Nihimyas 12 - Hanunuu

Ti Listahan manga Manug-asiwa hanggan manga Libita

^1-7 Inda ti manga listahan manga manughandug hanggan manga Libita nakabalik ginan sa pagkabihag kaibahan ni Surubabil kay anak ni Salatyil ag ni Hisuwa ti pangulu manughandug. Ti manga manughandug sida ni Siraya, ni Hirimyas, ni Isra, ni Amaryas, ni Maluk, ni Hatus, ni Sikanyas, ni Rihum, ni Mirimut, ni Iddu, ni Ginituy, ni Abyas, ni Miyamin, ni Muadya, ni Bilga, ni Simaya, ni Huyarib, ni Hidaya, ni Salu, ni Amuk, ni Hilkiyas, ag ni Hidaya. Sida ti manga takinan nida kaparihu manga manughandug hanggan kanda manga kaibahan katpung panahun ni Hisuwa.

⁸ Ti manga Libita sida ni Hisuwa, ni Binuy, ni Kadmiyil, ni Siribya, ni Huda ag ni Matanyas. Si Matanyas hanggan kay manga kaibahan imaw ti piniyaran sa pagkanta manga kanta pasalamat.

⁹ Si Bakbukya hanggan si Uni, ag kanda manga kaibahan, imaw ti piniyaran sa pagsagut sa tunda pag manga kanta.

Ti Linahi ni Hisuwa Takinan Manug-asiwa

¹⁰ Si Hisuwa kay ama ni Huyakim. Si Huyakim kay ama ni Ilyasib. Si Ilyasib kay ama ni Huyada.

¹¹ Si Huyada kay ama ni Hunatan. Ag si Hunatan kay ama ni Hadwa.

Ti Takinan Magtal-anakan manga Manug-asiwa

^12-13 Inda ti takinan magtal-anakan manga manughandug katpung si Huyakim ti pangulu manughandug: Si Miraya ti takinan magtal-anakan ni Siraya. Si Hananiyas ti takinan magtal-anakan ni Hirimyas. Si Misulam ti takinan magtal-anakan ni Isra. Si Hihuhanan ti takinan magtal-anakan ni Amarya

¹⁴ Si Hunatan ti takinan magtal-anakan ni Maluk. Si Husi ti takinan magtal-anakan ni Sibanyas.

¹⁵ Si Adnak ti takinan magtal-anakan ni Harim. Si Hilkay ti takinan magtal-anakan ni Mirayut.

¹⁶ Si Sakaryas ti takinan magtal-anakan ni Idu. Si Misulam ti takinan magtal-anakan ni Ginitun.

¹⁷ Si Sikri ti takinan magtal-anakan ni Abyas. Si Piltay ti takinan magtal-anakan nida ni Minyamin ni Muadya.

¹⁸ Si Samwa ti takinan magtal-anakan ni Bilga. Si Hihunatan ti takinan magtal-anakan ni Simaya.

¹⁹ Si Matinay ti takinan magtal-anakan ni Huyarib. Si Usi ti takinan magtal-anakan ni Hidaya.

²⁰ Si Kalay ti takinan magtal-anakan ni Salu. Si Ibir ti takinan magtal-anakan ni Amuk.

²¹ Si Hasabya ti takinan magtal-anakan ni Hilkiyas. Si Natanyil ti takinan magtal-anakan ni Hidaya.

Ti Takinan Magtal-anakan manga Libita

²² Katpung sa panahun maghari si Daryu sa Pirsiya, ilinista ti manga ngaran takinan magtal-anakan manga manughandug hanggan ti manga Libita. Sa panahun sida ni Ilyasib, ni Huyada, ni Hunatan, ag ni Hadwa ti pangulu manughandug.

²³ Ti takinan magtal-anakan manga Libita tugka sa panahun ni Huhanan kay laki ni Ilyasib nakalista sa Ribru Tultulanun.

²⁴ Inda ti takinan magtal-anakan manga Libita: si Hasabya, si Siribya, si Hisuwa, si Binuy, si Kadmiyil, ag ti iba waya nida manga kaibahan matindugan sa kanda tupad sa udas magkanta sa Balay Diyus manga pagdayaw hanggan pasalamat sa Diyus. Sida ti magsagut sa kanta sa baliw pag gurupu, angay sa sugu ni Dabid ti manugsirbi sa Diyus.

²⁵ Kaibahan yi siyun si Matanyas, si Bakbukya, ag si Ubadyas. Ti manga guwardiya sabian Balay Diyus magbantay sa manga haramnuan arani sa may sabian sida ni Misulam, ni Talmun, ag ni Akub.

²⁶ Inda sida ti magsirbi sa kapanahunan ni Huyakim kay anak ni Hisuwa ag kay laki ni Husadak, sa kapanahunan ni Nihimyas ti gubirnadur ag si Isra ti manughandug hanggan manugtudlu sa Kasuguan.

Itinalaga sa Diyus ti Alad Batu Daka Banwa

²⁷ Katpung panahun pagtalaga alad batu Hirusalim, ipinatawag ti manga Libita ginan sa kanda pag-ulian. Ipinaatag sida sa Hirusalim hampay makapakiusa sa masulung pag buruwatun sa pagtalaga Balay Diyus sa panab-anan pagkanta manga kanta pasalamat hanggan pagpatunug manga simbals, alpa ag lira.

²⁸ Ipinaati diman ti manga manugkanta ginan sa manga sangput baryu Hirusalim hanggan ginan sa baryu Nitupa.

