Nihimyas 3 - Hanunuu

Ipinatindug maan ti Alad Batu Hirusalim

¹ Ipinatindug ni Ilyasib pangulu manughandug hanggan kay manga kaibahan manga manughandug ti sabian pag ingarnan Karanidu. Natapus nida itakud kay talakup, itinigana nida inda sa Diyus. Ipinatindug diman nida ag itinigana ti manga alad batu tugka sa Bantayaw Usa ka Gatus hanggan sa Bantayaw ni Hananil.

² Ti nagpatindug kay dasun pag bahagi alad batu imaw ti manga taga Hiriku, ti nagdasun sa kanda si Sakur kay anak ni Imri.

³ Ipinatindug manga anak ni Hasina ti Sabian pag-ingarnan Isda. Pinaulian nida inda manga bakalan, itinakud kay talakup ag binuwatan manga pangagad.

⁴ Ti nagpatindug kay dasun pag bahagi alad batu si Mirimut kay anak ni Uryas kay laki ni Hakus. Kay kadasun pag bahagi maan ipinatindug ni Misulam kay anak ni Birikyas kay laki ni Misisabil. Dumasun maan si Saduk kay anak ni Baana.

⁵ Ag ti dinmasun sa kanya ti manga taga Tikuwa. Dapat kanda manga takinan unman sinmunud sa pag-ipabuwat nida manga magtakinan sa tarabahu.

⁶ Ti nagpatindug Daan Sabian si Huyada kay anak ni Pasya ag si Misulam kay anak ni Bisudiya. Pinaulian nida inda manga bakalan, itinakud kay manga talakup ag binuwatan manga pangagad.

⁷ Ti nagpatindug kay dasun pag bahagi alad batu sida ni Milatyas taga Gibyun, Hadun taga Mirunut, hanggan ti manga lalaki taga Gibyun ag taga Mispa. Inda pag manga rugar sakup gubirnadur purubinsiya sa isalpan Iyupratis.

⁸ Ti nagpatindug kay dasun waya gid pag bahagi alad batu si Usyil manug panday pilak, kay anak ni Harhaya. Ti dinmasun maan sa kanya si Hananiyas manugbuwat pamanglu. Ipinatindug nida inda pag bahagi alad batu Hirusalim tugka sa Maluang pag Alad Batu.

⁹ Ti dinmasun sa kanda kay anak ni Hur si Ripayas, takinan katunga distritu Hirusalim.

¹⁰ Ti dinmasun sa kanya si Hidayas kay anak ni Harumap. Ipinatindug niya ti bahagi alad batu arani sa kay balay. Ti dinmasun sa kanya si Hatus kay anak ni Hasabniyas.

¹¹ Ti nagpatindug kay dasun waya gid pag manga bahagi alad batu hanggan bantayaw may manga Hurnu sida ni Malkiyas kay anak ni Harim, ag si Hasub kay anak ni Pahat Muab.

¹² Ti dinmasun sa kanda kay anak ni Haluhis si Salum, takinan katunga distritu sa Hirusalim. Inawatan siya niya manga anak babayi.

¹³ Ti nagpatindug Sabian Maatubangan sa Luung si Hanun hanggan ti manga taga Sanwa. Itinakud nida kay manga talakup inda, bag-u binuwatan manga pangagad. Ipinatindug diman nida ti 450 ka manasa alad batu tugka sa Sabian Rayamtan Paruk.

¹⁴ Ti napagtindug Sabian Rayamtan Paruk kay anak ni Rikab si Malkiyas, takinan distritu Bit Hakirim. Itinakud niya ti manga sabian inda, ag binuwatan manga pangagad.

¹⁵ Ti nagpatindug Sabian Atabug sa Bulbugan kay anak ni Kul Husi si Salum, takinan distritu Mispa. Inatpan niya inda, itinakud kay sabian bag-u binuwatan pangagad. Ipinatindug diman niya ti alad batu pararigsan sa Siluam, arani sa gardin hari, tugka sa may agdan palus-ug ginan sa Banwa ni Dabid.

¹⁶ Ti dinmasun sa kanya kay anak ni Asbuk si Nihimyas, takinan katunga distritu Bit Sur. Ipinatindug niya ti alad batu maatubangan sa lulubngan ni Dabid tugka sa may pagtipunan danum ag sa may kampu manga sundalu.

