Nihimyas 13 - Hanunuu

Ti manga Pagbag-u kay Binuwat ni Nihimyas

¹ Sa ati pag sirang binasa ti Kasuguan ni Muysis sa manga tawu, naalaman nida pag-ibawal ti manga Amunita ag ti manga Muabita magpalakay sa nasakupan Diyus.

² Dahil unman nida pinakan-an karan-unun hanggan irinmun ti manga Israilita pagka linmuwas sida sa Ihiptu. Bagkus ngap, sinuhulan nida si Balaam kuntay saadi ti manga Israilita. Dapat sa halip saad, binuwat inda Diyus papalad.

³ Pagka nasaydan manga tawu tunda pag kasuguan, ipinasaman yi nida ti manga balaw Israilita.

⁴ Bag-u inda nangyari, si Ilyasib pag manughandug, ti magdumara sa manga haramnuan sa Balay nimi Diyus ag katawuhan ni Tubyas,

⁵ nagpasnu sa kan Tubyas kuntay gamitun niya ti usa ka daka pag sulud-sulud sa Balay Diyus. Inda pag sulud-sulud paggamitun kaybi haramnuan para sa manga handug karan-unun, kamangyan, manga kagamitan sa Balay Diyus, manga handug sa manga manughandug, manga ikasampulu manga ani, irinmun ubas, hanggan lana ulibu, angay sa Kasuguan para sa manga Libita, sa manga manugkanta, ag sa manga guwardiya sabian.

⁶ Unman waya aku sa Hirusalim pagka nangyari inda, dahil katpung ika-32 pag timpu sa kay maghari ni Artasirsis sa Babilunya, nag-ati aku sa kanya. Pagka dugay, pinasnuan di niya aku

⁷ bumalik sa Hirusalim. Pagka ati, naalaman niku ti daut pag binwat ni Ilyasib, ipinatuluy niya si Tubyas sa usa ka sulud-sulud sa sugkadan Balay Diyus.

⁸ Sa masyadu niku pag pangagalit, ipinanyamut niku ti tanan manga burutangan ni Tubyas ipinalwas sa sulud-sulud.

⁹ Bag-u nagsugu aku lumpiyuha ti sulud-sulud. Pagkatapus, ibinalik niku ati ti manga kagamitan Balay Diyus hanggan ti manga handug karan-unun ag kamangyan.

¹⁰ Naalaman diman niku ti manga Libita unman yi magkapakan-an kanda pag kahuray, nakan sida hanggan ti manga manugkanta piniyaran sa buruwatun sa Balay Diyus nag-inululi yi hampay mananman.

¹¹ Nakan binagawan niku ti manga may kangaranan, “Hayga pinabay-anan niyu ti Balay Diyus?” Ipinatawag niku madali ti manga Libita hanggan ti manga manugkanta ag ipinabalik sa kanda manga buruwatun sa Balay Diyus.

¹² Utru ti tanan nasakupan Huda nagdara ikasampulu nida tirigu, irinmun ubas, ag lana ulibu ati sa manga haramnuan.

¹³ Ti kinatiwalaan niku sa manga haramnuan sida ni Silimya ti manughandug, si Saduk ti manugtudlu Kasuguan, ag si Pidaya usa ka Libita. Ipinaawat diman niku sa kanda si Hanan kay anak ni Sakur kay laki ni Matanyas dahil masarigan sida. Ikinatiwala diman niku sa kanda ti katungkulan maghuray sa manga kaparihu nida manugtarabahu sa Balay Diyus.

¹⁴ Bag-u nandarangin aku, “Diyus niku, alalahana nimu aku, danga gid pagkalimti ti manga mayad niku pag binwat para sa kanmu Balay hanggan sa manga buruwatun sitay.”

¹⁵ Sa tunda pag udas, may nakitan aku manga taga Huda magpuga ubas sa Sirang Pamahari. Ti iba sa kanda magkarga manga tirigu, intus, ubas, igus, ag iba waya pag manga bagay sa kanda manga asnu hampay daran-un sa Hirusalim. Nakan binagawan niku sida danga magpabili kanda manga kalakal sa Sirang Pamahari.

