Nihimyas 5 - Hanunuu

Inawatan ni Nihimyas ti manga Pugri

¹ Nagdangup ti iba ka manga lalaki hanggan kanda manga asawa sa kanda kaparihu manga Hudiyu.

² Magkun sida, “Daka kanmi magtal-anakan ag magpangailangan kami karan-unun hampay mabuhi.”

³ Ti iba diman sa kanda magkun, “Isinangla yi lang nimi kanmi manga tanman, manga taranuman ubas, hanggan kanmi manga balay agud may makaun kami sa udas tig rulun-us.”

⁴ May iba waya gid sa kanda magkun, “Nangudam kami kuwarta hampay makabayad buhis sa hari para sa kanmi manga tanman hanggan ubasan.

⁵ Una kami hanggan kanmi manga anak kaparihu diman nida manga Hudiyu, kailangan ipabili nimi sa kanda kanmi manga anak hampay may kuwarta kami. Sa tutuu lang, kay iba kanmi manga anak babayi ipinabili yi nimi bilang panawuhun. Unman kami may mabwat dahil kanmi manga tanman hanggan manga ubasan inapu yi iba.”

⁶ Masyadu aku nagalit pagka nadnugan niku kanda manga riklamu.

⁷ Inisip niku mayad kanda kahamtangan, bag-u binangdanan niku ti manga takinan hanggan ti manga may kangaranan. Magkun aku, “Paglugihun niyu kanyu manga kasimanwa! Dahil nu mag-udam sida sa kanyu manga kuwarta pagpatubuan niyu.” Bag-u tinipun niku ti manga tawu para sa usa ka harampangan.

⁸ Magkun aku, “Pagsikapun gid nita malukat kanta kaparihu manga Hudiyu nagpabili kanda sadili bilang panawuhun sa manga day-uhan. Dapat taynguna, dahil sa kanyu pagbuwatun, magkapilitan diman sida magpabili kanda sadili bilang panawuhun. Pirmi yi lang aw lugud nita sida pagpakalukatun?” Naghim-ung yi lang sida dahil unman sida may maidahilan.

⁹ Naparargu aku sa pagbagaw, “Bukun mayad kanyu pagbuwatun. Kailangan mana mabuhi kamu may dala sa Diyus hampay balaw kita puyaan iba manga nasyun kanta kalaban.

¹⁰ Aku ngapu hanggan kang manga katawuhan, ag manga tawuhan nagpaudam kuwarta hanggan tirigu sa kanta manga kasimanwa. Dapat danga yi nita sida pagpatubui sa kanda manga utang!

¹¹ Taynguna diman ibalik niyu ti manga tanman, manga ubasan, manga tanuman ulibu, hanggan manga balay manga may utang sa kanyu. Ibalik diman niyu ti patubu sa ipinaudam niyu kuwarta, tirigu, irinmun ubas hanggan lana ulibu.”

¹² Sinmagut sida, “Ibalik nimi tunda tanan sa kanda. Balaw yi nimi sida suktun. Buwatun nimi kanmu pagsabihun.” Bag-u ipinatawag niku ti manga manughandug ag ipinasumpa sa kanda atubangan ti manga takinan hanggan manga may kangaranan kuntay tupadun nida kanda itinaratu.

¹³ Ipinagpag niku kang kulimpay sa kang awak bag-u magkun, “Kainda mana ti buwatun Diyus sa kanyu balay hanggan kasiyunan nu unman niyu tupadun kanyu itinaratu. Mana duraun niya inda tanan sa kanyu.” Ti tanan tawu ati nagsagut, “Katida yi ngap!” Bag-u dinayaw nida ti Panginuun. Ag tinupad manga takinan hanggan manga may kangaranan kanda itinaratu.

Ti Kaalwanan ni Nihimyas

¹⁴ Sa sulud sampulu may duwa ka timpu nagsirbi aku bilang gubirnadur Huda, ginan sa ika-20 pag timpu tugka sa ika-32 pag timpu kay maghari ni Artasirsis, unman gid aku hanggan kang manga katawuhan nagtanggap karan-unun para sa gubirnadur.

¹⁵ Dapat ti manga gubirnadur nag-una nagbaliw pabuyat sa manga tawu, dahil maghagad gid sida sa kanda sirang-sirang pagkaun hanggan irinmun purya waya sa 40 ka pulud pilak. Hanggan kanda manga may kangaranan nagpakuri sa manga tawu. Dapat unman gid niku tunda binwat, dahil magkadala aku sa Diyus.

¹⁶ Bagkus ngapu, binuwat niku ti tanan hampay maipatindug uman ti alad batu sa awat niku manga tawuhan. Ag unman gid aku nangapu daga.

¹⁷ Pirmi niku pagpakaunun ti 150 ka Hudiyu may kangaranan tuhay waya ti manga manugsabang ginan sa palibut manga nasyun.

¹⁸ Sirang-sirang aku may ipagpaiyaw usa ka baka, unum ka matabul manga karanidu, ag mayamu pag manga manuk. Kada ikasampulu pag sirang magbulwat aku duru pag intus tuhay-tuhay pag kalasi. Una katunda kang manga paggastusan unman gid aku nananggap karan-unun para sa gubirnadur, dahil alam niku magkabuyatan yi ti manga tawu.

¹⁹ Nandarangin aku, “Diyus niku, mana papaladan nimu aku sa tanan niku pag buwatun para sa inda pag kalamalayan.”