Nihimyas 6 - Hanunuu

Ti Parargu pag Pag-ampara sa Pagpatindug Alad Batu

¹ Taynguna, nabaritaan nida ni Sanbalat, ni Tubyas, ni Gisim taga Arabya, ag iba waya nimi manga kalaban kuntay natapus yi nimi ti pagpatindug alad batu hanggan unman yi inda may manga buslut, purya wadi sa manga talakup unman waya naitakud.

² Nakan nagpadara sida ni Sanbalat hanggan ni Gisim kaindaay pag tultulanun: “Gustu nimi magatagasampaki sa kanmu sa usa ka baryu sa karatagan Unu.” Dapat alam di niku may gayak sida daut sa kangku.

³ Nakan nanugu aku manga manugtultul hampay sabihun sa kanda magkun, “Mahalaga ti pagbuwatun niku taynguna, nakan unman aku makaasantag. Balaw niku mahimu apasan ti pagbuwat hampay lang makaasantag.”

⁴ Upat ka bisis nida aku pinadarahan katunda diman pag tultulanun ag upat ka bisis diman niku sida pinadarahan katida diman pag sagut.

⁵ Sa ikalima pag bisis ipinaatag ni Sanbalat sa kangku kay suruguun may dara surat mabukasan yi.

⁶ Kaindaay kay nakasurat: “Sinabihan aku ni Gisim magkun una naan siya pag mag-atag mag-asaydan niya kawu hanggan ti manga Hudiyu maggayak lumaban, kainda kay dahilan nu hayga ipinatindug maan niyu ti alad batu. Ag angay sa nasaydan niya, gustu nimu humari sa manga Hudiyu,

⁷ ag nagpili waya ngani kawu manga purupita magbarita sa kanmu sa Hirusalim kuntay kawu yi ti hari sa Huda. Pihu maalaman inda hari, nakan pag-ataytag kawu hampay paghampangan nita inda pag manga bagay.”

⁸ Inda ti isinagut niku sa kanya: “Balaw tutuu ti manga pagsabihun nimu. Binuwat-buwat lang nimu tunda.”

⁹ Alam niku pagpadalaun lang nida kami hampay umapas kanmi magbuwat. Dapat nandarangin aku sa Diyus kuntay pabisugun waya gid niya aku.

¹⁰ Usa ka sirang, nag-atag aku sa kan Simaya kay anak ni Dilaya kay laki ni Mihitabil, dahil balaw siya makaighit sa kay balay. Magkun siya sa kangku, “Magsampak kita sa sulud Balay Diyus, ag agadan nita ti manga sabian. Dahil rumas-ug kanmu manga kalaban taynguna pag yabi hampay matyun kawu.”

¹¹ Dapat sinmagut aku, “Balaw inda pag lalaki ti malagiw; hayga aku malagiw ag patagu sa sulud Balay Diyus hampay iribri kang buhi? Balaw aku patagu!”

¹² Naisip niku balaw nanhampang ti Diyus sa kanya, nu unman sinuhulan lang siya ni Sanbalat ag ni Tubyas kuntay sabihan tunda sa kangku.

¹³ Gustu lang nida aku padalaun ag pabuwatun kasalanan sa pagsunud sa sinabi ni Simaya, hampay puyaan nida aku ag kadat-an manga tawu.

¹⁴ Nakan nandarangin aku, “Diyus niku, danga nimu pagkalimti kuntay parusahan si Tubyas hanggan si Sanbalat sa kanda pagbuwatun daut, hanggan ti purupita babayi si Nuwadyas ag ti iba waya pag manga purupita maghingbut kuntay padalaun aku.”

Natapus ti Pagpatindug Alad Batu

¹⁵ Natapus ti alad batu katpung ika-25 pag sirang sa ikan-um pag bulan, ti bulan Ilul. Natapus inda sa sulud 52 ka sirang.

¹⁶ Pagka nabaritaan inda nimi manga kalaban sa karani pag manga nasyun, nadala sida ag nangay-a. Pag-isip-isipun nida kuntay natapus tunda pag buruwatun sa panab-anan awat Diyus.

¹⁷ Ati katpung pag panahun, magsururatan sida ni Tubyas hanggan ti manga takinan sa Huda.

¹⁸ Mayamu taga Huda ti nagsumpa pagkamatinupadun sa kan Tubyas dahil kay umagad siya ni Sikanyas kay anak ni Ara. Ag usa waya, inasawa niya anak si Hihuhanan kay anak ni Misulam kay anak ni Birikyas.

¹⁹ Pirmi pagsabihun sa kangku manga tawu tungkul sa mayad pag manga binwat ni Tubyas, ag pirmi diman magras-ug sa kanya ti manga pagsabihun niku. Parargu magsurat sa kangku si Tubyas hampay padalaun aku.