Nihimyas 8 - Hanunuu

Binasa ni Isra ti Kasuguan

¹ nagtipun sida tanan sa Hirusalim may pagkarausa, ati sa buruybuyahan sa atubangan Sabian Atabug sa Danum. Hinagad nida sa kan Isra manugtudlu Kasuguan kuntay bul-a niya ag basahun ti Ribru Kasuguan ni Muysis ti isinugu Panginuun sa manga Israilita.

^2-3 Nakan pagka sa tunda pag sirang, ti un-an pag sirang sa ikapitu pag bulan, dinara ni Manug-asiwa Isra ti Kasuguan sa atubangan manga tawu — manga lalaki, manga babayi, hanggan manga kalay-awan mag-intindi yi. Binasa niya inda sa kanda mabisug ginan sa magbutlak init tugka sa karaw-an sirang, ati sa buruybuyahan sa atubangan Sabian Atabug sa Danum. Pinatingihan gid kaayad tanan ti Ribru Kasuguan.

⁴ Nagtindug si Isra sa abwat pag tirindugan kayu binuwat para sa tunda pag buruwatun. Sa kay sikun baliwa matindugan sida ni Matitiya, Sima, Anaya, Uryas, Hilkiyas ag si Maasiyas. Ag sa kay wala baliwa matindugan sida ni Pidaya, Misail, Malkiyas, Hasum, Hasbadana, Sakaryas, ag Misulam.

⁵ Mag-akitan si Isra tanan tawu dahil abwat kay pagtindugan. Ag pagka binukasan niya ti libru, tinmindug ti tanan tawu.

⁶ Dinayaw ni Isra ti Panginuun, ti makamaskihan pag Diyus! Bag-u sinmagut ti manga tawu, “Amin! Amin!” habang pag-ipaabwat nida kanda kamang. Bag-u nanluhud sida ag nagsamba sa Panginuun.

⁷ Pagka tinmindug yi ti manga tawu, ipinaliwanag sa kanda ti Kasuguan. Ti nagpaliwanag sa kanda ti manga Libita sida ni Hisuwa, Bani, Siribya, Hamin, Akub, Sabitay, Hudyas, Maasiyas, Kilita, Asariyas, Husabad, Hanan ag Pilaya.

⁸ Binasa nida ti Ribru Kasuguan Diyus bag-u ipinaliwanag kay kahulugan inda, hampay masalman manga tawu.

⁹ Habang magpatingi ti manga tawu sa pagsabihun sa Kasuguan, maglumi sida. Magkun sa kanda si Gubirnadur Nihimyas, si Manug-asiwa Isra ag ti manugtudlu Kasuguan, hanggan ti manga Libita magpaliwanag sa kanda Kasuguan, “Inda pag sirang banal sa Panginuun niyu Diyus, nakan danga kamu maglumi.”

¹⁰ Magkun waya gid si Nihimyas, “Pagdaus kamu, ag pagkaun masasarap pag manga karan-unun ag pag-inum masasarap pag manga irinmun. Pakan-i niyu ti manga unman may karan-unun, dahil inda pag sirang banal sa Panginuun. Ag danga kamu magkaarimputu, dahil ti kabayaan pag-ipakaun Panginuun makaparig-un sa kanyu.”

¹¹ Magkun diman ti manga Libita, “Paghim-ung kamu! Danga kamu magkaarimputu! Dahil banal inda pag sirang.”

¹² Nakan nuli ti tanan tawu hampay mangaun ag manginum bag-u mangayaw karan-unun sa iba. Nagdaus sida may kabayaan dahil naintindihan nida ti manga bagaw Diyus binasa sa kanda.

Ti Pista Pagpatindug manga Payag

¹³ Pagka sa ikadwa pag sirang sa tunda pag bulan, nagtipun sa kay atubangan ni Isra ti manga takinan manga magtal-anakan, ti manga manughandug hanggan ti manga Libita hampay mangadal waya tungkul sa Kasuguan.

¹⁴ Napintuan nida sa Kasuguan kuntay pag-isugu Panginuun sa panab-anan ni Muysis ti manga Israilita kailangan mangulian sa manga payag nu udas pista pagganapun kada ikapitu pag bulan.

¹⁵ Kailangan nida ipaalam sa Hirusalim hanggan sa iba waya nida manga banwa ti sugu Panginuun kuntay umati sida sa kabantudan ag bumuul manga sanga ulibu, mirtu, palma hanggan manga sanga maraybung pag kayu hampay buwatun manga payag, angay sa nakasurat sa Kasuguan.

¹⁶ Nakan nagbuul ti manga tawu manga sanga ag nagbuwat manga payag sa maratag pag atup nida manga balay, sa manga sugkadan nida manga balay, sa sugkadan Balay Diyus, sa buruybuyahan sa atubangan Sabian Atabug sa Danum, hanggan sa Sabian ni Ipraim.

¹⁷ Tanan sida ti nakabalik ginan sa pagkabihag namuwat manga payag ag ati pag nuli. Unman waya nida nabuwat ti kainda katpung umpisa panahun ni Huswi kay anak ni Nun; subra gid kanda kabayaan.

¹⁸ Sirang-sirang pagbasahun ni Isra sa manga tawu ti Ribru Kasuguan Diyus, ginan sa umpisa pag sirang tugka sa katapusan pag sirang pista. Idinaus nida ti pista pitu ka sirang, ag pagka sa ikawalu pag sirang, nagtipun sida para mansamba sa Panginuun, angay sa Kasuguan.