¹⁷ Ti nagpatindug kay dasun pag bahagi alad batu ti manga Libita pagpanguluhan ni Rihum kay anak ni Bani. Ti dinmasun sa kanya si Hasabya takinan katunga distritu Kiyla.

¹⁸ Ti dinmasun sa kanya kay manga kasimanwa pagpanguluhan anak ni Hinadad si Binuy, takinan katunga distritu Kiyla.

¹⁹ Ti dinmasun kay anak ni Hiswa si Isir takinan Mispa. Ipinatindug niya ti bahagi alad batu maatubangan sa haramnuan manga armas tugka sa suuk alad batu.

²⁰ Ti dinmasun maan si Baruk kay anak ni Sabay. Ipinatindug niya may kasipagan ti bahagi alad batu ginan maan sa suuk alad batu tugka sa sabian baliwa balay ni Ilyasib pangulu manughandug.

²¹ Ti dinmasun sa kanya si Mirimut kay anak ni Uryas ag kay laki ni Hakus. Ipinatindug niya ti bahagi alad batu ginan sa may sabian baliwa balay ni Ilyasib tugka sa katapusan lingub balay.

²² Ti dinmasun nagpatindug bahagi alad batu ti manga manughandug sa sangput Hirusalim.

²³ Ti dinmasun sa kanda sida ni Binhamin ni Hasub. Ipinatindug nida ti bahagi alad batu maatubangan sa kanda manga balay. Ti dinmasun sa kanda si Asariyas kay anak ni Maasiyas kay laki ni Ananiyas. Ipinatindug niya ti bahagi alad batu tugka sa habig niya balay.

²⁴ Ti dinmasun si Binuy kay anak ni Hinadad. Ipinatindug niya ti bahagi alad batu ginan sa balay ni Asariyas tugka sa suuk alad batu. Ikadwa yi inda pag bahagi alad batu kay ipinatindug.

²⁵ Kay dasun waya gid si Palal anak ni Usay. Ipinatindug niya ti bahagi alad batu ginan sa suuk alad batu tugka sa maglangbaw pag bantayaw sa balay hari, arani sa sugkadan manga guwardiya. Ti dinmasun sa kanya si Pidaya kay anak ni Parus,

²⁶ hanggan ti manga suruguun sa Balay Diyus mag-uli sa may tagudtud Upil. Ipinatindug nida ti bahagi alad batu tag sa butlakan baliwa, tugka sa Sabian Atabug sa Danum ag sa maglangbaw pag bantayaw.

²⁷ Kay dasun sa kanda ti manga taga Tikuwa. Ipinatindug nida ti bahagi alad batu tugka sa maglangbaw daraka pag bantayaw tugka sa alad batu sa Katagudtudan Upil. Ikadwa yi inda pag bahagi alad batu kanda ipinatindug.

²⁸ Ti manga manughandug ti nagtindug bahagi alad batu ginan sa Sabian manga Kabayu patukad. Ipinatindug kada usa sa kanda ti bahagi maatubangan sa kanda manga balay.

²⁹ Kay dasun sa kanda si Saduk kay anak ni Imir. Ipinatindug niya ti bahagi alad batu maatubangan sa kay balay. Kay dasun sa kanya kay anak ni Sikanyas si Simaya, guwardiya Sabian sa Butlakan.

³⁰ Ti dinmasun sa kanya si Hananiya kay anak ni Silimya hanggan si Hanun ti ikan-um pag anak ni Salap. Ikadwa yi inda pag bahagi alad batu nida ipinatindug. Kay sunud sa kanda si Misulam kay anak ni Birikyas. Ipinatindug niya ti bahagi alad batu maatubangan sa kay balay.

³¹ Kay dasun maan gid si Malkiyas usa ka panday pilak. Ipinatindug niya ti bahagi alad batu tugka sa ulian manga suruguun sa Balay Diyus hanggan sa manga manugnigusyu, maatubangan sa Sabian Tiripnan, bag-u tugka sa sulud-sulud sa suuk sa tungud alad batu.

³² Ti manga panday pilak hanggan ti manga manugnigusyu ti nagpatindug bahagi alad batu ginan sa tunda pag sulud-sulud tugka sa Sabian manga Karanidu.