Nihimyas 9 - Hanunuu

Itinultul manga Israilita Kanda manga Kasalanan

¹ Pagka sa ika-24 pag sirang sa tunda diman pag bulan, nagtipun ti manga Israilita hampay balaw manhandum karan-unun. Nanrutay sida manga saku ag pinaulian dapug kanda manga ulu.

² Balaw nida ipinaminsan ti manga balaw Israilita. Nagtindug sida ag itinultul kanda manga kasalanan hanggan ti manga kasalanan nida manga ginurang.

³ Matindugan sida sa sulud tulu ka udas habang pagbasahun sa kanda ti Kasuguan Panginuun nida Diyus. Sa sulud diman tulu ka udas, itinultul nida kanda manga kasalanan ag nagsamba sa Panginuun nida Diyus.

⁴ Ti iba pag manga Libita matindugan sa may agdan, magdarangin mabisug sa Panginuun nida Diyus. Sida ni Hisuwa, ni Bani, ni Kadmiyil, ni Sibanyas, ni Buni, ni Siribya, ni Bani ag ni Kinani.

⁵ Ti manga nagtawag pag Libita sa manga tawu hampay sumamba sida ni: Hisuwa, ni Kadmiyil, ni Bani, ni Hasabniya, ni Siribya, ni Hudiya, ni Sibanyas ag ni Pitahiyas. Magkun sida, “Pagtindug kamu ag dayawun ti Panginuun niyu Diyus magkabuhi sa unman may katapusan!” Bag-u magkun sida, “Panginuun, kadayaw-dayaw kanmu kamaskihan! Unman inda matupngan nimi pagdayaw.

⁶ Kawu ti Panginuun. Binwat nimu ti kalangitan, ti daga, ti dagat hanggan ti tanan asan sa kanda. Pagpakan-an nimu buhi ti tanan nimu linalang ag pagsambahun kawu manga anghil sa langit.

⁷ “Kawu ti Panginuun Diyus ti nagpili sa kan Abram ag nagpalwas sa kanya sa Ur, sakup manga Kaldiyu. Ag iningarnan nimu siya Abraham.

⁸ Nakitan nimu matinupadun siya sa kanmu, ag nagbuwat kawu kasunduan sa kanya ipakaun nimu sa kay manga linahi ti daga manga Kananiyu, Hitiyu, Amuriyu, Pirisiyu, Hibusiyu, hanggan manga Girgisiyu. Ag tinupad nimu kanmu taratu sa kanda, dahil matadlung kawu.

⁹ “Nakitan nimu ti pag-agwanta nimi manga ginurang sa Ihiptu. Nadnugan nimu ti paghagad awat nida sa kanmu katpung ati sida sa Dagat Marara.

¹⁰ Nagbuwat kawu manga makadululaw hanggan manga lilingutan pag manga bagay laban sa hari Ihiptu, hanggan sa tanan niya manga may kangaranan ag tawuhan, dahil magkaalaman nimu nu kabitay nida inapi kanmi manga ginurang. Ag kanmu ngaran bantug taynguna tugka.

¹¹ Sa atubangan nimu nasakupan tinunga nimu ti dagat ag sa karaw-an inda linmakaw sida sa mamara pag daga. Dapat linimus nimu ti manga kalaban maglagas sa kanda. Parihu sida sa batu nitalnud sa maghagunung pag dagat.

¹² Sa sirang, pag giyahan nimu kanmu nasakupan sa panab-anan rurum ga tulduk, ag nu yabi sa panab-anan apuy ga tulduk, hampay pakan-an rayaw sa kanda paglakawan.

¹³ “Nagdugsun kawu sa Bantud Sinai ginan sa langit ag nanhampang kawu sa kanda. Pinakan-an nimu sida kang-ud pag tudlu, ag mayad pag sugu hanggan manga surundanun.