²⁹ May manga ginan sa banwa Bit Gilgal, hanggan sa rugar Giba ag Asmabit. Dahil ti manga manugkanta nagpatindug kanda sadili manga baryu sa sangput Hirusalim.

³⁰ Nagbuwat tun-anun sa paglumpiyu ti manga manughandug hanggan ti manga Libita hampay malumpiyu sida, ag katunda diman kanda binwat para sa manga tawu, sa manga puwirtahan banwa hanggan sa alad batu.

³¹ Dinara niku ti manga takinan Huda sa babaw alad batu, bag-u tinipun niku ati ti duwa ka daraka pag gurupu manga manugkanta hampay mamasalamat sa Diyus. Kay usa ka gurupu naghatay ati sa babaw alad batu atabug sa Sabian Rayamtan Paruk.

³² Magdasun sa kanda sida ni Husayas hanggan ti katunga manga takinan Huda,

³³ kaibahan sida ni Asariyas, ni Isra, ni Misulam,

³⁴ ni Huda, ni Binhamin, ni Simaya, ni Hirimyas,

³⁵ ag ti pira ka manughandug magpatunug turumpita. Magdasun diman si Sakaryas kay anak ni Hunatan. (Si Hunatan kay anak ni Simaya. Si Simaya kay anak ni Matanyas. Si Matanyas kay anak ni Mikaya. Ag si Mikaya kay anak ni Sakur kay linahi ni Asap.)

³⁶ Magdasun diman sa kan Sakaryas kay manga kaibahan sida ni Simaya, ni Asaril, ni Milalay, ni Gilalay, ni Maay, ni Natanyil, ni Huda, ag ni Hanani. May dara sida manga pamatunug parihu sa manga pag-ipatunug kaybi ni Hari Dabid ti manugsirbi sa Diyus. Inda pag gurupu pagpangunahan ni Isra ti manugtudlu Kasuguan.

³⁷ Pagras-ug nida sa Sabian Atabug sa Bulbugan, dinmayik sida sa agdan atabug sa Banwa ni Dabid. Linmakaw sida sa balay hari ni Dabid tugka sa nakaras-ug sida sa Sabian Atabug sa Danum, baliwa sa butlakan sa banwa.

³⁸ Kay ikadwa pag gurupu naghatay atabug sa wala baliwa sa babaw alad batu. Magdasun aku sa inda pag gurupu kaibahan ti katunga nasakupan. Linmakaw kami sa saruy Bantayaw May manga Hurnu atabug sa Maluang pag Alad Batu.

³⁹ Siyun ginan linmakaw kami sa Sabian ni Ipraim, sa Daan Sabian, sa Sabian pag-ingarnan Isda, sa Bantayaw ni Hananil, ag sa Bantayaw Usa ka Gatus. Bag-u linmakaw kami sa Sabian pag-ingarnan Karanidu ag nagpat-ung sa may Sabian Guwardiya.

⁴⁰ Ti duwa ka gurupu magpasalamat sa Diyus habang magpatakda dinmiritsu sa Balay Diyus. Dinmiritsu diman aku ati hanggan ti katunga takinan kaibahan niku.

⁴¹ Ati diman ti manga manughandug magpatunug budyung sida ni Ilyakim, ni Maasiyas, ni Minyamin, ni Mikaya, ni Ilyunay, ni Sakaryas, ag ni Hananiyas,

⁴² ag ti manga manugkanta sida ni Maasiyas, ni Simaya, ni Iliyasar, ni Usi, ni Hihuhanan, ni Malkiyas, ni Ilam, ag ni Isir. Sida ti manga manugkanta pagpangunahan ni Hisrahiya.

⁴³ Pagka sa tunda pag sirang, nagpakaun sida mayamu gid pag manga handug ag nagbaya, dahil pinasulung gid sida Diyus. Hanggan ti manga babayi ag manga anak masulung diman. Nakan ti iringayan nida kabayaan mag-adnugan una sa arayu.

⁴⁴ Sa tunda diman pag sirang, nagpauli sida manga lalaki mangasikasu sa manga haramnuan tipunan manga pamakaun, manga un-an pag ani, hanggan ikasampulu. Sida ti manuglikum manga handug ginan sa manga katanmanan sa sangput manga banwa para sa manga manughandug hanggan sa manga Libita, angay sa Kasuguan. Dahil magbaya ti nasakupan Huda sa manga buruwatun manga manughandug hanggan manga Libita.

⁴⁵ Binwat nida ti tun-anun sa paglumpiyu ag sa iba waya pag manga buruwatun pag-ipatupad Diyus sa kanda. Binwat diman manga manugkanta hanggan manga guwardiya manga sabian Balay Diyus kanda buruwatun angay sa manga sugu ni Hari Dabid hanggan niya anak si Sulumun.

⁴⁶ Ginan waya sa panahun ni Hari Dabid ag ni Asap, may imaw yi manga nagtakinan sa manga manugkanta sa pagdayaw hanggan pagpasalamat sa Diyus.

⁴⁷ Nakan katpung sa panahun ni Surubabil hanggan ni Nihimyas, ti tanan Israilita nagpakaun kanda manga handug para sa manga manugkanta ag manga guwardiya manga sabian Balay Diyus, hanggan diman sa manga Libita. Ginan sa manga magkatanggap nida hinurayan diman manga Libita ti manga lahi ni Aarun.