Nihimyas 2 - Hanunuu

Nag-ati si Nihimyas sa Hirusalim

¹ Katpung un-an pag bulan sa bulan Nisan, sa ika-20 pag timpu kay maghari ni Artasirsis, tinunghulan niku intus ti hari. Ati lang katpung niya aku pag nakitan maruku.

² Nakan pinaingana niya aku, “Hayga kawu maruku, unman waydi kawu may sakit? Ga may karukuan kanmu tagipusuun.” Kinulbaan gid aku masyadu,

³ dapat nagsagut aku sa hari, “Umaba waya mana kanmu buhi, Mahal Hari! Magruku aku dahil ti banwa linubngan niku manga ginurang naguba hanggan kay manga sabian inda sunug apuy.”

⁴ Nagpaingana ti hari, “Unu kanmu gustu?” Nandarangin aku sa Diyus sa langit,

⁵ pagkatapus, nagsagut aku sa hari, “Nu mahimu, Mahal Hari nu magbaya kawu sa kangku, gustu mana niku muli sa Huda hampay ipatindug uman ti banwa nu naan pag ilinbung kang manga ginurang.”

⁶ Nagpaingana sa kangku ti hari habang matukawan ti rayna sa kay arani, “Kabitay kawu kadugay ati, ag kapira kawu pag bumalik?” Sinabi niku nu kapira aku pag bumalik ag pinasnuan niya aku.

⁷ Namakihampang diman aku sa hari, “Nu mahimu, Mahal Hari, pakan-i aku manga surat para sa manga gubirnadur purubinsiya sa isalpan Iyupratis, hampay pasnuan nida aku lumawuy sa kanda magkasaklawan sa kang pag-uli sa Huda.

⁸ Nu mahimu, pakan-i diman nimu aku surat para sa kan Asap, ti manugbantay sa kanmu kakayuhan, hampay pakan-an niya aku manga kayu gamitun sa pagbuwat sabian mapag-un pag palalan-iban arani sa Balay Diyus, sa pagpatindug alad batu banwa hanggan sa balay ulian niku.” Tinupad hari kang manga paghagadun sa kanya dahil sa kaayadan Diyus sa kangku.

⁹ Sa pag ginan niku, pinaibahan waya aku hari sa kay manga may kangaranan sundalu hanggan manga manugkabayu. Pagras-ug niku sa isalpan Iyupratis, ipinakaun niku sa manga gubirnadur ti surat hari.

¹⁰ Dapat pagka nadnugan ni Sanbalat taga Hurun hanggan ni Tubyas usa ka may kangaranan pag Amunita kuntay rinmas-ug aku hampay awatan ti manga Israilita, nagalit gid sida.

Dinuawan ni Nihimyas ti manga Alad Batu Hirusalim

¹¹ Pagkalawuy tulu ka sirang ginan sa pagras-ug niku sa Hirusalim,

¹² linmakaw aku igu karaw-an yabi kaibahan ti pira niku ka manga kaibahan. Unman niku isinabi una sa kan tapu ti gustu ipabuwat Diyus sa kangku tungkul sa Hirusalim. Unman aku may iba dara hayup purya sa kang pagsakyan asnu.

¹³ Linmuwas aku sa Sabian Maatubangan sa Luung bag-u inmatag sa Bubun Daragun tugka sa may Sabian Rayamtan Paruk. Dinuawan niku mayad ti nadaut pag manga alad batu Hirusalim hanggan ti manga sabian nagkarasunug.

¹⁴ Naparargu aku sa Sabian Atabug sa Bulbugan tugka sa Pararigsan Hari, dapat unman makalawuy kang asnu ati.

¹⁵ Nakan naparargu yi lang aku sa Luung Kidrun, dinuawan gid niku ti manga alad batu sa tunda pag yabi. Pagkatapus binmalik aku ag ati maan lakaw sa Sabian Maatubangan sa Luung.

¹⁶ Unman may alam ti manga may kangaranan sa banwa nu naan aku ginan ag nu hintay kang binuwat. Dahil unman waya gid aku may tinultulan Hudiyu tungkul sa kang gayak, una ti manga manughandug, manga takinan, manga may kangaranan, ag ti iba waya asan sa gubirnu.

¹⁷ Dapat taynguna magkun aku sa kanda, “Nakitan niyu ti kaawaawa pag kahamtangan nita banwa. Guba ti Hirusalim ag sunug kay manga sabian inda. Utru nita ipatindug ti manga alad batu Hirusalim hampay balaw yi kita mangay-a.”

¹⁸ Magkun diman aku sa kanda nu kabitay kamayad ti Diyus sa kangku ag nu unu ti sinabi hari sa kangku. Nagsagut sida, “Sigi, ipatindug maan nita ti manga alad batu.” Nakan nag-alistu sida hampay umpisahan inda ti mayad pag buruwatun.

¹⁹ Dapat pagka nabaritaan inda ni Sanbalat taga Hurun, ni Tubyas usa ka may kangaranan pag Amunita, ag ni Gisim usa ka Arabu, pinuyaan nida kami ag kinasarin-an. Magkun sida, “Unu kanyu pagbuwatun inda? Maggayak aw lugud kamu lumaban sa hari?”

²⁰ Sinagut niku sida, “Manalu kami sa panab-anan awat Diyus sa langit. Kami kay manga manugsirbi umumpisa yi sa pagpatindug manga alad batu Hirusalim. Dapat kamu unman gid may labut ag unman may karampatan sa Hirusalim, ag balaw kamu kahuray inda sa kay tultulanun.”