Nihimyas 7 - Hanunuu

Nagpauli manga may Kangaranan sa Hirusalim

¹ Pagka natapus yi ti alad batu banwa, ag naitakud yi ti manga sabian, itinigana sa katungkulan nida ti manga manugguwardiya sa manga puwirtahan banwa, ti manga manugkanta sa Balay Diyus, hanggan ti manga Libita.

² Ipinakaun niku ti katungkulan sa pagdumara sa Hirusalim sa kang patar-ari sa kan Hanani kaibahan si Hananiyas kumandir manga guwardiya sa mapag-un pag kampu. Pinili niku si Hananiyas dahil magkapiyaran siya ag maggalang sa Diyus higit sa tanan.

³ Magkun aku sa kanda, “Danga niyu pagpabay-ani mabukasan ti manga puwirtahan banwa nu karaw-an sirang, una may manga guwardiya waya magtanud. Kailangan saraduhan gid inda ag agadan. Pagpauli diman kamu manga guwardiya ginan sa manga nasakupan Hirusalim. Kay iba sa kanda paulian sa alad batu banwa arani sa kanda manga balay, ag kay iba waydi paulian sa iba waya pag bahagi alad batu.”

Ti Listahan manga Tawu Binmalik ginan sa Pagkabihag

⁴ Ati katpung, pagkaluang ti banwa Hirusalim dapat pira-pira lang ti manga mag-uli ati ag pira-pira diman ti manga balay.

⁵ Nakan ipinaisip sa kangku Diyus tipunun ti manga takinan, manga may kangaranan, hanggan ti iba waya pag manga mag-uli hampay mailista sida angay sa kada magtal-anakan. Nakitan niku ti listahan manga magtal-anakan un-an binmalik ginan sa pagkabihag. Inda ti nakalista ati:

⁶ Inda ti manga Israilita sa purubinsiya Huda ti binihag kaybi ni Hari Nabukudunusur ag dinara sa Babilunya. Taynguna, nag-ighit sida sa tunda pag rugar ag nagbalik yi sa Hirusalim hanggan sa kanda sadili manga banwa sa Huda.

⁷ Ti nagpanguna sa kanda pagbalik sida ni Surubabil, Hisuwa, Nihimyas, Asariyas, Raamiyas, Nahamani, Murdukyu, Bilsan, Mispirit, Bigbay, Nihum ag Baana. Inda ti listahan nasakupan Israil nakabalik ginan sa pagkabihag:

^8-25 Manga linahi nida ni: Parus 2,172 Sipatyas 372 Ara 652 Pahat Muab (ginan sa manga magtal-anakan ni Hisuwa ag ni Huab) 2,818 Ilam 1,254 Satu 845 Sakay 760 Binuy 648 Bibay 628 Asgad 2,322 Adunikam 667 Bigbay 2,067 Adin 655 Atir (iningarnan diman Isikyas) 98 Hasum 328 Bisay 324 Harip 112 Gibyun 95

^26-38 Inda kay bilang manga tawu nakabalik ginan sa pagkabihag, kanda manga ginurang mag-uli sa manga magdasun pag banwa: Bitlihim ag Nitupa 188 Anatut 128 Bit Asmabit 42 Kiryat Harim, Kipira, ag Biirut 743 Rama ag Giba 621 Mikmas 122 Bitil ag Hay 123 Nibu 52 Ilam 1,254 Harim 320 Hiriku 345 Lud, Hadid, ag Unu 721 Sinaa 3,930

^39-42 Inda ti manga sinulput manga manughandug nakabalik ginan sa pagkabihag: Manga sinulput nida ni: Hidaya (ginan sa magtal-anakan ni Hisuwa) 973 Imir 1,052 Pasur 1,247 Harim 1,017

^43-45 Inda ti manga sinulput manga Libita nakabalik diman ginan sa pagkabihag: Manga sinulput nida ni Hisuwa hanggan ni Kadmiyil (ginan sa magtal-anakan ni Hudabyas) 74 Manga manugkanta sa Balay Diyus kay manga sinulput ni Asap 148 Manga guwardiya sabian Balay Diyus kay manga sinulput nida ni: Salum, Atir, Talmun, Akub, Hatita 138

^46-56 Inda ti manga sinulput manga suruguun sa Balay Diyus nakabalik diman ginan sa pagkabihag: Manga sinulput ni Siha, Hasupa, Tabaut, Kirus, Sia, Padun, Libana, Hagaba, Salmay, Hanan, Gidil, Gahar, Riayas, Risin, Nikuda, Gasam, Usa, Pasya, Bisay, Miyunim, Nipusisim, Bakbuk, Hakupa, Harur, Baslit, Mihida, Harsa, Barkus, Sisara, Tima, Nisyas ag Hatipa.

^57-59 Nakabalik diman ginan sa pagkabihag ti manga sinulput manga suruguun ni Sulumun: Ti manga sinulput ni Sutay, Supirit, Pirida, Haala, Darkun, Gidil, Sipatyas, Hatil, Pukirit Hasibaim ag Amun.

⁶⁰ Ti kabuuhan bilang manga sinulput manga suruguun sa Balay Diyus hanggan manga sinulput manga suruguun ni Sulumun, 392.

⁶¹ May imaw diman nakabalik sa Hirusalim ginan sa manga banwa Til Mila, Til Harsa, Kirub, Adun ag Imir. Dapat unman nida mapatutuuhanan kuntay sida ungud manga Israilita.

⁶² Inda sida ti manga sinulput ni Dilaya, Tubyas ag Nikuda. Sida 642 tanan.

⁶³ Unman diman mapatutuuhanan manga sinulput nida ni Habaya, Hakus ag ni Barsilay kuntay manga manughandug sida. (Pagka nangasawa si Barsilay, dinara niya kay ngaran niya manugang si Barsilay taga Gilyad.)

⁶⁴ Dahil ngani balaw nida mag-akitan ti listahan nida manga ginurang, balaw sida tinanggap kuntay manga manughandug.

⁶⁵ Sinabihan sida gubirnadur Huda balaw sida mahimu kumaun manga karan-unun ihinandug sa Diyus tugka sa unman may manughandug makapaingana sa Panginuun tungkul sa kanda pagkamanughandug sa panab-anan Urim ag Tunim.

^66-69 Ti kabuuhan bilang manga nakabalik ginan sa pagkabihag 42,360, balaw waya naibilang sitay ti manga suruguun nida lalaki ag babayi 7,337 hanggan manga manugkanta lalaki ag babayi 245. May dara sida 736 ka kabayu, 245 ka mula, 435 ka kamilyu ag 6,720 ka asnu.

⁷⁰ Ti iba pag manga takinan manga magtal-anakan nangambag para sa pagpatindug maan sa Balay Diyus. Ti gubirnadur nagpakaun walu ka kilu gintu, 50 ka malukung gamitun sa Balay Diyus, ag 530 ka bilug rutay para sa manga manughandug.

⁷¹ Ti iba pag manga takinan manga magtal-anakan nagpakaun para sa kainda pag buruwatun 168 ka kilu gintu hanggan 1,200 pilak.

⁷² Ti kabuuhan ipinakaun iba waya pag manga tawu 168 ka kilu gintu, 1,100 ka kilu pilak, bag-u 67 ka bilug rutay para sa manga manughandug.

⁷³ Ti kada usa sa kanda nagbalik sa kanda manga sadili banwa nu naan ginan kanda magtal-anakan, hanggan ti manga manughandug, manga Libita, manga guwardiya sabian Balay Diyus, manga manugkanta, hanggan manga suruguun sa Balay Diyus.