Pag-ighit 1 - Hanunuu

Pag-unuunuhun ti manga Israilita sa Ihiptu

¹ Inda kay manga anak lalaki ni Israil (imaw diman si Hakub) ti kaibahan niya atag sa Ihiptu, kaibahan kanda magtal-anakan:

² Sida ni Rubin, ni Simyun, ni Libi, ni Huda,

³ ni Isakar, ni Sabulun, ni Binhamin,

⁴ ni Dan, ni Niptali, ni Gad, ag ni Asir.

⁵ Si Husi daan di ati sa Ihiptu. 70 ti tanan-tanan linahi ni Hakub katpung nag-atag siya sa Ihiptu.

⁶ Rinmas-ug ti udas namatay si Husi hanggan kay manga patar-ari ag kadungan pag manga tawu,

⁷ dapat madali nagyamu kanda lahi. Dahil sa masyadu mayamu sida, nas-ub yi harus ti daga Ihiptu.

⁸ Dapat pagka dugay nagkaimaw bag-u hari ti Ihiptu, unman may alam siya tungkul sa kan Husi.

⁹ Magkun siya sa kay manga nasakupan, “Malu, bantayi niyu, masyadu yi aduk ti manga Israilita, nakan mahawag kanta kahamtangan.

¹⁰ Manhanap kita paraan hampay balaw yi sida umaduk. Dahil barang sa udas girahun kita pabliwa sida sa kalaban ag lumaban sa kanta hampay makaighit ginan sa kanta nasyun.”

¹¹ Nakan nagpili sida mahigpit pag manga mandumara sa manga Israilita hampay pakurianan sida ag patarabahuun marabuyat. Ipinabwat sa manga Israilita ti manga banwa Pitum ag Ramisis hampay buwatun balay haramnuan hari Ihiptu.

¹² Dapat madi pagpakurianan sida, mag-amat di magyamu sida ag naglantap sa Ihiptu. Lalu gid nadala ti manga taga Ihiptu sa kanda.

¹³ Nakan ngani, inamat waya gid nida pinakurianan ti manga Israilita.

¹⁴ Unman sida may pangaawa sa manga Israilita. Pagpakurianan nida ti manga Israilita sa panab-anan pagbuwat manga daga pinaganit hanggan kay panmahuput siyun, bag-u pag-ipatarabahu mahigpit sa tanman.

¹⁵ Pagka sa usa ka sirang, magkun ti hari Ihiptu sa manga manugpaanak Hibriyu sa kanda ni Sipra ag ni Puwa,

¹⁶ “Nu mamaanak kamu manga babayi Hibriyu, matya niyu nu lalaki ti anak, dapat nu babayi, pabay-ani niyu mabuhi.”

¹⁷ Dapat dahil magkadala sa Diyus ti manga manugpaanak, balaw nida sinunud ti sugu hari, bagkus ngap pinabay-anan nida mabuhi ti manga lapsag lalaki.

¹⁸ Nakan pinatawag hari Ihiptu ti manga manugpaanak ag pinaingana, “Hayga katida kanyu binuwat? Hayga kanyu pinabay-anan mabuhi ti manga lapsag lalaki?”

¹⁹ Sinmagut sida, “Ti manga babayi Hibriyu balaw parihu sa manga babayi Ihipsiyu; malpus lang sida mag-anak bag-u di kami magras-ug, nakaanak yi sida.”

²⁰ Nakan pinapaladan Diyus ti manga manugpaanak. Ti manga Israilita mag-amat di gid magyamu.

²¹ Ag dahil magkadala sa Diyus ti manga manugpaanak, pinakan-an Diyus sida sadili magtal-anakan.

²² Pagka sa uryan, nagsugu ti hari Ihiptu sa tanan niya nasakupan magkun, “Iyamut niyu sa Sapa Nilu ti tanan ilusad pag lapsag lalaki manga Israilita, dapat pabay-ani niyu mabuhi ti manga babayi pag lapsag.”