Nihimyas 4 - Hanunuu

Inampara ti Pagpatindug Alad Batu

¹ Pagka nabaritaan ni Sanbalat ipinatindug maan nimi ti alad batu, nagalit gid siya ag pinuyaan niya kami ti manga Hudiyu.

² Sa atubangan niya manga kaibahan hanggan manga sundalu Samarya, magkun siya, “Unu lugud ti pagbuwatun manga kaawaawa pag manga Hudiyu? Mag-isip aw lugud sida sa sulud usa lang ka sirang maipatindug maan nida ti manga alad batu Hirusalim ag makahandug maan sida? Kanda aw hantup, magamit waya nida ti manga nasunug ag narunut pag manga alad batu!”

³ Magkun diman si Tubyas usa ka Amunita sa kay arani ni Sanbalat, “Una talun idu lang ti dumayik sa siyun pag alad batu marup-ag yi inda!”

⁴ Bag-u nagdarangin aku, “Diyus nimi, patingihi kami dahil pagpuyaan kami. Mangyari mana sa kanda ti manga pagbagawun nida sa kanmi unman may pulus. Mana bihagun sida iba rugar.

⁵ Danga gid sida pagpatawada dahil pinuyaan nida kawu sa atubangan nimi manga magtarabahu sa alad batu.”

⁶ Parargu kanmi magbuwat sa alad batu tugka sa nagkatunga yi kay abwat inda, dahil ti manga tawu arawatan gid sa pagbuwat.

⁷ Dapat pagka nabaritaan nida ni Sanbalat, ni Tubyas hanggan manga Arabu, manga Amunita ag manga taga Asdud parargu ti pagpatindug alad batu Hirusalim hanggan kay manga buslut inda natakluban yi, magkagalit gid sida.

⁸ Naggayak sida tanan girahun nida ti Hirusalim hampay guluhun kami.

⁹ Dapat nandarangin kami sa kanmi Diyus ag nagpauli manga guwardiya sa sirang hanggan sa yabi, hampay maalagaan kanmi sadili.

¹⁰ Taynguna, magkun ti manga taga Huda, “Magkagasa yi kami sa pagtarabahu. Mayamu waya tumpag kailangan akutun, unman nimi inda makaya tapusun.”

¹¹ Sa baliw baliwa, magkun kanmi manga kalaban, “Padiklahun nita sida, bag-u nida makitan, naslud yi nita kanda rugar. Panmatyun nita sida, umapas yi kanda magtarabahu.”

¹² Ti manga Hudiyu mag-uli arani sa kanda pirmi magbarita sa kanmi kanda gayak sa paggira.

¹³ Nakan nagpauli aku manga tawu hampay magtanud sa pinakaababa pag bahagi alad batu madali suldun. Ipinatanud niku sida ati magkagurupu sa kada magtal-anakan, may manga armas sida — manga baladaw, bangkaw ag pamana.

¹⁴ Pagka pag-isipun niku kanmi kahamtangan, ipinatawag niku ti manga takinan, manga may kangaranan, hanggan ti manga nasakupan, magkun aku sa kanda, “Danga kamu magkadala sa manga kalaban. Alalahanun lang nita ti Panginuun makamaskihan ag makadululaw. Lumaban kita para mairibri kanta manga katawuhan, manga anak, manga asawa, hanggan kanta manga balay.”

¹⁵ Pagka nabaritaan nimi manga kalaban naalaman nimi kanda gayak sa paggira sa kanmi, naisip nida dinaut Diyus kanda gayak, nagbalik kami tanan sa kanmi pagbuwatun alad batu.

¹⁶ Dapat ginan sa tunda pag sirang, katunga lang niku tawuhan ti magbuwat sa alad batu, dahil kay katunga magtanud may manga bangkaw, taming, pamana ag panangga sa dubdub. Ti manga may kangaranan matindugan sa aday-an nasakupan Huda

¹⁷ magbuwat alad batu. Habang magtarabahu sida, kay usa ka kamang maghiyaput gamit sa panarabahu ag kay baliw kamang magbitbit armas,

¹⁸ bag-u may sabak waya sida baladaw. Ti manugpatunug budyung sa kang tupad.

¹⁹ Magkun aku sa manga takinan, manga may kangaranan hanggan sa manga nasakupan, “Maluang kanta pagbuwatun alad batu ag ararayu kanta tab-anan habang magtarabahu,

²⁰ nakan nu madnugan niyu ti tunug budyung, pag-ataytag kamu sitay sa kangku. Kanta Diyus imaw ti lumaban para sa kanta.”

²¹ Nakan parargu kanmi magtarabahu ginan sa magkasurip tugka sa magdulum, ti katunga manga tawu magtanud may manga armas.

²² Sa tunda pag udas, magkun diman aku sa manga tawu mag-ulian sa luwas Hirusalim, sida hanggan kanda manga panawuhun pagsulud sa banwa nu yabi hampay magtanud sida, ag aldaw surip maan pag makatarabahu sida.

²³ Dahil pirmi kami magtanud, aku hanggan kang manga katawuhan, manga tawuhan, hanggan manga guwardiya unman yi kami nan-ilis kanmi manga sulung rutay. Ag una mag-atag kami sa danum dara-dara nimi kanmi manga armas.