¹⁶ May imaw diman manga taga Tiru mag-uli sa Hirusalim nagdara manga isda ag iba waya pag manga pamabili. Pag-ipabili nida inda sa manga taga Huda ati sa Hirusalim sa Sirang Pamahari diman.

¹⁷ Nakan sinungyaw niku ti manga takinan Huda ag sinabihan, “Hintay inda pag kadautan kanyu binwat? Unman aw niyu pagkilalan-un banal ti Sirang Pamahari?

¹⁸ Unman aw kainda diman ti binwat niyu manga ginurang, nakan kita hanggan inda pag banwa pinarusahan nita Diyus? Taynguna, paggalitun waya gid niyu lubus ti Diyus sa kanyu pagbuwatun, dahil unman niyu pagkilalan-un banal ti Sirang Pamahari.”

¹⁹ Nakan nagsugu aku talakpan ti puwirtahan banwa kada Biyarnis malambung, ag danga inda pagbukasi tugka sa unman matapus ti Sirang Pamahari. Pinatanudan niku sa kang manga tawuhan ti manga sabian hampay unman may makasulud una hintay pag paninda sa banwa sa Sirang Pamahari.

²⁰ Nu kas-a, ti manga manugnigusyu magkaturug sa luwas Hirusalim nu Biyarnis yabi.

²¹ Dapat pinasandaman niku sida. Magkun aku, “Hayga sitay kamu pag magkaturug sa may alad batu banwa? Nu ulitun waya niyu inda, parusahan niku kamu!” Nakan tunda di ginan balaw yi sida binmalik sa Sirang Pamahari.

²² Bag-u sinugu niku ti manga Libita kuntay pagmalumpiyu sida ag pagbantay sa manga sabian hampay kilalan-un manga tawu banal ti Sirang Pamahari. Bag-u nandarangin aku, “Diyus niku, alalahana duy nimu inda kang manga pagbuwatun, ag kaawai nimu aku angay sa kadayawan nimu pagmahal.”

²³ Pagka tida diman pag manga panahun, nakitan niku may manga taga Huda nakaasawa manga babayi taga Asdud, taga Amun, ag taga Muab.

²⁴ Katunga sa kanda manga anak magbagaw pamagaw taga Asdud ngatay sa pamagaw iba tawu, ag unman sida makabagaw pamagaw Huda.

²⁵ Nakan sinungyaw niku ag sinaadan ti manga taga Huda. Binakul niku ti iba sa kanda ag linanit kanda manga buhuk. Ipinasumpa niku sida hanggan kanda manga anak sa ngaran Diyus kuntay balaw yi sida mangasawa sa manga day-uhan.

²⁶ Magkun aku sa kanda, “Balaw aw inda kay dahilan nakan nagkasala si Sulumun ti hari Israil? Unman may hari pumarihu sa kanya, una naan pag nasyun. Pagmahalun siya niya Diyus, ag binwat siya Diyus hari sa buu Israil. Dapat madi katida, nagkasala siya dahil sa paturun niya manga asawa day-uhan.

²⁷ Ta, pabay-anan yi lang aw lugud nimi inda pag kadautan kanyu binuwat balaw matinupadun sa kanta Diyus sa panab-anan mag-asawa sa manga day-uhan?”

²⁸ Si Huyada anak pangulu manughandug ni Ilyasib may anak nakaasawa sa kay anak ni Sanbalat taga Hurun, nakan pinaighit niku siya.

²⁹ Bag-u nandarangin aku, “Diyus niku, alalahana duy nimu ti paglapastangan nida sa kanda pagkamanughandug hanggan sa kanda nagsumpa bilang manga manughandug ag manga Libita.”

³⁰ Nakan siniguradu niku ti nasakupan Israil ribri yi sa una hintay pag palakaw manga day-uhan. Ag pinakan-an niku buruwatun ti manga manughandug hanggan ti manga Libita angay sa kada buruwatun nida.

³¹ Siniguradu diman niku ti manga pamagba sa handug madara sa kang-ud pag panahun, hanggan ti manga un-an pag ani. “Diyus niku, alalahana nimu aku ag papaladi.”