi may imaw kamu paggayakun daut. Lumihus siguru kamu.

¹¹ Unman aku pumasnu! Nu gustu gid niyu umighit, manga lalaki lang ti mahimu guminan hampay mansamba sa Panginuun.” Bag-u pinaighit yi sida ni Muysis ni Aarun sa atubangan hari Ihiptu.

¹² Magkun ti Panginuun sa kan Muysis, “Paabwatan kanmu sugkud baliwa sa daga Ihiptu hampay rumas-ug ti manga apan, ag kan-un ti manga natayak pag tanum unman nadaut sa pag-uran yilu.”

¹³ Nakan ipinaabwat ni Muysis kay sugkud baliwa sa daga Ihiptu, buu sirang ag yabi nagpadara ti Panginuun durus ginan sa butlakan. Pagkasurip, nagdara ti durus manga apan

¹⁴ ag nagras-ug inda sa buu Ihiptu. Udwaya may nangyari ga kainda sa buu Ihiptu kaybi ginan hanggan aban.

¹⁵ Nagrugpu inda sa buu daga tugka sa nanmiru ti daga. Kinaun nida ti natayak pag manga tanum balaw nadaut sa uran yilu hanggan ti tanan burak kayu. Unman gid may natayak tanum sa buu Ihiptu.

¹⁶ Madali ipinab-ul hari Ihiptu sida ni Muysis ni Aarun. Sinabi niya sa kanda magkun, “Nagkasala aku sa Panginuun niyu Diyus hanggan sa kanyu.

¹⁷ Patawada maan aku, ag pagdarangin kamu sa Panginuun niyu Diyus kuntay bul-a ti makamatay pag sarut ginan sa kangku.”

¹⁸ Nighit si Muysis ag nandarangin sa Panginuun.

¹⁹ Sinmagut ti Panginuun sa panab-anan pagpadara mabisug pag durus ginan sa isalpan, ag ipinayag ti manga apan sa Dagat Marara. Unman may nasawad una di usa ka apan sa Ihiptu.

²⁰ Dapat pinaganit di maan Panginuun kay tagipusuun hari Ihiptu, inampara di gid ti manga Israilita.

Ti Sarut Kadudulman

²¹ Magkun ti Panginuun sa kan Muysis, “Antayan kanmu kamang atag tungud sa langit hampay masaput kadudulman ti daga Ihiptu.”

²² Nakan inantay ni Muysis kay kamang atag tungud sa langit, pingit ngani pag dulum sa buu Ihiptu sa sulud tulu ka sirang.

²³ Unman may linmuwas manga Ihipsiyu ginan sa kanda manga balay sa sulud tulu ka sirang dahil unman nida mag-akitan ti kada usa sa kanda. Dapat marayaw di sa rugar pag-ulianan manga Israilita.

²⁴ Susun ipinatawag hari Ihiptu si Muysis bag-u magkun, “Ta, pagsamba yi kamu sa Panginuun. Daran-a niyu hanggan kanyu magtal-anakan, dapat tayaki kanyu manga hayup.”

²⁵ Dapat sinmagut si Muysis, “Kailangan daran-un di nimi kanmi manga hayup hampay makapakaun kami manga handug, hanggan manga handug pagsunugun para sa Panginuun nimi Diyus.

²⁶ Daran-un gid nimi kanmi hayup; unman may tayakan kami una di usa. Dahil balaw nimi alam nu hintay pag hayup ti pagkaibgan Panginuun kanmi ihandug. Maalaman lang nimi inda nu ati yi kami.”

²⁷ Dapat pinaganit di maan Panginuun kay tagipusuun hari Ihiptu, ag unman niya sida pinalakaw.

²⁸ Magkun ti hari Ihiptu sa kan Muysis, “Pag-ighit yi kawu ginan sa kang atubangan! Danga yi kawu magpakakit sa kangku, dahil nu makitan niku kawu kang ipamatay.”

²⁹ Sinmagut si Muysis, “Nu katida kanmu gustu, balaw yi aku pumakakit uman sa kanmu.”