¹⁴ Itinudlu nimu sa kanda ti kailangan buwatun tungkul sa Sirang Pamahari. Ag sinugu nimu sida sa panab-anan nimu manugsirbi sa kan Muysis, kuntay tupada kanmu manga sugu, manga surundanun, hanggan manga pag-itudlu.

¹⁵ Pagka linun-us sida, pinakan-an nimu sida karan-unun ginan sa langit, pagka inuwaw, pinainum nimu danum ginan sa batu. Sinabihan nimu sida sulda ag apuun ti daga kanmu itinaratu kuntay ipakaun nimu sa kanda.

¹⁶ Dapat sida kanmi manga ginurang nagmarapalabaw-labaw, maganit kay ulu, unman masinurundun sa kanmu manga sugu.

¹⁷ Dayu sida mamatingi sa manga pagsabihun nimu, ag pagkalimtan lang nida ti manga makadululaw nimu binwat sa kanda. Nagbaliw maganit kanda manga ulu, ag magsalumpang sida sa kanmu palakaw sa panab-anan pagpili takinan mandara sa kanda pabalik sa pagkapanawuhun sa Ihiptu. Dapat kawu mapinatawadun pag Diyus, maawaun, maalalahanun, balaw daldali magkagalit, ag mapagmahal. Nakan unman nimu sida pinabay-anan,

¹⁸ una magbuwat sida histuda baka, ag magkun, ‘Inda kanta diyus ti nagpalpas ag nagpalwas sa kanta sa Ihiptu.’ Masyadu gid kanda maglapastangan sa kanmu!

¹⁹ Dapat dahil sa kanmu daka pag pangaawa sa kanda, balaw nimu sida pinabay-anan sa pangawakawaan. Unman nimu bin-ul ti rurum ga tulduk maggiya sa kanda nu sirang, ag ti apuy ga tulduk magpakaun rayaw sa kanda paglakawan nu yabi.

²⁰ Ipinakaun nimu kanmu mayad pag Ispiritu hampay magtudlu sa kanda. Parargu nimu sida pagpakan-un mana, hanggan pinakan-an danum nu magkauwaw sida.

²¹ Ipinakaun nimu sa kanda ti manga pangangailangan nida sa sulud upatpulu ka timpu sa pangawakawaan, nakan unman gid sida kinurang una hintay. Balaw nadaan kanda manga rutay ag unman nabaga kanda manga lulud sa paglakaw.

²² “Pinapanalu nimu sida sa laban sa manga kaharian, manga nasyun, hanggan sa manga daga sa kanda palibut. Sinakup nida ti daga Hisbun pagdumarahan ni Hari Sihun hanggan ti daga Basan pagdumarahan ni Hari Ug.

²³ Pinayamu nimu kanda manga linahi, parihu sa manga pamgasan sa langit. Dinara nimu sida sa daga kanmu itinaratu sa kanda manga ginurang hampay suldun ag apuun.

²⁴ Ungud sinlud nida inda ag inapu. Pinapanalu nimu sida laban sa manga Kananiyu mag-ulian sa tunda pag daga. Ipinabahala nimu sa kanda ti manga Kananiyu hanggan kanda manga hari hampay mabwat nimu manga nasakupan ti gustu nida buwatun sa kanda.

²⁵ Sinakup nimu nasakupan ti manga may alad batu pag manga banwa hanggan ti abunda pag manga daga. Inapu diman nida ti manga balay punu mararinu pag manga bagay, manga bubun, manga ubasan, manga taranuman ulibu ag iba waya pag manga kayu magbururak. Nangaun sida tugka sa nabsug sida ag nagbaliw makurasug kanda bilug. Nakabaya sida sa mayad pag binwat nimu sa kanda.

²⁶ “Dapat madi katida, naglabag sida ag naglaban sa kanmu. Pinatlikudan nida kanmu Kasuguan, minatay nida kanmu manga purupita nagbutung sa kanda sa pagbalik-nalub-anan sa kanmu. Masyadu gid kanda paglapastangan sa kanmu!

²⁷ Nakan ipinabahala nimu sida sa kanda kalaban ti nagpakuri sa kanda. Dapat pagka magkakurian yi sida, nanhagad sida awat sa kanmu, pinatingihan diman nimu sida asan sa langit. Sa daka nimu pangaawa, pinakan-an nimu sida manga takinan manribri sa kanda sa kamang nida kalaban.

²⁸ “Dapat nu mayad yi ti kahamtangan nida, magbuwat yi maan sida daut sa kanmu atubangan. Ipinabahala nimu sida sa kamang manga kalaban nida hampay sakupun sida. Ag nu magdarangin maan sida hampay manhagad awat sa kanmu, pagpatingihan nimu sida asan sa langit. Ag sa kanmu pangaawa pirmi nimu sida pag-iribri.

²⁹ Pagpasandaman nimu sida kuntay pagtupad maan sa kanmu Kasuguan, dapat marapalabaw sida ag unman nida pagtupadun kanmu manga sugu. Nagsalan sida laban sa kanmu manga sugu magpakaun tutuu pag buhi sa magtupad inda. Sa kaganitan nida manga ulu nagpatlikud sida sa kanmu, ag dayu sida mamatingi sa kanmu.

³⁰ Sa kayamuun pag timpu, inagwanta nimu sida, bag-u pinasandaman sida Ispiritu nimu sa panab-anan manga purupita. Dapat unman nida inda binati, nakan ipinabahala nimu sida sa manga nasakupan sa palibut nida.

³¹ Dapat dahil sa daka nimu pangaawa, unman nimu sida pinabay-anan ngatay ipinadamhak lubus, dahil maawaun ag maalalahanun kawu, pag Diyus.

³² “Kawu kanmi Diyus makamaskihan ag tutuu makadululaw gid. Pagtupadun nimu kanmu kasunduan ag pag-ipakakit nimu kanmu pagmahal. Taynguna, unman pagpahalagaan kanmi manga pag-agwanta. Nag-agwanta kami tanan kanmu nasakupan, hanggan kanmi manga hari, manga takinan, manga manughandug, manga purupita hanggan manga ginurang, ginan waya sa panahun pinakurian kami manga hari Asirya tugka kainda.

³³ Matadlung kanmu binwat pagpihu sa kanmi. Matinupadun kawu sa kanmi, dapat kami inda nagbuwat kasalanan.

³⁴ Kanmi manga hari, manga takinan, manga manughandug, hanggan manga ginurang unman magtupad sa kanmu Kasuguan. Unman nida binati kanmu manga sugu hanggan manga pasandam.

³⁵ Una may imaw sida sadili pag kaharian, ag nakalakaw masyadu pag kaayadan, una pinakan-an nimu sida maluang ag abunda pag daga, unman diman sida magsirbi sa kanmu ag unman magpatlikud sa kanda daut pag manga kaugalian.

³⁶ Inda kay dahilan nakan kami manga panawuhun taynguna sa inda pag daga ipinakaun nimu sa kanmi manga ginurang, nu naan makakaun sida manga patubas ag iba waya mayad pag manga kalakal inda. Dapat taynguna, manga panawuhun di kami!

³⁷ Ti abunda pag manga patubas daga niatag sa manga hari kanmu pinili ti humari sa kanmi dahil sa kanmi manga kasalanan. Pagbuwatun nida ti gustu nida buwatun sa kanmi hanggan sa kanmi manga pag-alagaun pag hayup, ag masyadu kanmi pag-agwantahun.”

Nagbuwat Kasunduan ti manga Tawu

³⁸ “Dahil siyun, kami pag manga Hudiyu nagbuwat usa ka marig-un pag kasunduan. Isinurat inda ag pinirmahan nimi manga takinan, manga manughandug, hanggan manga Libita.”